Isaya
35 Zvipare no nyika yakaoma, zvinozodakara,
Bani rinozodakara, rozobara mafirori akaita inga zinyanjani.
2 Irona rinozobara kamare mafirori;
Rozotamba no kukhuwa ngo mudakaro.
Irona rinozopuwa rukujo wo Rebhanoni,
Rozopuwazve ukuru wo Kameri no Saroni.
Vandhu vanozovona rukujo hwa Jehovha, no ukuru wa Mwari wedu.
3 Vangisanyi nyara jakaremba,
Vangisanyizve makokovhi ari kundhya-ndhya.
4 Vhunjanyi vaya vano mwoyo uri kuthimwa-thimwa:
“Vanganyi. Mucathya.
Vonanyi! Mwari wenyu ari kuviya kuti ahwirijire,
Mwari anozoviya kuti apanice.
Iyena anozoviya, wozomuponesa.”
5 Pamukuwo wondhowo, majiso o mapofu anozofununguka,
Njeve jo vandhu vano mandondo jinozofununguka.
6 Pamukuwo wondhowo, vandhu vakaremara vanozophuka inga nondo,
Rurumi jo mbeveve, jinozokhuwa ngo mudakaro.
Muzvipare munozopopoma kumwa,
Mu bani rakaoma munozova no mugere jo kumwa.
7 Nyika yakaoma inozoita inga gandhwa rakazara ngo njanga,
Nyika icina kumwa inozova ndau inobuda kumwa.
Mu ndau jokufindarira, jaizororera imbhwa jo musora,
Munozova no sora, njanga no ndhokwe.*
8 Mondhomo munozova no citaka,
Hina, gwanja rinozodanijwa kuti Gwanja ro Uceni.
Mundhu acizivi kucena, aazofambi ndirona.
Gwanja rondhoro, rinozova ra wiya anofamba ndirona;
Benji arizorasikirimo.
9 Mondhomo amuzovi no mbhondoro,
Apana cinyama cinothyisa cinozofamba ndirona.
Izvona azvizovoneki modhomo;
Basi vayani vakaponeswa, ndivona vanozofamba ndirona.
10 Vaya vakaponeswa ndi Jehovha, vanozohwirira voguma ku Ziyoni vecikhuwa ngo kudakara.
Vanozosimijwa korowa yo mudakaro wo kwenda no kwenda.
Ivona vanozotamba vecidakara maningi,
Kuthya no kugomera, zvinozopera.