Vahebheru

6 Ngo kudaro, wari tasiyari sure jijiso jo kutanga ngo pamusoro pa Kristu, ngatienderere mberi tecikura, ticikadirizve maambo mapsa, akadari inga o kukhauya ku mabasa o kufa no o kutenda Mwari, 2 kujijisa ngo pamusoro po rubhabhatijo no kucanjikira nyara, kumuswa ko vakafa no kutongwa kucikaperi. 3 Izvi tinozozviita, kudari Mwari akatendera.

4 Ngo pamusoro pa vaya vakajekesehwa, voravira cipo co mahara co kuvha kudenga no kuashira mujimu mucena, 5 vakaravira soko ra Mwari no simba ro nyika* inozoviya, 6 asi vakapauka. Azvikwanisiki kuti vakhauyezve ngokuti vakakohomera Mwana wa Mwari pa mutanda, perapo vomupseruja pambhene. 7 Mavhu anokomborehwa ndi Mwari paanobijwa ngo nvura inonaya mukuvo wese, perapo obara mucero kuna vaya vanoarima. 8 Kudari mavhu akamera muzwa no sora rinobaya, anorambhwa. Iwona anonga aaphedo no kutukwa. Asi pa kupejisira anopiswa.

9 Asi ngo pamusoro penyu hama jinodiwa, tinokhohwa kuti munozoitihwa zviro zvakanaka ngo pamusoro po ruponeso, pikija tecibhuya ngo njira iyi. 10 Ngokuti Mwari asipi mundhu acizivi kururama kuti akanganwe basa renyu no rudo hwamakakhombija ku zina rake, ngo kushandira vakasanwa no kuenderera mberi mecivashandira. 11 Asi tinoda kuti umwe na umwe wenyu atatije kuvangisira kwakadaro kuti munase kuva no cokwadi co vetero, mbhera kumagumo, 12 kuti mutame kuva no nungo,* asi mutevejere vaya vanogara utaka ku zviro zvakagondeswa ngo rutendo no kusengerera.

13 Mwari paakaita cigondiso kuna Abhirahama, zvecivoneka kuti akuna zina guru raaizokujwa ndirona, iyena wakapika ngo zina rake pacake, 14 eciti: “Inini ndinozokukomborera kamare ndozowanja mubarihwana wako.” 15 Ngo kudaro, Abhirahama paakasengerera, wakawana cigondiso ici. 16 Ngokuti vandhu vanopika ngo mundhu mukuru. Mbhiko yavo inopeja mapope ese. Ngokuti iyona inoita cigondiso co pamutemo kwavari. 17 Munjira yakafanana, Mwari paakada kujekesa pambhene ku vagari vo utaka hwo cigondiso, kuti cigondiso cake acicinji, wakaita mbhiko. 18 Zviro zviviri izvi zvakaithwari ndi Mwari* azvicinji, ngokuti iyena aanyepi. Zviro zviviri izvi zvinovangisa itusu takatizirari kuna Mwari kuti tibatisise vetero iri pambeji pedu. 19 Vetero iyi yakadari inga nanga yo upenyu hwedu, yakacijikira no kuvanga, iyona inonghwina mukati mo jira, 20 umo muna Jesu, mundhu wakatanga kunghwinemo ecitiimirira, wova mupiri mukuru inga ndi Merekizedheki mbhera narini.