Jakobo

1 Inini Jakobo, muranda wa Mwari no wa Mambo Jesu Kristu, ndiri kutambisa gumi na maviri o mavhumbo akaparajana mu ndau jakasiyana-siyana.

2 Hama jangu, munodikana kudakara maningi pamunosongana no muejo jakasiyana-siyana, 3 ngokuti munozviziva kuti, kuejwa ko rutendo hwenyu kunobara kucungirira. 4 Asi kucungirira ngakukwanirise basa rako, kuti muve makakwana, mucina ndava mu mativi ese, mucina cakaposeka.

5 Kudari pano mundhu acina uzivi pakati penyu, ngaaenderere mberi ecikumbira kuna Mwari, iyena anozomupa uzivi hwakawanda ngo mwoyo wese acikamuvereketeri, anozohupuwa kamare. 6 Asi ngaaenderere mberi ecikumbira no rutendo acingakakaniji, ngokuti wiya anokakanija wakaezana no vimbi ro mujombe rinopepeswa ngo mbhepo. 7 Mundhu wakadaro aadikani kuimira kuashira ciri cese cinovha kuna Jehovha;* 8 iyena anokana-kana, maitiro ake anocinja-cinja mukuvo wese.

9 Hama iri murombo ngaidakare* ngo kukujwa kwayo, 10 mukhupuki ngaadakare* ngo kuwana ndau yakaderera, ngokuti upenyu hwake hwakaita inga maruva o mubani anovoma, iyena anozofa. 11 Ngokuti zuva rinobuda ropisa, muti wovoma, maruva awo anombhwera no kuseja* kwawo kunopera. Ndizvona zvondhozvo zvinoitikavo no mukhupuki, ngokuti anozoperavo no upfumi hwake.

12 Anodakara nga wiya anoenderera mberi ecicungirira ngokuti paanoejwa, anozoashira junguja ro upenyu rakagondeswa ndi Jehovha* kuna vaya vanoenderera mberi vecimuda. 13 Wiya ari kuejwa, aadikani kunanga kuti: “Ndiri kuejwa ndi Mwari.” Ngokuti Mwari aaejwi ngo zvakashata nee iyena aaeji ari wese ngo zvakashata. 14 Asi umwe nga umwe anoejwa ngo kuemura kwake, perapo wotohwa mwoyo ngo cido cake. 15 Cido cikakura, cinobara cishaishi; cishaishi cikaithwa, cinobara rufu.

16 Mucacengejwa hama jangu jinodiwa. 17 Cipo cese cakanaka no cipo cese cakakwana, cinovha kudenga kuna Baba vo ruvheneko hwo mugore, vacikacinji inga munvuriri. 18 Ngo kuda kwavo ivona vecishandisa soko ro cokwadi, takabahwa kuti tive vokutanga kusanwa pakati po zvisikwa zvavo.

19 Hama jangu jinodiwa, zivanyi izvi kuti: Mundhu wese anodikana kukasika kuzwa, wononoka kuvereketa no kunonoka kunyangajwa, 20 ngokuti ushungu hwo mundhu, ahuviisi ururami hwa Mwari. 21 Asi vhisanyi svina yese no zviro zvese zvakashata. Ngo kupfava kwese, ashiranyi soko rakasimwa mwamuri, rinokwanisa kumuponesa.

22 Ivanyi vandhu vanoita zvinonanga soko, asi mucaita vanozwa basi, mecijicengeja ngo murangariro wokunyepa. 23 Kudari mundhu akava muzwi wo soko acikaiti zvarinonanga, wakaezana no mundhu anosota mumeso make pa supeya. 24 Ngokuti iyena anojivona, perapo wopinda kakukanganwa zvaari. 25 Wiya anonasa kusotesesa mutemo wakakwana wo rusununguko, woenderera mberi eciutevera, anozova muiti wo basa, haiwa muzwi wo soko anokanganwa ngo kukasika; iyena anozodakara ngo zvese zvaanoita.

26 Kudari mundhu ecirangarira kuti anonamata Mwari, asi acikangwariri rurumi hwake, ari kujicengeja ngo mu mwoyo, ngo kudaro, manamatiro ake aashandi ciro. 27 Kunamata kwakacena no kucina vara pa mavonero a Mwari na Baba wedu nga uku: kukorondha ndherera no noni jiri pa matambujiko ajo no kugara takaparajana no njira jicikazivi kucena jo nyika ino.