Deuteronômio

6 “Dit sin dai geboote, leis un daile wat Jehovaa, juuch God gericht hät un ordnung geewt hät dat ik juuch inlëre schul, dat jij dai horge daue wen jij na dat land gåe daue wat jij krijge. 2 Hai hät dit måkt dat’s duu, dijn kiner un dai kiner fon dijn kiner doir dai gans leewend lang angst häwe for Jehovaa, dij God, ni gefale un dai ganse geboote un leis horge wat ik dij ordnung geewe dau, dat’s duu sër lang leewe däist. 3 Höör, ach Israel un dau dai genau horge dat ales gaud gäit mit dij un jij sër feel ware in dat land wat melk un hoinig giwt, soo as Jehovaa, God fon juuch früüsch fründe juuch forspråke hät. 4 “Höör, ach Israel: Jehovaa, oos God, is bloos air Jehovaa. 5 Lijb Jehovaa, dijne God, mit dijne ganse härts, mit dijne ganse sël un mit dijne ganse kraft. 6 Dës wöör wat ik dij hüüt säg taum måken muite up dij härts sin, 7 un duu must dijn kiner dai inlëre un dårfon reere wen’s duu in dij huus sitst, un wen’s duu upe stråt gäist, un wen’s duu dij henlegst un wen’s duu upstäist. 8 Dau dai an dijn hand ranerbijne taum andenken, un dai mut soo sin as air tüügband üm dijne kop. 9 Srijw dai an dai sijrer fone doire woo dat rinergäit fon dijm huus un an dai heke fone stad.