1 Vatesaronika

5 Wari hama, ngo pamusoro po mukuvo wakagajwa, aticadikani kumutarirazve ciri cese. 2 Imwimwi munonasa kuziva kuti njiku ya Jehovha* inoviya no usiku inga mbavha. 3 Vandhu pavanozonanga kuti: “Wari tiri kugara mu runyararo ticina ngozi iri yese,” pondhopo kamare kuparajwa kwavo kunozoguma ngo civhumbu, inga kuhwajihwa kwaanoita mwanakaji ano mimba, ivona avazokwanisi kuzoponeswa. 4 Asi imwimwi hama amuripi mu cidima kuti njiku iyi imugumire inga mbavha. 5 Imwimwi muri vana vo ruvheneko no vana vo masikati. Itusu atiripi vana vo usiku nee atiripi vana vo cidima.

6 Ngo kudaro, ticavata inga zvinoita vamweni, asi ngatigare takamuka tecirinda. 7 Ngokuti vese vanovata, vanovata no usiku, no vese vanodhakwa, vanodhakwa no usiku. 8 Kwatiri itusu tiri wari vana vo masikati, ngatigare takarinda, takasimira muthavo wo rutendo no rudo, takasimira vetero yo ruponeso inga kapaseti 9 ngokuti Mwari aazivi kutisana kuti tiitihwe ushungu, asi wakatisana kuti tiponeswe ngo pamusoro pa Mambo wedu Jesu Kristu. 10 Iyena wakatifira, kuti pikija tiri penye kana kuti takavata, tirarame pamwepo na iyena. 11 Garanyi mecivangisana no kubesana ngocenyu, inga zvamuri kuitari wari.

12 Tiri kumukumbira imwimwi hama, kuti mureremeje vaya vanoshanda ngo simba pakati penyu, vecimutungamirira mu kuzwirana na Mambo, pomwe no kumupangira; 13 nasanyi kuvareremeja mu rudo ngo ndava yo basa ravo. Ivanyi no runyararo ngocenyu. 14 Ngo divi rimweni hama, itusu tinomuvhunja kudari, pangiranyi vandhu vacikazwiri mupango, nyarajanyi vandhu vakavora mwoyo, beseranyi vandhu vakaremba, ivanyi vanosengerera ku vandhu vese. 15 Bhasopanyi kuti mutame kuhwirijira zvakashata ngo zvakashata, mukuvo wese psakanyi zviro zvakanaka ku vandhu vamweni, mecizviitiravo vandhu vese.

16 Dakaranyi mukuvo wese. 17 Garanyi meciita mukumbiro mukuvo wese. 18 Bonganyi ngo zviro zvese. Izvi ndizvona zvinoda Mwari muna Kristu Jesu. 19 Mucajima muriro wo mujimu mucena. 20 Mucashora uporofeti. 21 Ivanyi muno cokwadi pa zviro zvese; batisisanyi zviro zvakanaka. 22 Mucaita mushovo wese wo zviro zvakashata.

23 Mwari wo runyararo ngaanase kumucenesa. Hama, mujimu wenyu, upenyu hwenyu, muviri wenyu, ngazvirambe zvicina ndava mu mativi ese mbhera pa njiku yo kuviya ka Mambo wedu Jesu Kristu. 24 Imwimwi muri kudanijwa ngo mundhu wakagondeka, iyena anozozviita.

25 Hama, tiitirenyivo mukumbiro.

26 Tambisanyi hama jese ngo mwoyo wese.*

27 Ndiri kumudeketerera ngo zina ra Mambo kuti muverenge karata iyi ku hama jese.

28 Unyasha hucikaezaniswi hwa Mambo wedu Jesu Kristu, ngahuve na imwimwi.