Johani

2 Mu njiku yo citatu, kwakaitika mabuso o mucadho ku Kanaa yo Garireya. Mai wa Jesu wainga aripo. 2 Jesu no vajiji vake vakakokwavo kuti vaende ku mabuso o mucadho.

3 Vhinyu payainga yoopera, mai wa Jesu wakamuvhunja kuti: “Ivona avacina vhinyu.” 4 Asi Jesu wakadavira mai wake kuti: “Tinenyi nazvo itusu? Nguva yangu aito yakwana.” 5 Mai wake vakavhunja vaperekeri kuti: “Itanyi zvese zvaanomuvhunja.” 6 Painga no majuvi matandhatu akaithwa ngo mapuwe anodihwa kumwa mukuzwirana no mutemo jo Cijudha ngo pamusoro po kucenesa. Rimwe rainghwina maritru anokhwedera kuita makumarongomuna na marongomuna kana makumatandhatu na matandhatu. 7 Jesu wakavavhunja kuti: “Zajanyi majuvi aya ngo kumwa.” Ngo kudaro, ivona vakamazaja mbhera pa muromo. 8 Iyena wakavavhunjazve kuti: “Ceranyi padoko muende koipekeja mutungamiriri wo mabuso.” Ivona vakazviita. 9 Mutungamiriri wo mabuso wakaravira kumwa yainga yacinjwa kuti ive vhinyu. Iyena aacaizvizivepi kuti vhinyu iyi yavhepi. (Asi vaperekeri vakaceraya kumwa, vaizviziva.) Perapo wakadanija mune wo mucadho 10 womuvhunja kuti: “Vazinji vanotanga ngo kubudisa vhinyu yakanaka, asi vandhu vakambhera ngo kudhakwa vanobudisa icikanaki. Asi iwewe waviga vhinyu inonaka mbhera wari.” 11 Jesu wakaita mushamaiso wake wo kutanga mu Kanaa yo Garireya. Ngo njira iyi, iyena wakaitisa kuti simba rake rizivike. Vajiji vake vakamutenda.

12 Pa sure pazvo, iyena na mai wake, hama jake no vajiji vake, vakaenda ku dhorobha ro Kafarnaume, asi avazivi kugareyo njiku jakawanda.

13 Phasika yo Vajudha yainga yecikhwedera. Jesu wakaenda ku Jerusarema. 14 Iyena wakakhanda* vandhu vaitengesa n’gombe, mavhuta, njiva no vacinjanisi vo mare. Ivona vainga vakagara mu ndau javo mu themberi. 15 Paakapeja kuita cipembere co mapote, wakagogomera vese mu themberi, pomwe no mavhuta no n’gombe. Wakandhandhanisa mangwenjere o vacinjanisi vo mare, wovinduja meza javo. 16 Wakavhunja vaya vaitengesa njiva kuti: “Vhisanyi pano zviro izvi! Mucaita nyumba ya Baba wangu inga nyumba yo kutengeserana!” 17 Vajiji vake vakaceukija zvakatahwa kuti: “Rudo hwandinahwo no nyumba yenyu hwakaita inga muriro unobwaka mu mwoyo mwangu.”

18 Ngo kudaro, Vajudha vakamuvhunjisa kuti: “Citatijo capi caunaco cingatithembesa kuti tivone kuti iwewe unotendehwa kuita zviro izvi?” 19 Jesu wakavadavira kuti: “Phwanyanyi themberi iyi, inini ndinozoivaka ngo njiku ndhatu.” 20 Vajudha vakamuvhunjisa kuti: “Pakapera makumarongomuna o makore no makore matandhatu yecivakwa themberi iyi, asi iwewe unozoivaka ngo njiku ndhatu here?” 21 Asi iyena wainga ecinangira themberi yo muviri wake. 22 Jesu paakamuswa ko vakafa, vajiji vake vakaceukija kuti iyena waizvinanga mukuvo wese. Ivona vakatenda matahwa no zvainga zvakanangwa ndi Jesu.

23 Paainga ari ku Jerusarema, ku mutambo wo Phasika, vandhu vazinji vakatenda zina rake pavakavona mushamaiso yaainga eciita. 24 Asi Jesu aacaivathembepi ngokuti iyena wainasa kuvaziva vese. 25 Iyena aacaidepi kuti aitihwe ucapupu ngo mundhu ari wese, ngokuti waiziva zvainga zviri mu mwoyo mo vandhu.