1 Timoti
3 Masoko aya akagondeka: Kudari kuno mwanarume ari kupsaka kuva muvonereri, ari kuda basa rakanaka maningi. 2 Ngo kudaro muvonereri anodikana kuva acina caanopumbhwa, ano mukaji umwe, anojibata, ano murangariro wakanaka,* wakarongeka, anoashira varendo, anokwanisa kujijisa, 3 aadikani kumwisa maningi doro, aadikani kukhuvaza,* asi ngaave anozwisisa, acikaiti mapope, acikadi maningi mare, 4 anodikana kutungamirira ushoni mbhuri yake, ave no vana vanozwira no nderemejo yese 5 (ngokuti kudari mwanarume acikakwanisi kutungamirira mbhuri yake, angazongwaririsa kudini ungano ya Mwari?) 6 Aadikani kuva mundhu wavha kutendeuka wari, kuti atame kujitutumaja ngo kujikuja no kutama kuwira mu kutongwa kwakaezana no kwa Dhiyabhu. 7 Sure kwazvo, anodikanavo kunangihwa zvakanaka ngo* vokunja, kuti atame kureruswa* no kuwira mu murau wa Dhiyabhu.
8 Vabeseri vo ungano vanodikanavo kuva vakareremera, vanovereketa ciro cimwe,* avadikani kumwisa maningi doro, avadikani kuda kuwana ciro ngo njira yakashata, 9 vanodikana kubatisisa cakafisika ca Mwari* co rutendo no hana yakacena.
10 Ngavatange ngo kuvoniwa kukwanisa kwavo; sure kwazvo, vakavoniwa kuti apana cavanopomehwa, ngavaite vabeseri vo ungano.
11 Vanakaji vanodikanavo kuva vakareremera, vacikarevi* vamweni, vanojibata, vakagondeka mu zvese.
12 Vabeseri vo ungano ngavave majimwamuna ano mukaji umwe basi, vanotungamirira ushoni vana vavo no mbhuri yavo kamare. 13 Ngokuti vanarume vanoshandira ushoni, vari kujipsangira zina rakanaka no kubhuya vacingathyi ngo pamusoro po kutenda Kristu Jesu.
14 Ndinokutarira zviro izvi, pikija ndeciimira kuti ndinoviyeyo mbai-mbai, 15 asi kudari ndikanonoka, iwewe unonga weciziva kuti ungava no mufambiro wapi mu mbhuri ya Mwari, iri ungano ya Mwari anopona, inobesera no kujivirira cokwadi. 16 Zvokadi, zviri pambhene kuti cakafisika ca Mwari* co kujipira kwaari, cakakura maningi: ‘Iyena wakavonesa ngo kunyama, wakatokoteswa kuva mururami ku mujimu, wakagumira ngirozi, wakatokoteswa ku majinja, wakarehwa mu nyika, wakaashihwa mugore ngo rukujo.’