Jobe
36 Eriyuu wakaendererazve mberi eciti:
2 “Amboveterai padoko wecisengerera pandinonga ndecidurujira,
Ngokuti ndino zvakawanda zvokuvereketa kuti ndiinikire Mwari.
3 Ndinozovereketa zvese zvandinoziva,
Ndinozonanga kuti ururami ngo hwa Mwari wakandisika.
4 Zvokadi masoko angu asipi o kunyepa;
Mwari wiya ano uzivi hwakakwana, ari pano;
Pamberi pako kamare!
5 Zvokadi Mwari ano simba, aanyenyi mundhu;
Iyena ano uzivi hwakakura.
6 Aazosii vakashata vecirarama,*
Asi anozonasa kutonga vandhu vari kutambujika
7 Aareesi meso ake kuno vakanaka;
Iyena anoita kuti vagare no vatongi,
Ivona vanozokhwijirijwa mbhera narini
8 Asi kudari vakasungwa ngo njinga*
Vobathwa ngo murau* wo matambujiko,
9 Iyena anovatatija zvavakaita,
Zvishaishi, zvakavepo ngo ndava yo kujikuja kwavo.
10 Anofunungura njeve javo kuti avapangire
Wovavhunja kuti vasiye kuita zviro zvakashata.
11 Kudari vakamuzwira no kumushandira,
Vanozopeja njiku javo vecibudirira,
Makore avo anozova anodakajisa.
12 Kudari vakatama kuzwira, vanozourawa ngo banga*
Vanozofa vacina uzivi.
13 Vano mwoyo wakashata, vanoviga bundu.
Avakumbiri besero pikija paanovasunga.
14 Ivona vanofa vaciri majaha,
Vanoreja-reja* upenyu pakati po mahure o muthemberi.
15 Asi Mwari anoponesa vanotambujika pavanonga vecitambujwa,
Anofunungura njeve javo pavanonga vecibzinyirihwa.*
Iwewe unozonyarajwa ngo zvokuha zvakawanda zvaunozopuwa pameza yako.
17 Ngo kudaro, unozodakara ngo kutongwa ko vandhu vakashata.
Kutongwa pakunonga kweciithwa, ururami hwoenderera mberi huripo.
18 Ngwarirai kuti ushungu utame kukuita kuti uite zviro ngo hasha.
Ucatendera kupauswa ngo pamusoro po kufidhihwa.
19 Kunanga kuti kukumbira kwako besero
No kuvangisira kwako, kunozokuponesa pa matambujiko?
20 Ucadisisa kuti usiku ugume,
Vandhu pavanofa ngo civhumbu.
21 Ucakheta kuita zviro zvakashata,
Ngo kuramba kucungirira matambujiko.
22 Zivai kuti Mwari ano kujwa ngo simba rake.
Mujijisi wapi wakaezana na iyena?
23 Ndiyani wakamutatija* gwanja
Kana kuti, ndiyani wakamuvhunja kuti, ‘Zvawakaitaro zvakashata’?
24 Ucakanganwa kusimba zviro zvaanoita,
Zviro zvinoimbhwa ngo vandhu.
25 Vandhu vese vanozvivona.
Nee mundhuvo hake anokwanisa kuzvivona ngo ndhambo.
26 Makurire akaita Mwari, atinasi kumazwisisa.
Nee kuwanda ko makore ake,
Atikwanisi kumarangarira mu musoro mwedu.
27 Iyena anokhwija madondhojwe o kumwa;
Buruvusi* rinobatana kuti riite nvura;
28 Ngo kudaro, makore anoidurura;
yonira vandhu vese.
29 Kureva kuti aripo anozwisisa kuparajanika kunoita makore?
Kana kuzwisisa mbheni jinobuda mu tende yake?
30 Vonai marazvire aanoita* pamberi pawo!
Iyena anozaja jombe ngo kumwa.
31 Ngo zviro izvi, iyena anosapota vandhu;
Wovapekeja zvokuha zvakawanda.
32 Iyena anoviga mbheni munyara jake,
Woiyendesa kwaanonga ecida kuti ivaje.*
33 Mbheni yake inomuzivisa,
Pikija no zvifuyo zvinozivisa kuti ndiyani ari kuviyaro.*