1. Tessalonicenses

5 Nuu, bruirers un swesters, oiwer dai dag un dai tijd ik bruuk nischt tau juuch srijwe. 2 Weegen jij waite dat Jehovaa sij dag kümt genau soo as air spitsbuub ine nacht. 3 Wen dai säge: “Freere un sicherhët!”, den, mit ais, kümt oiwer eer dat uutroten, soo’s dai waidåg oiwer ain fruug wat air kind luurt kåme, un sai kåme dår up kain årt fon af. 4 Åwer jij bruirers un swesters, sin ni im düüster dat dere dag oiwer juuch kümt soo as air spitsbuub, 5 weegen jij ale sin kiner fone licht un kiner fone dag. Wij daue ni tauhööre taum der nacht un uk ni taum der düüster. 6 Den, wij daue ni slåpen blijwe soo as dai andrer, åwer wij daue wåkt blijwe un daue oose forstand hule. 7 Weegen dai wat slåpe, slåpe nachts, un dai wat sich besuupe, måke dat nachts. 8 Åwer wij, wat fon dag sin, daue oose forstand hule un benutse dai schål fon gloobe un lijb un dai hofnung taum rert ware, soo’s kapacët, 9 weegen God hät oos ni uutsöcht taum wut doirsete, åwer taum rert ware doir oos Her Jësus Kristus. 10 Hai is for oos doodbleewe, dårweegen hät nischt sägen of wij wåken sin urer slåpe daue, wij koine mit em t’hoopleewe. 11 Den, daut bijblijwe air dem ande koråsch geewe un air der ande uprichte, genau soo as jij dat al måke. 12 Wij daue tau juuch nuu forlange, bruirers, dat jij respektijre dai wat mank juuch feel arbëre, wat juuch im Her lenke un formåne. 13 Dau dij bekümere oiwer eer weegen een arbëd. Häwt freere ain mitm andrer. 14 Åwer, wij daue juuch säge bruirers dat jij dai formåne wat ni horge wile, daut trööste dai wat sër traurig sin, daut dai swake mithelpe, häwt geduld mit ale. 15 Passt juuch up dat kair ainsig slechtigkët mit slechtigkët tröögtåle däit, åwer daut juuch ümer anstrenge dat wat gaud is måke air tau der andrer un tau ale. 16 Wääst ümer lustig. 17 Daut ümer beere. 18 Daut for al daile danke. Dat is God sij wile tau juuch in Jësus Kristus. 19 Måkt ni dat füür fon hailig gaist uut. 20 Daut ni dai profesijrs forachte. 21 Häwt sicherhët oiwer ales. Hult juuch an dat wat gaud is. 22 Hult juuch tröög fon al sort slechtigkët. 23 Dat dai aigen God fom freere juuch gans un går hailig mökt. Dat jij juuch gaist, sël un körper, gesund un åne schuld in ales hule daue solang as oos Her Jësus Kristus regijrt. 24 Dai wat juuch raupe däit is reäl un gans sicher mökt dat. 25 Bruirers, daut bijblijwe beere for oos. 26 Dankt al dai bruirers mitm hailige puss. 27 Ik dau juuch forordne, im dem Her sij nåme, dat dës braif tau al bruirers foir leest wart. 28 Dat dai gaurigkët fon Jësus Kristus wat wij ni wërd sin bij juuch is.