Varoma
16 Ndinomuzivisa ngo pamusoro po hambzaji yedu Febhe, anoshandira ku ungano iri mu Kenkreya. 2 Muashirenyi ushoni ngo zina ra Mambo mu njira inofanera kuashihwa vandhu va Mwari, mo mubesera ngo zviro zvese zvaangada, ngokuti iyena wakajivirira vakawanda kubatanijavo na inini.
3 Gumisanyi mucungamijo wangu kuna Priska na Akira vashandi doni vangu mu basa ra Kristu Jesu. 4 Ivona vakadira upenyu hwavo pa ngozi ngo ndava yangu. Andinipi ndega ndinovabonga, asi no ungano jese jo vandhu vo majinja jiri kutobongavo. 5 Tambisanyizve ungano iri pamuzi pavo. Tambisanyi hama inodiwa Epeneto, wakatanga kuva muteveri wa Kristu mu Aziya. 6 Tambisanyi Mariya wakamushandiraya ngo simba. 7 Tambisanyi Androniko na Jhuniya ukama wangu no vasungwi doni vangu vanonasa kuzivika ku vapostori, vanotevera Kristu ko mukuvo wakareba kupinda inini.
8 Gumisanyi mucungamijo wangu ka Ampiriyato shamwari yangu inodiwa mukuzwirana na Mambo. 9 Tambisanyi Urbhano mushandi doni wedu mu basa ra Kristu na Sitaki shamwari yangu inodiwa. 10 Tambisanyi Apere wakagondeka mu basa ra Kristu. Tambisanyi vari pa muzi wa Aristobhuro. 11 Tambisanyi Erodhiyano ukama hwangu. Tambisanyi vatendi va Mambo vari pamuzi pa Narsizo. 12 Tambisanyi Trifena na Trifoza, vanakaji vari kushanda ngo simba mu basa ra Mambo. Tambisanyi Persidhe hambzaji yedu inodiwa ngokuti ari kushanda ngo simba mu basa ra Mambo. 13 Tambisanyi Rufu wakasanwa mu basa ra Mambo na make, vari mai wanguvo. 14 Tambisanyi Asinkrito, Fregoni, Herme, Patrobha, Herma no hama jiri pamwepo na ivona. 15 Tambisanyi Firorogo na Jhuriya, Nereu no hambzaji yake, Orimpiya no vandhu va Mwari vese vari pamwepo na ivona. 16 Cungamijananyi ngocenyu ngo mwoyo wese.* Ungano jese ja Kristu jiri kumutambisa.
17 Hama, ndiri kumungwaja ku vandhu vaya vanobara kuparajana no kukhugunya rutendo hwo vamweni, veciita zvinosiyana no zvamakajijiswa. Imwimwi garanyi ndhambo no vandhu vakadaro. 18 Vandhu ava asipi vashandiri va Kristu Mambo wedu, asi ivona vanoshandira zvido zvavo.* Ivona vanocengeja vandhu ngo kubhuya masoko anodakaja no anobata kumeso, vocengeja mwoyo jo vandhu vanonga vacina uzivi. 19 Kuzwira kwenyu kwazivika ngo vandhu vese, ngo ndava yazvo, ndinodakara maningi ndimwi. Asi ndinoda kuti muve vazivi pa zviro zvakanaka, asi mucikaiti zviro zvakashata. 20 Mwari anopa runyararo, sambiri pano, anozocangaja Sathana pasi po soka jenyu. Unyasha hucikaezaniswi hwa Mambo wedu Jesu ngahuve na imwimwi.
21 Timoti mushandi doni wangu ari kumutambisa, Rusiyo, Jasoni, Sosipatro ukama hwangu, vari kumutambisavo.
22 Inini Tersiyo, ndatarari karata iyi, ndiri kumutambisa mu zina ra Mambo.
23 Gayo mune wo nyumba yandiri wari, ari kumutambisa pamwepo no ungano yese, iri kumucungamija. Erasto muvigi wo mare yo dhorobha, ari kumutambisa. Munukuna wake, Kwarto, ari kumutambisavo. 24 *—-—
25 Mwari angamuita kuti muve makavanga mukuzwirana no masoko akanaka andiri kutokotesari no kucumaira ngo pamusoro pa Jesu Kristu, mukuzwirana no kutatijwa ko cakafisika ca Mwari. Cakafisika ici cainga cakavigika ko mukuvo wakareba. 26 Asi wari cakhombijwa pambhene no kuzivisa majinja ese ngo Matahwa o ciporofeti mukuzwirana no kuda ka Mwari acina magumo. Izvi zvaizoita kuti vandhu vazwire ngo rutendo. 27 Mwari umwe ega ano uzivi, ngaakujwe ngo ndava ya Jesu Kristu mbhera narini. Ameni.