Isaya
6 Mu gore raakafa Mambo Uziya, ndakavona Jehovha akagara pa cigaro co umambo cakakhwira no kureba. Kumbhiri ko nguvo yake kwaizaja themberi. 2 Panyezuru pake painga pakaima Maserafi, rimwe nga rimwe rainga no mambau* matandhatu. Rimwe na rimwe raifukija kumeso kwaro ngo mambau maviri, rofukija murenje jaro ngo mambau maviri no kumburuka ngo mambau maviri.
3 Iwona aidaninjirana kudari:
“Mucena, mucena, mucena ndi Jehovha wo hondo.
Nyika yese yakazara ngo rukujo hwake.”
4 Zvikotamo zvo musuvo zvakatetemera ngo maizwi aidaninjira, nyumba yakazara ngo usi.
5 Tevere ndakati: “Ndino nyathwa inini!
Kunasa kunanga, ndatofa,
Inini ndiri mushaishi, ndinobhuya zviro zvakashata
Ndinogara pakati po vandhu vanobhuya zviro zvakashata
Majiso angu akavona Mambo kamare, Jehovha wo hondo!”
6 Ngo kudaro, rimwe ro Maserafi rakamburuka roviya kwandiri. Mu nyara maro mainga no simbe rorainga rakatora pa artari ngo cibato.* 7 Irona rakapsasa muromo wangu rondivhuja kudari:
“Vonai! Ici capsasa muromo wako.
Kuposa kwako kwavhiswa,
Cishaishi cako capfujuhwa.”
8 Kusarepo, ndakazwa izwi ra Jehovha recinanga kudari: “Ndingatuma ani? Ndiyani anozotiendera?” Inini ndakadavira kudari: “Ndiri pano! Nditumenyi!”
9 Iyena wakandivhunja kuti, “Endai woovhunja vandhu ava kudari:
‘Imwimwi munozozwa no kuzwazve,
Asi amuzozwisisi;
Imwimwi munozovona no kuvonazve,
Asi amuzovi no zivo.’
10 Itai kuti mwoyo yo vandhu ava itame kupurukira,
Fungai njeve javo
Fungai majiso avo,
Kuti vatame kuvona ngo majiso
Nee kuzwa ngo njeve,
Kuti mwoyo yavo itame kuzwisisa
Kuti vatame kutendeuka, voraphwa.”
11 Inini ndakavhunjisa kudari: “Jehovha, mbhera rini?” Iyena wakandidavira kudari:
“Mbhera madhorobha aphwanyike-phwanyike oita mathere, otama no mundhu anogaremo
Nyumba jitame vagari
Nyika iyi ipere isare icina ciro;
12 Mbhera Jehovha avhise vandhu ovaendesa ndhambo,
Kuparajwa ko nyika iyi kova kwakakura maningi.
13 Asi kunozosara vandhu vashoma, vanozopiswazve inga muti mukuru. Inga muti wo mutondo wokuti pasure po kutemwa, panosara ciki. Ciki rondhoro rinozova mubarihwana wo vakacena.”