Ezekiyeri

38 Ndakaashirazve soko ra Jehovha reciti: 2 “Mwana wo mundhu, sotai Gogi wo nyika yo Magogi, dhodha guru ro Mesheki no Tubhari, uphorofete ngo pamusoro paro. 3 Nangai kudari: ‘Jehovha Mambo Mukuru-kuru anoti: “Inini ndiri kuda kukuhwisa iwewe Gogi, dhodha guru ro Mesheki no Tubhari. 4 Ndinozokuhwirija sure, ndokudira zvikorokotejero* mu shaya jako. Ndinozokubudisa no masoca ako ese no haci, pomwe no vapakiri vajo. Vese vakanasa kusimira, no masoca akawanda ano muvhiko mukuru no mudoko. Vese vano mapanga avo. 5 Nyika yo Persiya, Etiyopiya no Puti, jiri pamwepo na ivona. Vese, vano muvhiko no kapaseti. 6 Gomeri no masoca ayo ese, no mubarihwana hwo Togarima, unogara ku divi ro ndhambo ro kanjikazi, kubatanija no masoca ayo ese, hina, vandhu vazinji vanozova na iwewe.

7 “‘“Nasiriranyi, iwewe no masoca awabatanari nawo. Iwewe unozova mutungamiriri wavo.

8 “‘“Ndinozokurangarira pasure po njiku zinji. Pakupera ko makore, iwewe unozonghwina ngo hasha mu nyika yokuti vandhu vakahwirijwa no kuponeswa ngo banga, vakavha ku majinja mazinji, voviiswa ku matundhu o Iziraeri, okuti akapera mukuvo wakareba ari mathere. Vagari vo nyika iyi, vakavha pakati po majinja, vese vakagara ushoni. 9 Iwewe no masoca ako ese, no vandhu vazinji vanokuperekeja, unozovagumira inga dutu,* wofukija nyika inga makore.”’

10 “Jehovha Mambo Mukuru-kuru anoti: ‘Pa njiku yondhoyo, mu mwoyo mako, munozogumihwa ngo murangariro, iwewe unozorura mazano akashata. 11 Iwewe unozoti: “Ndinozonghwina ngo hasha mu nyika inogahwa ngo vandhu vacizivi kungwaririhwa. Ndinozohwisa vandhu vari kugara ushoni, pacina ciro cinovanesa. Vese vanogara mu ndau icina muru, mugogo no musuvo.” 12 Cinangwa cavo, cinozova cokutora zviro, no kuhwisa ndau jainga jakaphwanyika, jokuti wari jiri kugahwazve. Ivona vari kudazve kuhwisa vandhu vanogara pakati po majinja, vari kuunganija upfumi no zviro, vecigara pakati po nyika.

13 “‘Shebha no Dhedhani no vaiti vo nyagoso vo Tarishishi, no masoca avo ese vanozoti: “Iwewe uri kuda kunghwina mu nyika kuti utore zviro zvizinji here? Iwewe waunganija masoca ako kuti utore sirivha no goridhi no upfumi no zviro zvakawanda here?”’

14 “Mwana wo mundhu, phorofetai kudari ngo pamusoro pa Gogi: ‘Jehovha Mambo Mukuru-kuru anoti: “Pa njikuyo, vandhu vangu Vaiziraeri, pavanozogara ushoni, kunanga kuti iwewe auzozvizivi izvi here? 15 Iwewe unozovha kwaunogara, ku ndau jo ndhambo jo kanjikazi, weciperekejwa ngo vandhu vazinji, vese vakapakira mahaci,* mbungano yakakura, masoca akawanda. 16 Iwewe unozoviya kuzohwisa vandhu vangu Vaiziraeri inga makore anofukija nyika. Kumbhiri ko njiku jo kupejisira, ndinozokuviisa kuti uhwise vandhu vangu, kuti majinja andizive pandinozojicenesa ivona vacizvivona, ngo ndava yako iwewe Gogi.”’

17 “Jehovha Mambo Mukuru-kuru anoti: ‘Asipi iwewe wandaibhuya kareko ndecishandisa vashandiri vangu, vaphorofeta vo Iziraeri, vakaphorofeta ko makore mazinji kuti iwewe waizoviya kovahwisa here?’

18 “Jehovha Mambo Mukuru-kuru anoti: ‘Pa njiku yondhoyo, njiku yokuti Gogi anozohwisa Vaiziraeri, ushungu hwangu hukuru hunozobwaka. 19 Ndinozovereketa ngokuti ndakanyangajwa, ngokutizve ushungu hwangu huri kubwaka. Pa njiku yondhoyo, panozoitika kuzungunyika kukuru ko nyika,* ku nyika yo Iziraeri. 20 Ngo ndava yangu, hove jo mujombe no shiri jo kudenga, no zvinyama zvo musora, no zvinyama zvese zvinogwezva pasi, no vandhu vese vari panyika, vanozotetemera. Matundhu, anozohidika. Magomokomo, anozondondomera. Muru jese, jinozowa pasi.’

21 “‘Jehovha Mambo Mukuru-kuru anoti: ‘Ndinozodaninja banga kuti rihwise Gogi mu matundhu angu ese. Mundhu umwe na umwe, anozotema hama yake ngo banga. 22 Ndinozomutonga, ndomuviisira ndhendha. Vandhu vakawanda vanozofa. Ndinozonisa nvura yakawanda, no nvura yo mapuwe, muriro no enshofre kwaari, no ku masoca ake no ku vandhu vake vazinji vanomuperekeja. 23 Inini kunasa kunanga, ndinozovonesa simba rangu. Ndinozojicenesa, ndozoita kuti ndizivike ngo vandhu vakawanda vo majinja. Ivona vanozoziva kuti inini, ndini Jehovha.’