Jobe
37 “Ngo ndava yazvo, mwoyo wangu unotaka ngo simba,
Wophuka mukati mo hana yangu.
3 Iyena anotumira mbheni pasi po denga
Wotumira murazvu wake mbhera ku magumo o nyika.
4 Perapo kunozika mwaungu,*
Izwi rinothyisa ra Mwari rakadari inga kutindhira* ko mbheni
Murazvu unogara wecirazva iyena paanonga ecivereketa.
5 Mwari anotindhira* ngo izwi rake ngo njira inoshamaisa,
Anoita zviro zvakakura zvaticikakwanisi kuzwisisa.
6 Ngo kudaro, anovhunja cando kuti: ‘Iwai pasi,’
Wovhunja nvhura yakawanda* kuti: ‘Inai ngo simba.’
7 Mwari anoimisa mabasa anoithwa ngo vandhu,
Kuti vandhuvo havo vazive mabasa ake.
8 Zvinyama zvo musora zvinonghwina mu mapako
Zvofindaremo.*
9 Dutu* rinobuda pa ndau yaro,
Mbhepo yo kanjikazi inoviisa kutondhora.
10 Ngo kufurija* ka Mwari, kumwa inotondhora yoita mapuwe,*
Kumwa yakawandisisa, inobatana yoita mapuwe.
11 Iyena anothwara makore akathamba,
Wondhandhanisa murazvu wake mu makore.
12 Iwona anofamba ecitenderera ecitungamirihwa ndiyena,
Iwona anoita zvese zvaanovhunjwa ndiyena kuti aite pasi po nyika.
13 Iyena anoita kuti izvi zviitike,
Anozviita paanonga ecida kusvuzvunura no paanoda kuti nyika igare ushoni
Kana no paanoda kukhombija rudo ucikacinji.
14 Izwai izvi Jobe,
Imai urangarire mabasa anoshamisa a Mwari.
15 Kunanga kuti iwewe unoziva kuti Mwari anoitisa kudini kuti avonerere makore?
Unoziva kuti anoitisa kudini kuti murazvu ubwake mu makore ake?
16 Iwewe unozviziva kuti makore anomburukisa kudini?
Aya ndiona mabasa anoshamaisa a wiya wakakwana ngo uzivi.
17 Ngenyi nguvo jako jinogara jecipisa
Paunovona kunyararisa kwakaita nyika ngo ndava yo mbhepo yo kakusi?
18 Kunanga kuti iwewe pondhopo na iyena,
Munokwanisa kuwaja* denga rakavanga inga supeya yo simbi?
19 Tivhunjei zvatinodikana kumuvhunja,
Atikwanisi kudavira ngokuti tiri mucidima.
20 Zvingaita kuti ndivhunje Mwari here, kuti ndiri kuda kuvereketa?
Kunanga kuti ndavereketa ciri cese caaidikana kuvhunjwa?
21 Vandhu avakwanisi kuvona ruvheneko,
Pikija hutoriyo kudenga,
Mbhera mbhepo ipsaire makore ese.
22 Tikasota kanjikazi, tinovona ruvheneko unon’ganikira inga goridhi.
Ukuru hwa Mwari, hunothyisa.
23 Itusu atikwanisi kuzwisisa Womasimba Ese
Iyena wakakura ngo simba
Iyena aazotongi zvinosiyana no kururama kwake kwakakura.
24 Ngo kudaro, vandhu vanodikana kumuthya.
Aaitiri unyasha mundhu wese anojivona inga ano uzivi.”