Nduyo

28 Nguva jese, inini ndinodaninja imwimwi Jehovha Buwe rangu;

Ndizwenyivo.

Ngokuti mukatama kundidavira,

Inini ndinozogara inga vaya vanoenda mu gomba.

 2 Izwanyi mukumbiro jangu jo kudeketera jandinoita ndecikumbira besero

Pandinomusa nyara jangu ku ndau yenyu yo mukati yo nyumba yenyu yakacena.

 3 Mucandibatanija pamwepo no vashati, na vaya vanoita zviro zvakashata,

Vaya vanobhuya masoko o runyararo no vadoni vavo kuveni mu mwoyo mwavo makazara ngo zviro zvakashata.

 4 Vahwirijirenyi mukuzwirana no zviito zvavo,

Mukuzwirana no zviro zvakashata zvavakaita.

Vahwirijirenyi mukuzwirana no mabasa o nyara javo,

Mukuzwirana no zviro zvavakaita.

 5 Ngokuti ivona avazwisisi mabasa a Jehovha,

Nee zviro zvaakaita ngo nyara jake.

 6 Ngaasimbhwe Jehovha,

Ngokuti wakazwa mukumbiro wangu wokudeketera wandakaita ndecikumbira besero.

 7 Jehovha isimba rangu no muvhiko wangu;

Mwoyo wangu unothemba iyena.

Iyena wakandibesa, mwoyo wangu wodakara,

Ngo kudaro, inini ndinozomusimba ngo ndumbo yangu.

 8 Jehovha isimba ro vandhu vake;

Iyena ndi ndau yakavanga inoviisa ruponeso hwakakura ku wokuzojwa wake.