Marcos

30 Dai apostels sin rund rümer üm Jësus bleewe un häwe ales fortelt wat sai måkt un inlërt hare. 31 Un hai hät tau eer sägt: “Daut mit mij mitkåme, up ain apart stel taum oos air bits uutrooge.” Weegen wäire feel wat ümer werer kaime, un sai hare ni måls tijd taum wat eeten. 32 Dårweegen sin ine schif weggåe tau aine apart stel, taum alaine blijwe. 33 Åwer dai lüür häwe eer saie weggåe, un feel häwe dat waiten kreege. Un lüür fon jërer stad sin dår taufaut hengåe un sin dår airer henkåme as sai. 34 Dat hai uute schif ruutergåe is, hai hät feel lüür saie un hät beduuren oiwer eer hat, weegen sai wäire soo as schåpe wat kair uppasse däir. Un hät anfånge eer feel daile inlëre. 35 Wäir al spår, sijn jüngers sin na em kåme un häwe sägt: “Dës stel is wijdaf fon ales un is al spår. 36 Schik dai lüür weg, dat sai hengåe koine upe koloni un ine klaine stads taum wat kööpe taum eeten.” 37 Hai hät tau eer sägt: “Daut jij eer wat geewe taum eeten.” Sai häwe dun frågt: “Muite wij hengåe bröör kööpe wat 200 denários koste daue un dat tau dai lüür geewe taum eeten?” 38 Hai hät sägt: “Wofeel bröör häwe jij? Gåt ais hen un kijk ais!” As sai saie häwe, häwe sai sägt: “Fijw un uk twai fisch.” 39 Un hai hät sägt soo as dai lüür schule grups måke taum sich hensete up der gruine gras. 40 Soo häwe sai sich henset up grups mit 100 un mit 50 lüür. 41 Dun hät hai dai fijw bröör un dai twai fische nåme, hät nam himel keeke un hät beert. Nåheer, hät hai dai bröör indailt un hät dat dai jüngers geewt tau dai lüür dat geewe un hät dai twai fisch indailt tau eer ale. 42 Soo, häwe sai ale geete un sin sat woore. 43 Sai häwe 12 körf ful t’hoopsamelt mit stüke bröör, un uk dai rest stüke fone fische. 44 Dai wat fon dem bröör geete häwe wäire 5.000 kërls.