Jehovha “Anozomuvangisa”

1. Vashandiri va Jehovha vokare vaiwanisa kudini simba?

SOKO ra Mwari kazinji rinosanangura vandhu vakagondeka inga vandhu vano simba rakavanga maningi. Asi vamweni vavo avacaijizwepi inga vakavanga maningi mukuwo wese. Inga muezaniso, pamukuvo jimweni Mambo Dhavhidhi waijizwa akavanga inga “matundhu” asi pamukuvo jimweni waijizwa ‘ecithimwa-thimwa.’ (Nduyo 30:7) Pikija Samusoni wainga no simba rakavanga maningi raakapuwa ngo mujimu mucena wa Mwari, iyena wainasa kuziva kuti pakatama kuva no besero ra Mwari “waizova acikana simba kudari ngo vandhu vamweni.” (Vatongi 14:​5, 6; 16:17) Vanarume vakagondeka vainga vakavanga basi ngokuti Jehovha wainga akavapa simba.

2. Ngenyi Pauro wakananga kuti wainga akaremba no kutovanga pamukuvo wondhowo? (2 Vakorinte 12:​9, 10)

² Mupostori Pauro waizviziva kuti waida simba raivha kuna Jehovha. (Verenganyi 2 Vakorinte 12:​9, 10.) Inga vazinji vedu, Pauro wakahwisana no zvineso zvo uhomi. (Vagaratiya 4:​13, 14) Pa mukuvo umweni, iyena waiitavo zvese zvaaikwanisa kuti aite zviro zvakanaka. (Varoma 7:​18, 19) Nguva jimweni iyena waithimwa-thimwa no kuthya zviro zvaizomuitikira. (2 Vakorinte 1:​8, 9) Pamukuvo wokuti mupostori Pauro waijizwa akaremba, iyena waijizwa ano simba rakavanga maningi. Kuitisa kudini? Jehovha wakamupekeja simba raaida. Iyena wakamuvangisa.

3. Muvhunjo japi jatinozodavira pa jijo iyi?

³ Jehovha anotigondesa kuti anozotivangisavo. (1 Pedhru 5:10) Asi ativhiri kuvetera kuashira simba iri ticikaiti ciri cese. Inga muezaniso, motori unobesera karu kuti ienderere mberi yecifamba. Ngo kudaro, mufambisi anodikana kucika asereradhori kuti agume ku ndau yaari kudaro. Mu njira yakaezana, Jehovha wakanasiririka kuti atipekeje simba ratinoda, asi tinodikana kungwarira kuti tibesereke ndirona. Ngojapi nasiriro jakaithwa ndi Jehovha kuti ativangise? Ngozvapi zvatinodikana kuita kuti tiashire simba iri? Kuti tikwanise kuwana mupinguro wo muvhunjo iji ngatitange tavona kuti Jehovha wakabeseresa kudini vandhu vatatu ava muporofita Jona, Mariya mai wa Jesu na mupostori Pauro. Tinozovonazve kuti Jehovha ari kubeseresa kudini vashandiri vake nyamasi uno mu njira yakaezana.

KUITA MUKUMBIRO NO KUJIJA BHAIBHERI KUNOZOMUVANGISA KUTI MUCUNGIRIRE

4. Tingaitisa kudini kuti tiwane simba rinovha kuna Jehovha?

⁴ Njira imwe inozotibesera kuti tiashire simba rinovha kuna Jehovha, ngo yo kuita mukumbiro kwaari. Jehovha anozodavira mukumbiro jedu ngo kutipa “simba rinopindirija ro vandhu.” (2 Vakorinte 4:7) Cimwenizve, tinozovangiswa patinoverenga Soko rake no kurangarijisisa ngo pamusoro pazvo. (Nduyo 86:11) Soko ra Mwari Bhaibheri “rino simba.” (Vahebheru 4:12) Patinoita mukumbiro kuna Jehovha no kuverenga Soko rake, itusu tinozoashira simba kuti tikwanise kucungirira toramba takadakara no kukwanirisa mabasa aanotigaja. Vonanyi kuti Jehovha wakavangisa kudini muporofita Jona.

5. Ngenyi Jona waida simba?

⁵ Muporofita Jona waida simba. Iyena waithya kuenda kwaakatumwa ndi Jehovha. Ngo kudaro, wakanghwina mugazirini woenda ku ndau imweni. Inga muviyo, wakadoruza upenyu hwake pa zibepo guru. Ngokuita zvondhozvo, wakadira upenyu hwake pa ngozi. Paakakhandihwa mu jombe, iyena wakakanjamuka naari mu ndani mo hove huru. Munorangarira kuti Jona wakajizwa kudini? Pakutanga iyena wairangarira kuti waizofiremo, kangaije wairangarira kuti Jehovha wamuramba. Zvingaita kuti Jona waithimwa-thimwa.

6. Inga zvatirikuvona pana Jona 2:​1, 2, 7; ngozvapi zvakavangisa Jona paainga mu ndani mo hove?

⁶ Paainga ari ega mu ndani mo hove iyi, Jona wakaitenyi kuti akwanise kuwana simba? Ciro cokutanga caakaita i kuita mukumbiro. (Verenganyi Jona 2:​1, 2, 7.) Jona wainga acizivi kuzwira Jehovha, iyena wainga no cokwadi cokuti Jehovha waizopurukira mukumbiro wake wokujidodokesa no kukhauya. Cimwenizve, wakarangarira ngo Matahwa aainga akaverenga kareko. Asi tinozvizivisa kudini? Ngokuti pamukumbiro wake waakaita unowanika mu cipauko 2 co bhuku ra Jona, iyena wakashandisa magama akawanda anowanika mu bhuku ra Nduyo. (Inga muezaniso, ezanisiranyi Jona 2:​2, 5; na Nduyo 69:1; 86:7.) Zvese izvi zvinokhombija kuti Jona wainasa kuziva Matahwa. Kurangarijisisa ngo mavhesi aya pa mugariro waingari nawo, zvakamukhohwesa kamare kuti Jehovha waizomubesera. Jehovha wakaponesa Jona, pakufamba ko nguva, Jona wakava wakanasiririka kuti akwanirise basa raakagajwa.—Jona 2:10–3:4.

7-8. Ngozvapi zvakavangisa hama imweni yo ku Taiwani payaihwisana no zvineso?

⁷ Muezaniso wa Jona ungatibesera paya patinosongana no zvineso. Inga muezaniso, hama imweni inogara ku Taiwani inozwi Zhiming,b yakadikana kuhwisana no ndhendha jakawanda maningi. Kusiyapo zvondhozvo, ivona avacaitajwepi ushoni ngo ukama hwavo ngo ndava yokushandira kwavo Jehovha. Cakavabesera kuti vawane simba i kuita mukumbiro no kujija Bhaibheri. Ivona vakati: “Pandaisongana no zvineso zvaivoneka kuti azvicaperi, ndaikonehwa no simba ro kuita jijo yo mundhu ega.” Pikija no zvineso zvese izvi, hama Zhiming avazivi kuremba. Ivona vanoti: “Cokutanga candinoita i mukumbiro.” “Perepo, ndodira arikurari munjeve ndopurukira mumbo jedu jo Umambo. Nguva jimweni ndinoimba no izwi rakaterera mbhera ndonasa kugajana. Ndikapeja kuita zvese izvi ndinotanga kujija.”

⁸ Jijo yo mundhu ega yakabesera maningi hama Zhiming. Inga muezaniso, pavainga veciita nane pakupera kuizwa operasau, mufurumeri umweni wakavavhunja kuti vaidikana kudihwa ngazi ngo kuti maserura avo okupsuka ainga aderera maningi. Pausiku vacito vaithwa operasau iyi, ivona vakaverenga ngo pamusoro po hambzaji imweni yakaizwa operasau yakafanana. Maserura o hambzaji yavaingari vakaverenga ngo pamusoro payo ainga akaderera maningi kupinda avo. Pikija zvakadaro, ivona avazivi kutendera kudihwa ngazi nokutizve vakakwanisa kuita nane. Muezaniso wo hambzaji iya wakavangisa maningi hama Zhiming nokutizve vakakwanisa kwenderera mberi vakagondeka.

9. Kudari muri kusongana no mugariro unonesa ngozvapi zvamungaita? (Vonanyi foto.)

⁹ Makambosongana no cineso cakakura mokonehwa kuvhunja Jehovha zvamuri kuzwaro? Makambojizwa makaremba zvokuti amuzivi kuva no simba ro kuita jijo? Ceukijanyi kuti Jehovha anonasa kuzwisisa zvamuri kuhwisana nazvo. Pikija mukatoita mukumbiro wakareruka mungava no cokwadi cokuti Jehovha anozomupekeja zvamunodaro kamare. (Vaefeso 3:20) Kudari mukavona kuti amukwanisi kuverenga Bhaibheri, muri kujizwa makaremba kana muri kuhwaja, mungakwanisa kuzwa audhiyo jakagaravhahwi jo Bhaibheri no mabhuku edu. Cimwenizve cingabesera, ngo cokuzwa mumbo jedu no kuvona vhidhiyo jiri mu jw.org. Pamunoita mukumbiro kuna Jehovha mecipsaka mupinguro jo muvhunjo jamunajo, munonga mecitokoka Jehovha kuti amuvangise, iyena anozomuvangisadi kamare.

HAMA NO HAMBZAJI JENYU JINGAMUVANGISA

10. Hama no hambzaji jedu jingativangisa kudini?

¹⁰ Jehovha angashandisa hama no hambzaji jedu jo Cikristu kuti jitivangise. Ivona ‘vangatinyaraja maningi’ patinosongana no zvineso kana patinokonehwa kukwanirisa basa ratakagajwa. (Vakorose 4:​10, 11) Tinoda maningi besero ro shamwari maningi-ningi “pamukuvo wo bonezi.” (Mazwi Akangwara 17:17) Patinojizwa takaremba hama no hambzaji jedu jingativangisa, kutitondhoja no kutibesera kuti tienderere mberi tecishandira Jehovha. Ngativone kuti Mariya mai wa Jesu vakavangiswa kudini ngo vamweni.

11. Ngenyi Mariya waida kuvangiswa?

¹¹ Mariya waida simba kuti aite zvaidiwa ndi Jehovha. Rangariranyi kuti wakajizwa kudini pakupera kupuwa basa rinonesa maningi ngo ngirozi inozwi Gabhiriyeri. Iyena wainga acizivi kurovohwa asi waizova no mimba. Iyena wainga acizivi kumborera mwana asi waidikana kurera mwana waizova Mesiya. Zvecivoneka kuti iyena wainga acizivi kumbovata no mwanarume, waizozvisanangurisa kudini kuno uwo waizomurovora Josefa?—Ruka 1:​26-33.

12. Mukuzwirana na Ruka 1:​39-45; Mariya wakawanisa kudini simba raaida?

¹² Mariya wakawanisa kudini simba ro kukwanisa basa raakagajwa rainga rakasiyana no rinonesa maningi? Iyena wakakumbira besero ro vamweni. Inga muezaniso, iyena wakakumbira besero kuno ngirozi inozwi Gabhiriyeri kuti imuvhunje zvimweni ngo pamusoro po basero. (Ruka 1:34) No papera mukuvo mushoma, iyena wakaita hwendo kuenda ku “ndharaundha yo matundhu, ku dhorobha ro Judha,” kuti aende kovona ukama hwake Erizabheti. Hwendo uhu hwakabesera maningi. Erizabheti wakasimba Mariya nokutofemehwa kuti anange ciporofita ngo pamusoro po mwana wainga ari mu ndani ma Mariya. (Verenganyi Ruka 1:​39-45.) Mariya wakananga kuti Jehovha “watatija simba rake ngo mukono wake.” (Ruka 1:​46-51) Jehovha wakashandisa Erizabheti no ngirozi Gabhiriyeri kuitira kuvangisa Mariya.

13. Ngozvapi zvakaitika no hambzaji imweni inogara ku Bhorivhiya poyakakumbira besero hama no hambzaji?

¹³ Inga ndi Mariya, imwimwi mungakwanisavo kuwana simba ngo besero ro hama no hambzaji jenyu. Hambzaji Dhasuri vanogara ku Bhorivhiya, vaida maningi kuvangiswa. Baba wa hambzaji Dhasuri pavakavoneka kuti vano ndhendha yaizovaita kuti vagumire pakufa, hambzaji Dhasuri vakava no mutoro wo kukorondha baba wavo. (1 Timoti 5:4) Asi kuita izvi azvicainga zvakareruka mukuvo wese. Ivona vakati: “Mukuvo umweni ndaivona kuti andicaikwanisa kuenderera mberi ndeciita izvi.” Kunanga kuti ivona vakakumbira besero? Pakutanga avazivi. Ivona vanosanangura kuti, “inini andicaida kunesa hama.” Inini ndaiziva kuti ‘ndi Jehovha waizondipekeja simba randaida.’ Ndakazwisisa kuti kugara ndega zvaiita inga kuti ndiri kupsaka kutonga cinesoco ndiri ndega. (Mazwi Akangwara 18:1) Hambzaji Dhasuri vakatema civaringo co kutarira shamwari jakona kuti vavasanangurire zvineso zvavari kusongana nazvo. Ivona vanonanga kuti: “Andina magama okunanga manera hama jangu jakandibesera.” “Ivona vakandiviisira zvokuha pandainga kucipitari no nyarajo yaivha mu Bhaibheri. Izvi zvaikhombija kamare kuti inini andicainga ndiri ndega. Itusu tinoita divi ro mbhuri huru inoda kutibesera, kucema na itusu no kutivangisa.”

14. Ngenyi tinodikana kutendera besero rinovha ku vakuru?

¹⁴ Njira imweni inoshandisa Jehovha kuti ativangise i kushandisa vakuru. Ivona vakadari inga zvipo zvinovha kuna Jehovha kuti vatibesere no kuita kuti zvineso zvedu zvireruke. (Isaia 32:​1, 2) Kudari murikuthimwa-thimwa vhunjanyi vakuru zviri kumuthimwa-thimwisaro. Mucadoramba vakuru pavanomupa besero. Ecishandisa vakuru Jehovha angakwanisa kutivangisa.

VETERO YENYU YO KUMBEJI INGAMUVANGISA

15. Ngoyapi vetero ino Makristu ese?

¹⁵ Vetero yedu yakacijikira mu Bhaibheri ingativangisa. (Varoma 4:​3, 18-20) Makristu ese ano vetero inoshamaisa maningi yokupona kwenda no kwenda, azvinenyi mu Paradhiso pasi pano kana yokwenda kudenga. Vetero yedu inotivangisa patinosongana no zvineso, kuti ticumaere masoko akanaka no kukwanirisa mabasa akasiyana-siyana atinopuwa mu ungano. (1 Vatesaronika 1:3) Vetero iyi yakavangisavo mupostori Pauro.

16. Ngenyi Pauro waida kuvangiswa?

¹⁶ Pauro waida maningi kuva no simba. Pakarata yake ku vakorito iyena wakajiezanisa no mujiyo ucikanesi kuphwanyika. Iyena wainga ‘akapsinywa,’ ‘acina no mazano,’ ‘eciteverehwa,’ no ‘kunyiswa.’ Mugariro jimweni jaaisongana najo jaitodira upenyu hwake pa ngozi. (2 Vakorinte 4:​8-10) Pauro wakatara magama aya pa hwendo hwake hwocitatu paaishanda inga misiyonariyo. Iyena aacaizviziva kuti pasure po kusongana na izvi waizosongana no mugariro jimweni jinonesa. Iyena wakahwiswa ngo vandhu vakawanda, kudihwa mukadheya no kundondomera mu jombe.

17. Mukuzwirana no 2 Vakorinte 4:​16-18; zvicinyi zvaivangisa Pauro paaisongana no zvineso?

¹⁷ Pauro wakawana simba kuti akwanise kucungirira ngokuti wakabatikana pa vetero yake. (Verenganyi 2 Vakorinte 4:​16-18.) Iyena wakatovhunja vakorito kuti pikija “muviri wake wo kunja,” ukapera aacaizoremba. Pauro waibatikana maningi ngo kumbeji kwake. Vetero yake yo kupona kwenda no kwenda yainga “rukujo hukuru maningi,” ndiyo ndava wainga akanasiririka kuti asongane no zvineso zviri zvese azvo. Pauro wairangarijisisa maningi ngo vetero, inga muviyo iyena waijizwa kuva “mupsa njiku ngo njiku.”

18. Vetero iyi yakavangisa kudini hama Tihomiri no mbhuri yavo?

¹⁸ Vetero yokumbeji ndiyona iri kuvangisa hama Tihomiri vanogara ku Bhurgariya. Makore manganani akaperari hama yavo yo mujaha inodanwa Zdhravhiko yakafa ngo asidhenti. Izvi zvakaita kuti hama Tihomiri vagare vakasuruvara. Zvakabesera ivona no mbhuri yavo kuti vakwanise kucungirira, zvakava kurangarira ngo pamusoro po rumuko. Ivona vakati: “Inga muezaniso itusu tinobhuisana kuti ngokwapi kwatinozosongana naye, ngozvapi zvokuha zvatinozoha, mbhaani vatinozokoka kuti vaviye ku mabuso edu okutanga no kumuvhunja manera atakazosara tecipona mu njiku jino jokupejisira.” Hama Tihomiri vananga kuti kubatikana pa vetero iyi ndikona kuri kuvangisa mbhuri yavo kuti ikwanise kucungirira no kuvetera mukuvo wo kuti Jehovha anozomusa hama yavo.

19. Ngozvapi zvamungaita kuti muvangise vetero yenyu? (Vonanyi foto.)

¹⁹ Mungavangisa kudini vetero yenyu? Inga muezaniso, kudari vetero yenyu ngo yokupona pasi pano mu Paradhiso verenganyi ngo zviitiko zvinobhuya ngo Paradhiso no kurangarijisisa ngo pamusoro pazvo. (Isaia 25:8; 32:​16-18) Rangariranyi kuti upenyu unozova wakadini mu nyika imbza. Ejanyi kuzvivona muri kondhoyo kamare. Muri kuvona ani kondhoyo? Ngozvapi zvamuri kuzwa? Imwimwi muri kujizwa kudini? Kuti mukwanise kujivona muri mu nyika imbza, sotanyi foto jinowanika mu mabhuku edu jinovonesa Paradhiso kana vhidhiyo jo mumbo jakadari inga Nyika Imbza Iri Kuzari, Yatoguma, no Rangariranyi Mukuvowo. Patinopeja nguva tecirangarijisisa ngo pamusoro po vetero yedu yo mu nyika imbza, zvineso zvedu zvinozova zvo ‘nguva shomani no zvakareruka.’ (2 Vakorinte 4:17) Vetero yatakapuwa ndi Jehovha ndiyona inozotivangisa.

20. Pikija paya patinonga tecijizwa takaremba tingawanisa kudni simba?

²⁰ Pikija patinojizwa takaremba, ‘Mwari wedu anozotipa simba.’ (Sandujo yo Nyika Imbza, Nduyo 108:13) Jehovha anotipa zvese zvatinoda kuti tiwane simba rinovha kwaari. Kudari munoda besero kuti mukwanirise basa ramakagajwa, kunyisa zvineso zvamuri kusongana nazvo, kana kuenderera mberi muno mudakaro, itanyi mukumbiro kuna Jehovha mecimuvhunja zvese zvamuri kuzwaro no kupsaka ndhungamiriro jake ngokuita jijo yo mundhu ega. Tenderanyi besero no vangiso rinovha kuno hama no hambzaji jedu. Psakanyi nguva yokurangarijisisa manera unozova upenyu kumbejiyo. Ngo kuita kudaro imwimwi ‘munozovangiswa ngo simba rese, mukuzwirana no simba rake guru kuti munase kucungirira no kusengerera no mudakaro.’—Vakorose 1:11.