Mazwi Akangwara
4 Vana vangu, izwanyi mbhangiro ja baba;
Nasanyi kuteya njeve kuti muzwisise,
2 Ngokuti ndinozomupekeja ndhungamiriro yaushoni;
Mucasiya zvandinomujijisa.*
3 Ndakava mwana waushoni kuna baba wangu
Ndodiwazve maningi ndi mai wangu.
4 Ivona vaindijijisa vecinanga kuti:
“Mwoyo wako ngaubatisise masoko angu.
Vigai mutemo jangu, iwewe unozorarama.*
5 Psakai uzivi, psakai mwoyo unozwisisa.
Ucakanganwa, nee audikani kusiya zvandinonanga.
6 Ucasiya uzivi, ngokuti iwona unozokujivirira.
Unodikana kuuda, ngokuti iwona unozokungwarira.
7 Uzivi, iciro cinosisira maningi.*
Ngo kudaro, wanai uzivi,
Kusiyapo zvese zvaunowana, wanai mwoyo unozwisisa.
8 Hureremejei maningi, ihwona hunozokureremejavo.
Kudari ukahubatisisa, ihwona hunozokukuja.
9 Ihwona hunozodira zviro zvinosejesa* pamusoro pako;
Hunozokusejesa ngo korowa yakaseja.”
10 Mwana wangu, ndizwei.
Tenderai zvandinokuvhunja,
Makore ako anozowanda maningi.
11 Ndinozokujijisa gwanja ro uzivi;
Ndinozokuseseja mu makwanja o ururami.
12 Paunofamba, apana cinozophingaija mudanyo jako;*
Kudari ukagogoma, apana cinozokukhugunya.
13 Batisisa mbhangiro; ucaiphojomora.
Ingwarirei, ngokuti izvi zvinoreva upenyu hwako.
14 Ucanghwina mu makwanja mo vandhu vakashata,
Ucafamba mugwanja ro vashaishi.
15 Siyanai naro, ucafamba ndirona;
Budai mugwanjero, uenderere mberi.
16 Avakwanisi kuvata vacizivi kuita zviro zvakashata.
Vakatama kuwisa mundhu, hope javo ajizi.
17 Ivona vanoha zvokuha zvavanowana ngo njira yakashata,
Vomwa vhinyu yavanowana ngo ubhandidhu.
18 Asi makwanja o vandhu vakanaka,
Akaita inga ruvheneko hunovheneka maambakueja
Ihwona hunoenderera mberi hwecivheneka padoko ngo padoko,
mbhera koita masikati.
19 Gwanja ro vandhu vakashata, rakagara inga cidima;
Ivona nee avatozivi cinovakhugunya.
20 Mwana wangu, nasai kuteya njeve ku masoko angu;
Nasai kuzwa zvandinonanga.
21 Ucamaruza wakasota;
Mangwarirei mukati mo mwoyo wako,
22 Ngokuti iwona anoreva upenyu kuno vese vanomawana,
No uhomi hwakanaka ku muviri wako wese.*
23 Nasai kungwarira mwoyo wako
Kupinda zviro zvese zvaungangwarira,
Ngokuti mukati mwawo munovha zviro zvinopa upenyu.
24 Ucavereketa zvokunyepa,
Ucatendera kuti masoko o kucengeja abude mu muromo mako.
25 Majiso ako anodikana kunasa kusota kumbeji,
Hina, kunasa kusota kumbeji.
26 Nasirirai gwanja ro soka jako,
Makwanja ako ese aazovi no ngozi.
27 Ucaenda ku mukono muho nee ku mukono boswe.
Reesai soka jako ku zviro zvakashata.