Isaya
60 “Mukai iwewe mwanakaji, siyai ruvheneko hwako huvheneke ngokuti ruvheneko hwako hwaguma.
Rukujo hwa Jehovha huri kukuvhenekera.
2 Vonai! Cidima cinozofukija nyika
Makwiti akasvipa anozofukija majinja;
Asi Jehovha anozomonikira kwauri,
Kukujwa kwake kunozovoneka kwauri.
3 Majinja anozoviya ku ruvheneko hwako
Majimambo anozoviya ku ruvheneko hwo kueja kwako.
4 Musai majiso usote mativi ese!
Ivona vese vaunganijwa; vari kuviya kwauri.
Vana vako vorume vari kuguma vecivha ndhambo,
Vana vako vokaji vari kuviiswa vakabatwa mu nyara.
5 Pa mukuvo wondhowo, iwewe unozozvivona wozodakara,
Mwoyo wako unozotamba maningi ngo mudakaro,
Ngokuti upfumi hwo mujombe unozoviiswa kwauri;
Upfumi hwo majinja unozoguma kwauri.
6 Mutungwa wo makamera unozofukija nyika yako,
Makamera madoko orume o Midhiyani no Efa.
Vese vaya vanovha ku Shebha vanozoguma;
Vakathwara goridhi no mafuta anonuhira.
Ivona vanozozivisa kukujwa kwa Jehovha.
7 Mushambi yese yo Kadhari inozounganijihwa iwewe.
Mavhuta ese o Nebhaiyoti anozokushandira.
Anozopihwa pa artari yangu ozotendehwa,
Inini ndinozosejesa nyumba yangu inokujwa.
8 Ndiyani avo vari kumburukari inga makore,
Inga njiva jiri kumburuka jecienda mu nyumba yajo?
9 Zvirundu zvinozondivetera;
Piketi jo Tarishishi jinonga jiri kumbeji,
Kuti jiviise vana vako kuvha ndhambo,
Pamwepo no sirivha no goridhi ravo,
Ku zina ra Jehovha Mwari wako, Mucena wo Vaiziraeri,
Ngokuti iyena anozoita kuti ukujwe.
10 Vonyikanja vanozovaka mupfimbiji jako,
Majimambo avo anozokushandira,
Ndakakutaka ndakanyangajwa,
Ndinozokuitira usizi ngo kuda kwangu.
11 Musuvo jako jinozogara jakashama mukuvo wese;
Ajizofungwi comasikati nee cousiku,
Kuti unghwine upfumi hwo majinja,
Majimambo avo ndivona vanozozvitungamirira.
12 Ngokuti jinja no umambo zvicikazokushandiri, zvinozopejwa,
Majinja anozopejwa mukuperera.
13 Rukujo hwo Rebhanoni unozoguma kwauri,
Pamwepo no muti wo mujunipa, muti wo mufresho,* no muti wo musipireste,
Kuti isejese ndau yo nyumba yangu yakacena;
Inini ndinozokuja ndau yo soka jangu.
14 Vana vo vandhu vaya vakakubzinyirira, vanozoviya vokotama pamberi pako;
Vese vacikakureremeji vanozogwadama pa soka jako,
Ivona vanozokudaninja kuti dhorobha ra Jehovha,
Ziyoni Rakacena ro Iziraeri.
15 Kunja kokusiiwa no kunyenywa, pacina anopinda pakati pako,
Inini ndinozokuita ciro cinokujwa mbhera narini,
Ndozokuita ciro cinodakajisa ku mubarihwana no mubarihwana.
16 Iwewe unozomwa mukaka* wo majinja,
Ozomwa mazamu o majimambo;
Zvokadi, unozoziva kuti inini Jehovha, ndini Muponesi wako,
Wiya ano Simba wa Jakobe, ndiyena Musujunuri wako.
17 Pa ndau yo utare, ndinozoviisa goridhi,
Pa ndau yo simbi, ndinozoviisa sirivha,
Pa ndau yo tabwa, ndinozoviisa utare,
Pa ndau yo mapuwe, ndozoviisa simbi;
Ndinozogaja runyararo inga vavonereri vako
Ururami inga vatungamiriri vako.
18 Ugevenga auzozikizve mu nyika yako
Kana kukhuvaza no kuparaja mukati mo ndharaundha yo mugano yako.
Iwewe unozodaninja mupfimbiji jako kuti Ruponeso no musuvo jako kuti Rukujo.
19 Zuva arizovizve ruvheneko kwauri comasikati,
Kumonikira ko mweji akuzokuvhenekeri,
Ngokuti Jehovha anozova kwauri ruvheneko hucikaperi,
Mwari wako anozova rukujo wako.
20 Zuva arizovirizve,
Nee mweji auzoperi,
Ngokuti Jehovha kamare anozova ruvheneko hucikaperi kwauri,
Njiku jako jokucema jinonga japera.
21 Vandhu vako vese vanozova vakarurama;
Ivona vanozogara panyika kwenda no kwenda.
Ivona ithobwe randakasima,
Basa ro nyara jangu kuti inini ndisejeswe.
Inini Jehovha, ndinozozviita ngo kukasika pa nguva kwayo.”