Jakobo
2 Hama jangu, mungaitisa kudini kuti pasure po kutenda Mambo wedu anokujwa Jesu Kristu, munokuja vamweni no kurerusa vandhu vamweni? 2 Asi kudari mundhu ano mbhete yo goridhi no nguvo jakaseja maningi akanghwina pa musongano wenyu, perepo wonghwinavo murombo ano nguvo jakasvipa. 3 Imwimwi munodakarira mundhu wakasimira nguvo jakaseja maningi momuvhunja kuti: “Garai ngaapa, pa ndau yakanaka,” movhunja murombo kuti: “Garai wakaima,” kana “Garai pasi, panotambararira soka jangu”? 4 Kudari meciita kudaro, amuripi kukhetana meciva vatongi vanotema zvivaringo zvakashata pakati penyu here?
5 Izwanyi hama jangu jinodiwa. Mwari aazivi kusana varombo mu mavonero o nyika, kuti vave vakapfuma mu rutendo no kugara utaka Umambo hwaakagondesa ku vandhu vanomuda? 6 Asi imwimwi amureremeji murombo. Asipi vakhupuki vanomubzinyiriraya no kumuendesa ku banje ro kutongera ndava? 7 Andivopi vanotuka zina rakanaka romunodanijwa ndirona here? 8 Kudari meciteveja mutemo wa mambo mukuzwirana no matahwa anoti: “Idai mudoni wako ngo manera aunojida ndiwona,” muri kuita ushoni. 9 Asi kudari mukaenderera mberi mecikhetana, muri kuita cishaishi; munotongwa ngo mutemo inga vashaishi.
10 Ngokuti mundhu anoteveja Mutemo wese, asi woposa ciro cimwe, anova mushaishi wo Mutemo wese. 11 Ngokuti mutemo wakanangaya kuti, “Ucaita upombo,” wakanangazve kuti: “Ucauraya.” Kudari ucikaiti upombo asi unouraya, unoita mushaishi wo mutemo. 12 Vereketanyi no kuita inga vandhu vanozotongwa ngo mutemo wo vandhu vakasujunuka.* 13 Wiya acikaiti usizi, anozotongwa acikaitihwi usizi. Usizi hunonyisa pa kutongwa.
14 Hama jangu, zvinobeserenyi kudari mundhu akananga kuti ano rutendo, asi acina mabasa? Rutendo hwakadaro ahungamuponesi, andizvopi? 15 Kudari hama kana hambzaji icina zvokusimira* no zvokuha zvinokwana pa njiku, 16 umwe wenyu woivhunja kuti: “Zvese ngazvimufambire ushoni; jiihwanyi mecibusa kondhoyo,” asi motama kuipa zvainoda kuti ipone, zvinobeserenyi? 17 Ndizvona zvondhozvo, rutendo hukatama mabasa, hwakafa.
18 Ari wese anozoti: “Iwewe uno rutendo, asi inini ndino mabasa. Waro nditatijei rutendo hwako hucina mabasa, inini ndinozokutatijavo rutendo hwangu ngo mabasa angu.” 19 Iwewe unotenda kuti kuna Mwari umwe, andizvopi? Uri kuita zvakanaka. Asi madhimoni anotenda no kutetemera. 20 Iwe mundhu acina hwiru! Unoda kuvona kuti rutendo hucina mabasa ahushandi? 21 Baba wedu Abhirahama, avazivi kudanijwa kuti mururami, pasure po kupira Izaki mwana wavo pa artari?* 22 Vonai kuti rutendo hwa Abhirahama hwaishanda pamwepo no mabasa. Rutendo hwake hwainga hwakaperera ngo mabasa ake, 23 okwanirisika matahwa anoti: “Abhirahama wakatenda Jehovha,* wonangwa kuti mururami,” iyena wakadanijwa kuti shamwari ya Jehovha.
24 Vonanyi kuti mundhu anonangwa mururami ngo mabasa, kuciripi ngo rutendo basi. 25 Ngo maitiro ondhowo, hure Rahabhi, aazivivo kunangwa kuti mururami ngo mabasa, pasure po kuashira ushoni ndhumwa no kujipindisa ngo gwanja rimweni? 26 Zvokadi, kudari inga muviri ucina simba ro upenyu wakafa, rutendo hucinavo mabasa, hwakafavo.