Outubro

Imwimwi makanasiririka kuti muzwire? Mambo Dhavhidhi, waivona kudaro. Ndiyo ndava wakaita mukumbiro kuna Mwari eciti: ‘Itanyi kuti ndive no cido co kumuzwira.’ (Nduy. 51:12) Dhavhidhi waida Jehovha. Pikija zvakadaro, zvainesa maningi kwaari kuti amuzwire. Ndizvona zvinoitikavo na itusu. Ngenyi? Cokutanga, tiri vandhu vacizivi kukwana nokutizve takabahwa no cido cokutama kuzwira. Cocipiri, Sathana ari kuita zvese zvaanokwanisa kuti tipandukire Jehovha, inga zvaakaita. (2 Vak. 11:3) Cocitatu, ngokuti takatendenejwa ngo vandhu vanoda kuita zvakashata, “mujimu uri kushanda mu vana vacikazwiri.” (Vaef. 2:2) Tinodikana kuvangisira maningi kuti tinyise cido cokuda kuita zvakashata no kuhwisana no kuvangirijwa kwatiri kuithwa ndi Sathana no nyika ino kuti titame kuzwira. Tinodikanazve kuvangisira kuti tizwire Jehovha na vayani vanotungamirira. w23.10 6 ¶1

Ngozvapi zvatinojija ngo mushamaiso wa Jesu wo kucinja kumwa kuita vhinyu? Tinojija kuti tinodikana kuva vandhu vanojidodokesa. Jesu aazivi kujikuja ngo mushamaiso waakaitari nee aazivi kumbojikuja pamushamaiso jese jaakaita. Mukusiyana, ngo kujidodokesa kwese kuphinda no kuphinda iyena aazivi kumbojikuja, waindopa rukujo Baba wake. (Joh. 5:​19, 30; 8:28) Kudari tikatevejera Jesu ngo kuva anojidodokesa, atizogumi pakujikuja ngo ndava yo zviro zvatinonga taita. Asi tinojikuja ngo ndava yo makomborero atinawo o kumushandira. (Jer. 9:​23, 24) Tinodikana kupekeja iyena rukujo hunomufanera. Zvokadi apana cotaizokwanisa kuita ticina besero ra Jehovha. (1 Vak. 1:​26-31) Patinova vanojidodokesa atizovi vandhu vanojikuja ngo zviro zvatinonga taita kuitira kubesera vandhu vamweni. (Ezanisanyi na Mateu 6:​2-4; Vahe. 13:16) Zvokadi kamare tinodakajisa Jehovha patinotevejera Jesu ngo kuva vandhu vanojidodokesa.—1 Ped. 5:6. w23.04 4 ¶9; 5 ¶11-12

Mupostori Pauro wakafemehwa kuti avangise Makristu kuti asotesese zvinodiwa ngo vamweni. Tingashandisa kudini mbhangiro iyi musongano paunonga weciithwa? Ngo kuceukija kuti vamweni vanodavo kupa mupinguro inga itusu. Amborangariranyi izvi basi. Pamunonga mecibhuya no shamwari jenyu, imwimwi maizobhuya maningi zvoita kuti ivona vave no mukana mushoma jo kubhuya? Zvokadi kamare haiwa. Munoda kuti ivona vabhuyevo. Mukufananavo, pa musongano tinoda kuti vandhu vakawanda vape mupinguro javo. Kunasa kunanga, njira imwe yakanakisisa maningi yo kuvangisa hama no hambzaji jedu ngo yo kuvapa mukana wo kuvonesa rutendo hwavo ngo kupa mupinguro. (1 Vak. 10:24) Asi ngo kuita kuti mupinguro jedu jive jakafupika, izvo zvinoita kuti vamweni vawane mukana wo kupavo mupinguro. Pikija mukapa mupinguro wakafupika, mucadokwakwatija mafundo akawanda. Kudari mukakwakwatija zvese zvinonangwa pa ndimeyo, vamweni avazowani cokunanga. w23.04 22-23 ¶11-13

Itusu tinodikana kuceukija kuti zvinosisira maningi kuenderera mberi tecibesera vamweni maningi-ningi kuita basa ro kucumaera. Patinonga tiri mu basa ro kucumaera tinodikana kuita cinjo mukuzwirana no mugarirowo. Patinonga tiri mu basa ro kucumaera tinosongana no vandhu vanovha ku ndau jakasiyana, vano zvirovejeso zvakasiyana no vano mavonero akasiyana-siyana ngo pamusoro pa Mwari. Mupostori Pauro wakakwanisa kuzwiranisa upenyu hwake no cinjo jaiitika, tingakwanisavo kutevejera muezaniso wake. Jesu wakagaja Pauro kuti ave “mupostori wo majinja.” (Varo. 11:13) Pauro wakacumaera Vajudha, Vagiriki, vandhu vakajija maningi, vacizivi kujija maningi, vatongi no majimambo. Kuti abaye mwoyo jo vandhu vese, Pauro wakaita “zviro zvese ku vandhu vo mushovo wese.” (1 Vak. 9:​19-22) Pauro waireremeja zvirovejeso zvo vandhu no kwavaivha, perapo woita cinjo kuti azwirane no mugarirowo. Itusu tingakwanisa kuitisa nane mu basa rokucumaera, kudari tikareremeja mavonero o vandhu nokuita cinjo mukuzwirana no mugarirowo. w23.07 23 ¶11-12

Kuva mundhu wakapfava azvirevi kuti makaremba. Mugariro uwu kazinji unowanika no vandhu vakavanga. Munodikana kuva mundhu wakapfava kuti mukwanise kuva makagajana pamunonga mecisongana no mugariro unonesa. Kupfava i “mucero yo mujimu.” (Vaga. 5:​22, 23) Gama ro kuti “kupfava” ku Cigiriki rainangira zvaiithwa ngo haci yo musora yainga yakasungwa ngo monga. Payaipera kusungwa ngo monga yaigara yakapfava. Asi yaienderera mberi yakavanga. Waro tingaitisa kudini kuti tive takapfava pa mukuvo umwewo tova takavanga? Atingakwanisi kuita izvi tega. Tinodikana kuita mukumbiro kuna Jehovha tecikumbira mujimu wake kuti utibesere kusakurira mugariro uwu unosisira. Kuno muezaniso jakawanda jinovonesa kuti zvinokwanisika kuva mundhu wakapfava. Hama no hambzaji jakawanda jakakwanisa kwenderera mberi jakapfava pajaishohwa.—2 Tim. 2:​24, 25. w23.09 15 ¶3

Mu civoniso caakava naco, mupostori Johani wakavona vakuru vanokwana kuita 24 kudenga vecinamata Jehovha. Ivona vaikuja Mwari veciziva kuti iyena waifanera “kureremejwa, kukujwa no kuva no simba.” (Apok. 4:​10, 11) Ngirozi jakagondeka jino mathangwe akawanda anojiita kuti jide kureremeja no kukuja Jehovha. Ijona jiri kudenga na iyena ngo kudaro jinonasa kumuziva. Ijona jinokwanisa kuvona mugariro jake jaushoni kuvha pa zviya zvaanoita. Pajinovona manera Jehovha anoita zviro, jinogumira pa kumukuja. (Job. 38:​4-7) Itusu tinodavo kukuja Jehovha mu mukumbiro jedu, tecikhombija kuti tinomuda no kumureremeja. Pamunonga meciverenga no kujija Bhaibheri, ejanyi kuvona mugariro ja Jehovha jamunodakarira maningi. (Job. 37:23; Varo. 11:33) Perapo vhunjanyi Jehovha manera munojizwa ngo pamusoro po mugariro jondhojo. Cimwenizve, tingakuja Jehovha ngo manera aanotibesera no manera aanobesera mbhuri yedu yo kumujimu.—1 Sam. 2:​1, 2. w23.05 3-4 ¶6-7

Mu gore ra 1919, Bhabhironiya Guru arizivi kukwanisazve kungwarira vandhu va Mwari. Mu gore rondhoro, “muranda wakagondeka no wakangwara,” wakatanga kuashira vaya vainga no mwoyo yaushoni kuti vafambe mu “Gwanja Rakacena.” (Mat. 24:​45-47; Isa. 35:8) Basa rainga rakaithwa ngo vandhu mu nguva yo kare “ro kunasirira gwanja” rakabesera vaya vakatanga ku fambemo kuti vajijire zvizinji ngo pamusoro pa Jehovha no zvidisiso zvake. (Maz. 4:18) Vese vaizodikana kupona mukuzwirana no zvinodiwa ndi Jehovha. Jehovha aacaivetera kuti vandhu vake vaite cinjo jese jaidikana pa mukuvo wondhowo. Kusiyapo zvondhozvo, Jehovha anobesera vandhu vake kuti vacinje padoko ngo padoko. Tinozodakara maningi kudari tikaita zvese zvatinokwanisa kuti tidakajise Jehovha. Gwanja rese kuti rirambe riri ushoni rinodikana kundonasirihwa. Kuvhira mu gore ra 1919, basa rokunasirira “Gwanja Rakaceneswa” riri kuenderera mberi no cinangwa co kuti vandhu vakawanda vabude mu Bhabhironiya Guru. w23.05 17 ¶15; 19 ¶16

Vo Mukhumbi Unotonga vanovangisira maningi kuti varoveje vabeseri vazinji vo Komisau yo Mukhumbi Unotonga. Vabeseri ava vaano basa kutangira wari nokutizve vakanasiririka kuti vaenderere mberi no basa rokutaja mavhuta a Kristu. Vokuzojwa vokupejisira pavanozoenda kudenga phedo no kumbhiri ko dambujiko guru, vanamati va Jehovha vanozoenderera mberi vecimunamata no vakagondeka. Ngo besero ra Mambo wedu Jesu Kristu itusu atizosiyi kunamata Jehovha. I zvokadi kuti pamukuvo uwu tinozohwiswa ndi Gogi wo Magogi kubatana ko majinja. (Ezek. 38:​18-20) Kuhwiswa uku kunozova ko nguva doko nee akuzobudiriri. Akuzoitisi kuti vanamati va Jehovha vatame kumunamata. Jehovha no cokwadi cese anozotiponesa. Mu civoniso caakavoneswa mupostori Johani wakavona “vandhu vakawanda” vo mavhuta amweni a Kristu. Johani wainga eciziva kuti “vandhu vakawanda” vainga vecivha ku “dambujiko guru.” (Apok. 7:​9, 14) Pacina kukana-kana Jehovha anozotiponesa. w24.02 5-6 ¶13-14

Ngozvapi zvatinodikana kuita kuti tiashire mujimu mucena? Tingaita mukumbiro tecikumbira mujimu mucena, kujija Soko ra Mwari no kubatana pamwepo no sangano rake rinotungamirihwa ngo mujimu mucena. Kuita izvi kunozotibesera kuti tisakurire “mucero yo mujimu.” (Vaga. 5:​22, 23) Mwari anopa mujimu wake basi kuna vaya vano murangariro yakacena no mufambiro wakacena. Iyena aazoendereri mberi ecitipa mujimu mucena kudari tikarangarira zviro zvakashata no kuita mukuzwirana nazvo. (1 Vat. 4:​7, 8) Kuti tienderere mberi teciashira mujimu mucena atidikanivo ‘kushora uporofeti.’ (1 Vat. 5:20) “Uporofeti,” apa uri kunangira masoko anofemehwa ngo mujimu mucena wa Mwari kubatanijavo njiku ya Jehovha no kukasika ko njiku jedu jino. Itusu atirangariri kuti njiku ya Jehovha kana kuti Armagedhoni aizoviyi patinonga tecipona. Kusiyapo zvondhozvo, tinokhombija kuti tinoda kuti iviye ngo kukasika ngo kugara tecirangarira no kubatikana ‘pakuita mabasa okujipira o umwari’ no kuva no mufambiro wakacena.—2 Ped. 3:​11, 12. w23.06 12 ¶13-14

Inga Makristu ngozvapi zvatinodikana kuita kudari mu terefoni mwedu mukabuda zviro zvinokhombija zvoumitu-mitu? Tinodikana kuzvivhisa ngo kukasika. Ngenyi tinodikana kuita izvi? Ngokuti tinoguma pa kubesereka kudari tikaceukija kuti ciro cinosisira maningi mu upenyu hwedu i ushamwari hwedu na Jehovha. Pikija zviro zvimweni zvicikakhombiji zvoumitu-mitu, zvingatoita kuti tive no cido co kuita zvo vatano. Cimwenizve, atidi kurangarira nee ciricese haco cinotiita kuti tirangarire kuita zvo vatano. (Mat. 5:​28, 29) Mukuru umweni anogara ku Tairandiya anozwi Dhavhidhi, wakati: “Ndinojivhunjisa kuti: ‘Pikija zvirozvo azvikhombiji zvoumitu-mitu, Jehovha anozodakara kudari ndikaenderera mberi ndecizvivona?’ Kurangarijisisa uku kwakandibesera kuti ndiite zviro ngo ungwaru.” Kuthya kuita ciricese cinoita kuti Jehovha anyangajwe, zvinozotibesera kuti tiite zviro ngo ungwaru. Kuthya Mwari i “cinyuke co uzivi.” w23.06 23 ¶12-13

“Nyumba” iri kunangwari, inganangira ungano jese. Pa mukuvo wo dambujiko guru tinozojivirihwa ndi Jehovha patinonga takaungana no hama no hambzaji jedu. Ngo kudaro, tinodikana kushanda ngo simba wari kusiyapo basi kuti ticijikire zvinoithwa ngo hama no hambzaji jedu, asi kuti tivakhombijire rudo. Kupona kwedu kunozofira pa kuita zvondhozvo. “Njiku huru ya Jehovha” inozova inonesa maningi kuno vandhu vese. (Sof. 1:​14, 15) Vandhu va Jehovha vanozosonganavo no zvineso. Asi kudari tikajinasirira wari, tinozokwanisa kuva vandhu vakagajana no vanokwanisa kubesera vamweni. Tinozokwanisa kucungirira zvineso zviri zvese zvatinozosongana nazvo. Hama no hambzaji jedu pajinotambujika, tinozoita zvese zvatinokwanisa kuti tivabesere ngo kuvakhombijira pena no kuvapa zvavanoda. Kudari tikajijira kuda hama no hambzaji jedu wari, tinozokwanisa kukhombija kuti tinojida kumbejiyo. Jehovha anozotikomborera ngo kutipa upenyu ucikaperi mu nyika icina ngozi no zvineso.—Isa. 65:17. w23.07 7 ¶16-17

Soko ra Mwari kazinji rinosanangura vandhu vakagondeka inga vandhu vano simba rakavanga maningi. Asi vamweni vavo avacaijizwepi inga vakavanga maningi mukuwo wese. Inga muezaniso, pamukuvo jimweni Mambo Dhavhidhi waijizwa akavanga inga “matundhu” asi pamukuvo jimweni waijizwa ‘ecithimwa-thimwa.’ (Nduy. 30:7) Pikija Samusoni wainga no simba rakavanga maningi raakapuwa ngo mujimu mucena wa Mwari, iyena wainasa kuziva kuti pakatama kuva no besero ra Mwari “waizova acikana simba kudari inga vandhu vamweni.” (Vato. 14:​5, 6; 16:17) Vanarume vakagondeka vainga vakavanga basi ngokuti Jehovha wainga akavapa simba. Mupostori Pauro waizviziva kuti waida simba raivha kuna Jehovha. (2 Vak. 12:​9, 10) Iyena wakahwisana no zvineso zvo uhomi. (Vaga. 4:​13, 14) Pa mukuvo umweni, iyena waiitavo zvese zvaaikwanisa kuti aite zviro zvakanaka. (Varo. 7:​18, 19) Nguva jimweni iyena waithimwa-thimwa no kuthya zviro zvaizomuitikira. (2 Vak. 1:​8, 9) Pamukuvo wokuti mupostori Pauro waijizwa akaremba, iyena waijizwa ano simba rakavanga maningi. Kuitisa kudini? Jehovha wakamupekeja simba raaida. Iyena wakamuvangisa. w23.10 12 ¶1-2

Kudari mukuvo umweni tiri kuhwisana no mazwiro acizivi kunaka, tinodikana kuceukija kuti Jehovha kamare ndiyena wakatikwevera kwaari. (Joh. 6:44) Jehovha anovona zvaushoni kwatiri, zvokuti atikwanisi kuzvivona pacedu, nokutizve iyena anoziva mwoyo jedu. (2 Kro. 6:30) Ngo kudaro, tingamuthemba paya paanotivhunja kuti itusu tinosisira. (1 Joh. 3:​19, 20) Ticito tajija cokwadi, vazinji vedu takaita zviro zvokuti nyamasi uno tingatoguma pakujipekeja ndava ngo pamusoro pazvo. (1 Ped. 4:3) Vamweni vari kushandira Jehovha vakagondeka, vaciri kutohwisanavo no kurembejeka. Imwimwivo keni, kazinji munojizwa inga kuti Jehovha aangamuregereri? Kudari zvakadaro, zivanyi kuti vashandiri vamweni vakagondeka va Jehovha vatori kuhwisanavo no mazwiro akaezana no enyu. Inga muezaniso, mupostori Pauro paairangarijisisa ngokutama kukwana kwake iyena wakajizwa acina mudakaro. (Varo. 7:24) Zvakajeka kuti Pauro wainga akhauya, pikija zvakadaro, iyena waijivona ‘ari mudoko ku vapostori vese’ no kujivona ‘ari mushaishi kupinda vese.’—1 Vak. 15:9; 1 Tim. 1:15. w24.03 27 ¶5-6

Ciro cimwe catingajija ngo civaringo cakatemwa ndi Mambo Jehoashi ngo cokuti tinodikana kusana shamwari jaushoni, jinoda Jehovha no kuda kumudakajisa. Atidikani kusana basi shamwari jo mupira wedu. Ceukijanyi kuti Jehoashi wainga mujaha maningi kupinda shamwari yake Jehoyadha. Ngo kudaro, sotanyi shamwari jamunajo perapo mojivhunjisa kudari: ‘Ijona jinondibesera kuti ndivangise rutendo hwangu kuna Jehovha? Ijona jiri kundivangisa kuti ndipone mukuzwirana no ndhungamiriro ja Jehovha? Ijona jinobhuya ngo pamusoro pa Jehovha no zvokadi zvinosisira zvaanotijijisa? Ijona jinoreremeja ndhungamiriro ja Jehovha? Ijona jino cicunge cokundipangira pazvinodikana weya?’ (Maz. 27:​5, 6, 17) Kunasa kunanga, kudari shamwari jenyu ajidi Jehovha imwimwi amudikani kushamwarijana najo. Asi kudari imwimwi muno shamwari jinoda Jehovha, endereranyi mberi mecishamwarijana najo, ijona jinozomubesera maningi.—Maz. 13:20. w23.09 9-10 ¶6-7

Mu abhesedhari yo Vagiriki, arfa ndi retra yokutanga omega ndi retra yokupejisira. Tecishandisa matahwa okuti “Arfa na Omega,” Jehovha anonga ecikhombija kuti zvaanotangisa anozozviita mukuperera. Jehovha pakupera kusika Adhamu na Evha, iyena wakati “Barananyi muwande, muzaje nyika no kuitonga.” (Gen. 1:28) Pamukuvo wondhowo, Jehovha wakati: “Arfa.” Iyena wakanasa kujekesa cidisiso cake paakati: Waizoguma mukuvo wokuti mubarihwana wakakwana wa Adhamu na Evha vaizozaja nyika no kuicinja yova Paradhiso. Pamukuvo wo zvinozoitika izvi, Jehovha anonga ananga kuti “Omega.” Jehovha paakapera kusika “pasi pano no zvese zvirimo” iyena wakatipa cigondiso co kuti Jehovha anozokwanirisa cidisiso cake kuno vandhu no nyika pa njiku yocinomwe.—Gen. 2:​1-3. w23.11 5 ¶13-14

Hwendo unonesa wo kuvha ku Bhabhironiya kwenda ku Iziraeri kangaije waizopeja mweji murongomuna, asi Jehovha wakagondesa kuti waizopeja zviphingo zviri zvese zvavaizosongana nazvo. Kuno Vajudha vainga vakagondeka, kuhwirira ku Iziraeri zvainga zvaushoni kupinda zvese zvavaizosiya. Makomborero makuru avainga nawozve aibatanija kunamata Jehovha. Mu Bhabhironiya amuicaingavo no themberi ya Jehovha. Mu Bhabhironiya akucaingepi no dandiro kuti Vaiziraeri vapire mupiro javo inga zvainangwa pa Mutemo wa Mosi, akucaingepi no mupiri wainasiririka kuti ivona vapire mupirojo. Cimwenizve, kwainga no vandhu vakawanda maningi vainamata zvimwari zvo kunyepa kupinda vandhu vaireremeja mutemo ja Jehovha. Ngo kudaro, zviuru zvo Vajudha vaidaya Jehovha vakahwirira ku Iziraeri ku nyika yavakabarihwa, kwiya kwavaizomusijira kunamata kwakacena. w23.05 14-15 ¶3-4

Itusu tinoda besero ro mujimu mucena wa Mwari kuti tikwanise ‘kwenderera mberi tecifamba inga vana vo ruvheneko.’ Ngenyi? Ngokuti zvinonesa maningi kwenderera mberi takacena mu nyika ino icizivi kucena. (1 Vat. 4:​3-5, 7, 8) Mujimu mucena unozotibesera kuti tihwisane no murangariro wo vandhu vo mu nyika vacikavoni zviro ngo manera aanovona Jehovha. Iwona unozotibeserazve kuti tive no “mushovo wese wo zviro zvakanaka, zvakarurama.” (Vaef. 5:9) Njira imwe yokuashira mujimu mucena ngoyokuita mukumbiro teciukumbira. Jesu wakananga kuti Jehovha “anozopekejavo mujimu mucena kuna vaya vanovakumbira.” (Ruk. 11:13) Patinonga tecinamata Jehovha pamwepo kumusongano jo Cikristu tinoashiravo mujimu mucena. (Vaef. 5:​19, 20) Mujimu mucena wa Mwari unotibesera ngo njira yaushoni, zvotiita kuti tipone mu njira inodakajisa Jehovha. w24.03 23-24 ¶13-15

Munodikana kuita mukumbiro kuti muve mundhu anosengerera. Kusengerera imucero wo mujimu mucena. (Vaga. 5:​22, 23) Ngo kudaro, tingakumbira mujimu mucena no kukumbirazve kuti Jehovha atibesere kusakurira mugariro uwu. Kudari tiri pa mugariro unoeja kusengerera kwedu, tinodikana ‘kwenderera mberi tecikumbira’ mujimu mucena kuti utibesere pa kuva vandhu vanosengerera. (Ruk. 11:13) Tingakumbirazve Jehovha kuti atibesere kuvona zviro manera iyena anozvivona. Patinopera kuita mukumbiro, tinodikana kuita zvese zvatinokwanisa kuti tive vandhu vanosengerera pa njiku imwe nga imwe. Patinoenderera mberi tecikumbira kuti tive vandhu vanosengerera no kuvangisira pakuzviita, mugariro uwu unozobara muji mu mwoyo mwedu wogumira pa kuva divi ro undhu hwedu. Tinozobeserekavo ngo kurangarijisisa ngo muezaniso jo mu Bhaibheri. Bhaibheri rino muezaniso jakawanda maningi jo vandhu vakasengerera. Ngo kurangarijisisa ngo muezaniso iji, tingajija njira jakawanda jo kukhombija mugariro uwu. w23.08 22 ¶10-11

Jesu wakagondesa mupostori Pedhru kuti Jehovha waizomubesera. Pakupera kumuswa kwake, Jesu wakaita kuti Pedhru no vapostori vamweni vabate hove ngo mushamaiso. (Joh. 21:​4-6) Mushamaiso uwu wakavonesa kuna Pedhru kuti Jehovha waizomupa zvese zvaaida ku divi ro kunyama. Kangaije Pedhru wakatoceukija magama a Jesu okuzobesera vaya ‘vanotanga kupsaka Umambo.’ (Mat. 6:33) Izvi zvakaita kuti Pedhru adire Umambo hwa Mwari pakutanga kusiyapo basa rake ro kutanda. Iyena wakava no cicunge co kucumaera pa njiku yo Pentekoste yo gore ra 33 Kristu Aviya, wobesera zviuru zvo vandhu kuti vatendere masoko akanaka. (Maba. 2:​14, 37-41) Pa kufamba ko nguva, wakabesera vagari vo Samariya no Makristu amweni ainga acikaripi o Cijudha kuti vave vateveri va Kristu. (Maba. 8:​14-17; 10:​44-48) Pacina kukana-kana, Jehovha wakashandisa Pedhru mu njira inoshamaisa kuti aviise vandhu vo mushovo jakasiyana-siyana mu ungano. w23.09 20 ¶1; 23 ¶11

Papera makore maviri Vabhabhironiya novaparaja Jerusarema. Mambo Nebhukadhinezari wo Bhabhironiya, wakarota ngo pamusoro po cithombi cakakura. Iyena wakasunga kuuraya vazivi vese kubatanijavo na Dhanyeri, kudari vakakonehwa kumuvhunja zvaaingari arota no kusanangura revo yazvo. (Dhan. 2:​3-5) Dhanyeri wakaita ciri cese ngo kukasika. Kudari naacizivi kuita izvi vandhu vazinji vaizofa. Iyena “wakaenda kuna mambo, womukumbira kuti amupe mukuvo kuti akwanise kumuvhunja revo yo hope jaakarota.” (Dhan. 2:16) Kuti iyena aite izvi, waidikana kuva no cicunge pomwe no rutendo. Mu Bhaibheri amuna ndau yatinovona kuti Dhanyeri wainga wakambodurujira hope kareko. Iyena wakakumbira shamwari jake, “vaite mukumbiro kuna Mwari wo kudenga kuti avaitire usizi ngo pamusoro po cakafisika ici.” (Dhan. 2:18) Jehovha wakadavira mukumbiro iji. Ngo besero ra Jehovha, Dhanyeri wakakwanisa kudurujira hope ja Nebhukadhinezari. Iyena wakakwanisa kuponesa upenyu hwake no upenyu hwo shamwari jake. w23.08 3 ¶4

Vonanyi muviyo jinovepo ngo kuva kwenyu mundhu anosengerera. Patinova vandhu vanosengerera, itusu tinodakara no kugajana. Kusengerera kunotibeserazve kuti tive no uhomi hwaushoni. Patinova vandhu vanosengerera, tinova no shamwari jaushoni. Ungano yedu inova yakabatana. Kudari ari wese akatishora, tinozononoka kunyangajwa no kuita kuti zviro zvitame kunyanyisa. (Nduy. 37:8; Maz. 14:29) Cinosisira maningi pa zvese, tinonga tecitevejera Baba wedu vo kudenga, togumira pa kuva no ushamwari wo phedo navo. Pacina kukana-kana, kusengerera imugariro unodakajisa maningi unobesera itusu tese. Pikija azvizivi kureruka mukuvo wese kuva vandhu vanosengerera, ngo besero ra Jehovha tinozokwanisa kwenderera mberi tecikhombija mugariro uwu. Cimwenizve, patinonga tecivetera no kusengerera kwese nyika imbza yakagondeswa, tingathemba kuti “jiso ra Tenji Mwari riri panyezuru pa vaya vanomuthya, panyezuru pa vaya vanovetera rudo hwake.” (Nduy. 33:18) Tese ngatiteme civaringo co kwenderera mberi tecitatijirana kusengerera. w23.08 22 ¶7; 25 ¶16-17

Jakobo wakavona kuti mwanarume wiya wainanga kuti wainga no rutendo asi zvaainga eciita zvainga zvicikavonesi zvaainangaro. (Jako. 2:​1-5, 9) Jakobo wakabhuya ngo ari wese wakavona imwe hama kana hambzaji icina zvo kusimira nee zvo kuha asi aazivi kumupekeja ciri cese. Pikija wakakhombija kuti wainga no rutendo asi zviito zvake azvicaivonesa kuti iyena wainga no rutendo. (Jako. 2:​14-16) Jakobo wakananga kuti Rahabhi imuezaniso wakanaka wo mundhu wakakhombija rutendo ngo mabasa. (Jako. 2:​25, 26) Rahabhi wakazwa ngo pamusoro pa Jehovha nokutizve waizviziva kuti waibesera Vaiziraeri. (Josh. 2:​9-11) Kuperapo wakatatija rutendo hwake ngo mabasa ngo kuviga vafei vaviri vo Iziraeri vainga vari pa ngozi yo kuraiwa. Ngo kudaro, mwanakaji uwu acikazivi kukwana waingari acikaripi mu Iziraeri, wakavoniwa inga mururami kudari inga Abhirahama wakavoniwavo inga mururami. Ngo kudaro, muezaniso wa Rahabhi unotibesera kuvona kuti rutendo hwedu unodikana kucijikira pa mabasa. w23.12 5-6 ¶12-13

Inga Makristu, itusu atidi kuzwisisa zviro zvicikanesi basi zvo mu Bhaibheri. Ngo besero ro mujimu mucena wa Mwari itusu tinoda kujija “zviro zvakajika zva Mwari.” (1 Vak. 2:​9, 10) Munovona kudini ngokuita urongwa wo kuita jijo yo mundhu ega kuti mukwanise kukhwedera phedo na Jehovha? Inga muezaniso, tinodikana kupsakisisa kuti tivone kuti Jehovha wakakhombijisa kudini rudo kuno vashandiri vake vokare no kuvona kuti zvinomukhohwesa kudini kuti Mwari anomudavo. Mungapsakisisazve kuti muvone kuti kunamata Jehovha mu nguva yo kare kwainga kwakarongeswa kudini no kuvona kuti imwimwi munganamatisavo kudini Jehovha nyamasi uno. Mungapsakisisazve kuti Jesu wakakwanirisa kudini zviporofita paainga pasi pano. Imwimwi mungashandisa bhuku Índice das Publicaçao da Torre de Vigia no Bhuku Rokupsakisisa ro Zvapupu zva Jehovha, kuti munase kupsakisisa. Munozovona kuti kushandisa mabhuku aya kuti muite jijo yenyu yo mundhu ega zvinozomubesera kuti mudakajihwe. Kujija Bhaibheri kunozomubesera kuti muve no rutendo hwakavanga mogumira ‘pakuziva Mwari.’—Maz. 2:​4, 5. w23.10 18-19 ¶3-5

Gama rakashandiswa ndi mupostori Pedhru rokuti “maningi,” rikasandujwa rinoreva kuti “kunda-ndamuka.” Pa divi rocipiri ro vhesi rinosanangura revo yo gama rokuti disananyi maningi. Rudo hunofukija zvishaishi zvo hama jedu. Ngatiti tabata rudo hwedu kudari inga tesidhu inonda-ndamuka, tounda-ndamura haiwa kamwe nee kaviri asi tinounda-ndamura kamare mbhera ukwanise kufukija “zvishaishi zvakawanda.” Pamugariro uwu, kuregerera kwakadari inga “kufukija.” Inga tesidhu inofukija nguvo yakamweka, mu njira yakaezana, rudo hwedu unokwanisa kufukija kurembejeka no kutama kukwana ko hama jedu. Rudo hwedu unodikana kuva wakavanga wogumira pakufukija kutama kukwana ko hama jedu pikija paya pazvinonesa. (Vako. 3:13) Patinoregerera vamweni tinokhombija kuti rudo hwedu hwakavanga no kuda kudakajisa Jehovha. w23.11 11-12 ¶13-15

Mambo Josiya paainga no makore anokwana kuita 26, wakatanga kunajirira themberi. Ndipona pakawanika “bhuku ro Mupango wa Tenji Mwari, wakapuwa ndi Mosi.” Mambo paakazwa zvainga zvakatahwa mu bhuku iri ngo kukasika wakaita cinjo kuti aite zvaingaro zvakatahwa mondhomo. (2 Kro. 34:​14, 19-21) Imwimwi munoverenga Bhaibheri njiku jese? Kudari munoverenga, kureva kuti zviri kubudirira? Munoanja kutarira vhesi nganani jingazomubesera? Josiya paainga no makore anokwana kuita 39, iyena wakatema civaringo cakadira upenyu hwake pa ngozi. Kusiyapo kuthemba ndhungamiriro ja Jehovha, iyena wakajithemba pacake. (2 Kro. 35:​20-25) Tinojija zviri zvese ngo zvaakaitari. Azvinenyi dangani taavasharuka kana taano makore akawanda tecishandira Jehovha, nguva jese tinodikana kwenderera mberi tecipsaka ndhungamiriro ja Jehovha. Kuti tikwanise kuita izvi tinodikana kuita mukumbiro nguva jese, tecipsaka ndhungamiriro no kupsaka besero ku hama jakaivha kudivi ro umwari. Tikaita izvi atizogumiri pa kuita cishaishi cikuru. Cimwenizve, tinozova no mudakaro.—Jako. 1:25. w23.09 12 ¶15-16

Bhaibheri rinobhuya ngo ndava yo vanakaji vakada Jehovha no kumushandira. Ivona “vaijibata” no kuva “vakagondeka mu zvese.” (1 Tim. 3:11) Nyamasi uno mu ungano muno hambzaji jakura, jakaivha ku divi ro ku umwari jingatevejehwavo ngo hambzaji jiri vasikane. Hambzaji jiri vasikane jinovonavo kudini kutevejera hambzaji jakura jakaivha kudivi ro umwari? Sotesesanyi mugariro javanajo perapo rangariranyi kuti mungatevejeresa kudini mugariro iji. Mugariro unosisira maningi ku Makristu ndi kujidodokesa. Kudari mwanakaji akajidodokesa anozova no ushamwari hwaushoni na Jehovha pamwepo no vamweni. Inga muezaniso, mwanakaji anoda Jehovha no anozvidodokesa anobesera nasiriro yakaita Jehovha yokuti mwanarume ndiyena musoro wo mbhuri. (1 Vak. 11:3) Ndhungamiriro iyi inonanga kuti Jehovha wakasana vanarume kuti vataje mbhuri no ungano. w23.12 18-19 ¶3-5

Jehovha anoda kuti mwamuna ade mukaji wake, no kumutaja ku divi ro kunyama, mu mazwiro no kudivi ro kumujimu. Zvinobatanija kurangarira, kureremeja mukaji wake no kuva mundhu anothembeka. Kuita izvi zvinozomubesera kuti muve mwamuna waushoni. Pamunopera kucadha zvingaita kuti munozova baba. Waro ngozvapi zvamungajija kuvha kuna Jehovha ngo pamusoro po kuva baba waushoni? (Vaef. 6:4) Jehovha wainga acina nyowa yo kubhuya no mwana wake Jesu kuti waimuda maningi no kumutendera. (Mat. 3:17) Kudari mukazova baba, mucakanganwa kuvhunja mwana wenyu kuti munomuda. Nguva jese mwana wenyu paanoita zvakanaka, muvangisenyi. Majibaba anotevejera muezaniso wa Jehovha, vangabeseravo vana vavo kuti vavevo Makristu akaivha. Imwimwi mungava makanasiririka kuti muve baba vaushoni ngo kutaja ushoni mbhuri yenyu no kutaja hama no hambzaji jo mu ungano, no kuvavhunja kuti munovada no kuvareremeja.—Joh. 15:9. w23.12 28-29 ¶17-18

Pikija kuti itusu tiri vashandiri vakagondeka va Jehovha tinosonganavo no zvineso zvo uhomi inga vandhu vamweni. Kusiyapo izvo, tinohwisanazve no kuteverehwa nga vaya vanozonda vandhu va Mwari. Jehovha aaiti kuti zviro izvi zvitame kutiitikira asi iyena anogondesa kutibesera mukuvo wese. (Isa. 41:10) Tecibesehwa ndiyena itusu tingava no mudakaro, totema zvivaringo zvaushoni no kwenderera mberi takagondeka kwaari pikija pa mukuvo wo kunesa. Jehovha anogondesa kuti anozotipa zvinonangwaya ngo Bhaibheri kuti: “Runyararo hwa Mwari.” (Vafi. 4:​6, 7) Runyararo uhu unowanika basi nga vaya vano ushamwari na iyena. Runyararo uhu “hunopinda kurangarira kwese,” iwona uno simba maningi kupinda zvatinorangarira. Imwimwi makambojizwa kurerukihwa pasure pokuita mukumbiro wokudeketera kuna Jehovha? Kudari ndizvona imwimwi makazwa “runyararo hwa Mwari.” w24.01 20 ¶2; 21 ¶4

Rudo wa Mwari unondundira vandhu vakagondeka kuti vakuje zina rake ngo mwoyo wese. Mambo Dhavhidhi wakazwisisa kuti kukuja zina ra Jehovha i kukujavo Jehovha. Zina ra Jehovha rinobatanija zvaanoita nokuticeukija mugariro jake jaushoni no zviro zvinoshamaisa zvaanoita. Dhavhidhi waida kukuja zina ra Babake ngokuti ivona vakacena. Iyena waida kuita izvi mu ‘zvese zvainga mukati make’ izvi zvinoreva ngo mwoyo wese. Ngo njira yakaezana, Varevhi vakatungamirira mu njira yokukuja Jehovha. Ivona nokujidodokesa kwese, vakatendera kuti magama avo narini aacaizorerusepi kukujwa ko zina ra Jehovha rakacena. (Nem. 9:5) Pacina kukana-kana, kujidodokesa uku kwakadajisa maningi mwoyo wa Jehovha. w24.02 9 ¶6

Mucarangarira kuti makaposa pamakatama kukwanirisa zvido zvamakagaja. (2 Vak. 8:12) Jijanyi ngo zvineso zvakamuitikira. Garanyi mecirangarira zviya zvamakakwanirisa. Bhaibheri rinoti: “Mwari asipi mundhu acizivi kururama kuti akanganwe basa renyu.” (Vahe. 6:10) Imwimwi mucakanganwa zvamakakwanisa kuita. Rangarijisisanyi ngo pamusoro po zvamakakwanisa kuita, zvondhozvo zvinoita kuti muve no ushamwari wakavanga na Jehovha no kuvhunja vandhu vamweni ngo pamusoro pake no kubhabhatijwa. Inga manera makakwanirisa no kubudirira zvido zvamakagaja pa mukuvo wo kare, imwimwi mungakwanisa kuenderera mberi mecibudirira pa zvido zvenyu zva wari. Ngo besero ra Jehovha mungakwanirisa zvido zvamakagaja. Kudari mukaenderera mberi mecishanda ngo simba kuti mukwanirise zvido zvamakagaja, mucakanganwa kuvona kuti Jehovha anomubesera no kumukomborera pamunonga meciita hwendo hwenyu. (2 Vak. 4:7) Kudari mukatama kuremba munozoashira makomborero akawanda.—Vag. 6:9. w23.05 31 ¶16-18

Jehovha anopsaka njira jokukhombija ndijona kuno vandhu vake kuti anovada nokutizve anodakara ngo zviro zvavanomuitira. Bhaibheri rinonanga ko vhaza mbiri jokuti Iyena wakavhunja Jesu kuti wainga Mwana wake anodiwa no anomudakajisa. (Mat. 3:17; 17:5) Imwimwi maidakarira kuzwa Jehovha ecimuvhunja kuti ari kudakara ndimwi? Jehovha aativhunji zvondhozvo tecizvizwa kamare ngo izwi rake asi anotivhunja ecishandisa Bhaibheri. Tinokwanisa kuzwa izwi rokutendehwa ndi Jehovha patinoverenga masoko a Jesu mu Mavhangeri. Jesu wairangarijisisa maningi ngo pamusoro po undhu hwa Baba wake. Ngo kudaro, patinoverenga kuti Jesu wakakhombija kutendera kwake vajiji vake vacizivi kukwana asi vakagondeka, tinokwanisavo kurangarira Jehovha ecinangavo magama ondhowo kwatiri. (Joh. 15:​9, 15) Patinosongana no muejo azvirevi kuti itusu taruza kutendehwa ndi Jehovha. Mukusiyana jinotipa mukana wokukhombija rudo hwedu hwokadi kuna Jehovha no kumuthemba kwatinoita.—Jako. 1:12. w24.03 28 ¶10-11