Büst duu al trecht taum dij tauwe låte?

1. Airer as duu huus buuge däist, wat must duu måke?

DENK man’s an air mësch wat ain huus buuge wil. Dai däit waite wat fon huus dai buuge wil. Dau dai denke dat dai kan irgends air loja gåe un kööpe dat wat sai häwe wil taum buugen? Në. Airer dat dai anfänge wil, dai mut air gaur uutsuiken måke. Airste mut dai saie of dai uk soo feel gild hät taum buuge. Woweegen? Weegen dai mut saie of eer gild hengeewe däit taum dat buugen. Wen dai dat reekent airer dat måke däit, den giwt dat hen dat dai eer huus trecht krijgt.

2. Soo as stäit in Lucas 14:27 bet 30, woo oiwer must duu grüüwle airer dat’s duu dij tauwe låte däist?

² Wilst duu dij tauwe låte? Weegen dij lijb up Jehovaa un wat’s duu forneeme däist oiwer em, dat däit dij helpe dat duu dij tauwe låte wilst. Sich tauwe låte is dat selwig as air huus buuge. Wosoo? Dau man’s andenke wat Jësus sägt hät in Lucas 14:27 bet 30 (Lees) Jësus däir uutdüüre wat upsich har em någåe. Taum dat måken, muite wij anneeme dai swårhëte wat dårweegen kåme un wek daile ümstig låte. (Luc 9:23 bet 26 un 12:51 bet 53) Duu must sër grüüwle oiwer feel daile wat duu måke must. Wen duu dit måke däist, den büst duu trecht taum Jehovaa dijne, nåheer dat duu dij tauwe låte häst.

3. Wat daue wij hijr oiwer lëre?

³ Loont sich dat tauwen un Jësus någåe? Jå, gans sicher. Wen sich air tauwe låte däit, dai krijgt seegns nuu un in dai tijd wat nog kümt. In dit lëren wij daue wek frågen oiwer dat tauwen saie. Dit måke, däit dij helpe dai antwoord fijne taum ain anerd fråg: “Bün ik al trecht taum mij tauwe låte?”

WAT MUST DUU WAITE OIWER SICH ANBAIRE UN TAUWE LÅTE

4. (a) Wat bedüürt sich tau God anbaire? (b) Soo as in Mateus 16:24 stäit, wat bedüürt dai wöör “sijn aigen wile besijdlåte”?

⁴ Wat is sich anbaire? Airer as duu dij tauwe låte däist, duu must dij anbaire tau God. Wat bedüürt sich tau God anbaire? Dat duu dij anbaire däist tau Jehovaa, duu must tau em beere up dijn ganse härts. Duu däist em säge dat’s duu em dijne wilst up ümer. Wen’s duu dij tau God anbaire däist, duu must ‘dijn aigen wile besijdlåte’. (Lees Mateus 16:24) Wen duu dit måke däist, den däist duu tau Jehovaa tauhööre. Dit hät feele wërd. (Rom 14:8) Soo däist tau God säge, dat fon nuu an ruper, däist duu bloos em dijne un däist ni dijn aigen wile måke. Sich anbaire is ain forsprääken wat duu måke däist tau God. Jehovaa löt dat duu dit forsprääke däist urer ni, åwer wat duu forsprääke däist, must duu uk måke. (Sal 116:12 un 14)

5. Is dat anbairen un dat tauwen dat selwig dail?

⁵ Is dat anbairen un dat tauwen dat selwig dail? Dat anbairen is bloos mit dij un Jehovaa, åwer dat tauwen is foir feel lüür, mëst ümer in ain kongress urer aine dag kongress. Wen’s duu dij tauwe däist, wijst duu tau dai lüür dat’s duu dij anbairt häst tau Jehovaa. Soo, dat tauwen däit klår wijse dat’s duu Jehovaa, dij God, lijbe däist, mit dijne ganse härts, mit dijne ganse sël, mit dijne ganse gedanke, mit dijn ganse kraft un dat’s duu em dijne wilst up ümer.b(Mar 12:30)

6-7. Soo as stäit in 1 Pedro 3:18 bet 22, weegen wat fon 2 daile muite wij oos tauwe låte?

⁶ Is wirklig nöörg sich tauwe låte? Sai wat stäit ine Bijbel in 1 Pedro 3:18 bet 22 (Lees) Dai groot kaste schif, däir tau ale lüür wijse dat Noé gloobe har. Up dai selwig årt, dij tauwen däit wijse tau ale lüür dat’s duu dij tau Jehovaa anbåre häst. Åwer is dat tauwen wirklig nöörg? Jå. Pedro hät uutdüürt woweegen. Airst, dat tauwen däit dij “rere”. Åwer dat dat tauwen oos rere däit, muite wij gloobe an Jësus wijse. Wij muite wijse dat wij glööwe dat hai for oos doodbleewe is, is upleewt woore taum im himel leewe un nuu is hai an God sijn rechten sijr.

⁷ Twait, dat tauwen däit oos “aine gaure forstand” geewe. Wen wij oos tau God anbaire un oos tauwe låte, den fänge wij an air sër gaud ümgang mit Jehovaa. Dårweegen dat wij oos süün wirklig lëd dår hät un dat wij gloobe häwe an wat Jësus måkt hät taum oos fraimåke, den däit God oos süün forgeewe. Dat mökt dat wij aine gaure forstand häwe un dat wij im freere mit em blijwe.

8. Woweegen must duu dij tauwe låte wile?

⁸ Woweegen must duu dij tauwe låte wile? Mit dijn gaure lëren fon dai Bijbel häst duu feel daile oiwer Jehovaa lërt. Woo hai wirklig is un woo hai dai daile måke däit. Dat hät dij härts anstöt un hät måkt dat’s duu groote lijb oiwer God häwe däirst. Dårweegen, duu must dij tauwe låte wile weegen dijn lijb up Jehovaa.

9. Wat däit bedüüre sich tauwe låte “im dem Fåter sijne nåme, in der Kind sijne nåme un in der hailig gaist sijne nåme”, soo as stäit in Mateus 28:19 un 20?

⁹ Anerd dail wat dij lust geewe däit taum dij tauwe låte, sin dai wårhëte fone Bijbel wat’s duu annåme häst. Dau saie wat Jësus sägt hät as hai dai ordnung geewt hät taum jüngers måke. (Lees Mateus 28:19 un 20) Soo as Jësus hät sägt, dai jüngers muite sich tauwe låte “im dem Fåter sijne nåme, in der Kind sijne nåme un in der hailig gaist sijne nåme.” Wat däit dat bedüüre? Dat duu glööwe must an dai wårhëte fone Bijbel oiwer Jehovaa, oiwer sij Kind Jësus un oiwer der hailig gaist, mit dijn ganse härts. Dës wårhëte häwe groot kraft. Sai koine dijn härts anstööte. (Heb 4:12) Wiman’s wek fon eer nådenke.

10-11. Wat fon wårhëte oiwer dem Fåter häst duu lërt un häst duu annåme?

¹⁰ Kast dij denke as duu dai wårhët oiwer dem Fåter lërt häst? Wårhët soo as dës: “Sij nåme Jehovaa is”, hai is “dai Alehöögst oiwer dai gans ër” un bloos hai is “dai wår God”. (Sal 83:18 un Isa 37:16) Hai is dai wat oos måkt hät un “dat reren kümt fon Jehovaa”. (Sal 3:8 un 36:9) Jehovaa hät wat fuune taum oos fon dai süün un fon der dood rere un hät oos hofnung geewt taum leewe up ümer. (João 17:3) Wen duu dij anbaire däist un dij tauwe låte däist, den warst duu kent soo as ain Tüüge fon Jehovaa. (Isa 43:10 bet 12) Duu warst tauhööre tau ain familg ine ganse wild, wat God anbeere daue. In dës familg, ale daue sich gaud befijne weegen sai ware nent mit God sij nåme un daue dai andrer lüür helpe dëse nåme kene. (Sal 86:12)

¹¹ Dau denke wat gaures duu häwe däist. Duu kast forståe wat dai Bijbel sägt oiwer dem Fåter. Wen’s duu dës wårhëte anneeme däist, dij härts wil sich tau God anbaire un sich tauwe låte.

12-13. Wat fon wårhëte oiwer God sij kind häst duu lërt un häst duu annåme?

¹² Woo häst duu dij befuune as duu wek wårhëte oiwer God sij kind lërt häst? Jësus is dai twait hauptsach mësch fon dai gans wild. Hai is wat oos tröögköft hät. Fon sijne selwst wile, hät hai sij leewend weegen oos geewt. Wen wij wijse, mit dat wat wij måke daue, dat wij gloobe an Jësus sijne dood häwe, wij koine fon oos süün forgeewt ware, air gaur ümgang mit God häwe un dat ëwig leewend krijge. (João 3:16) Jësus is oos Oiwerster praister. Hai wil oos helpe gaure daile krijge wat wij häwe koine weegen em sijne dood un gaure ümgang mit God häwe. (Heb 4:15 un 7:24, 25) Hai is dai köönig fon God sij Regirung, wat benutst wart taum God sijne nåme hailig låte, dai slechtigkët taum sluss bringe un seegens up ümer in dai paradijs bringe. (Mat 6:9, 10 un Apo 11:15) Jësus is dai wat wij genau sijn srid någåe muite. (1 Ped 2:21) Hai hät inlërt wat bedüüre däit leewe taum God sijne wile måke. (João 4:34)

¹³ Wen duu anneeme däist wat dai Bijbel oiwer Jësus inlëre däit, duu däist lëre God sij lijb Kind lijbe. Dës lijb däit måke dat’s duu dij leewend benutse wilst taum God sij wile måke, soo as Jësus måkt hät. Dat mökt dat’s duu der wile häwe däist taum dij tau Jehovaa anbaire un dij tauwe låte.

14-15. Wat fon wårhëte oiwer der hailig gaist häst duu lërt un häst duu annåme?

¹⁴ Wat häst duu dacht as duu dës wårhëte oiwer der hailig gaist lërt häst? Dai hailig gaist is God sijn kraft, ni air mësch. Jehovaa doir dai hailig gaist hät lenkt dai wat dai Bijbel sreewe häwe un dës hailig gaist däit oos forståe helpe un måke dat wat wij ine Bijbel leese daue. (João 14:26 un 2 Ped 1:21) Doir sijn hailig gaist Jehovaa däit oos dai kraft geewe “wat oiwer dat wat normal is”. (2 Cor 4:7) Dai hailig gaist däit oos kraft geewe taum dai gaure nijges preege, sich stram stele gëgen dai pruiwen, ni dat lust forlaire un dai slime daile oiwerståe. Dai hailig gaist däit oos helpe dai gaure moor wijse. (Gál 5:22) Dai wat sich up God forlåte un der hailig gaist forlange daue, daue dat uk krijge. (Luc 11:13)

¹⁵ Is sër gaud waite dat dai wat Jehovaa anbeere daue, koine sich forlåte dat dai hailig gaist eer helpe däit God dijne. Wen’s duu anneeme däist wat dai Bijbel inlëre däit oiwer der hailig gaist, den däist duu dij befijne dat’s duu dij tau God anbaire un dij tauwe låte must.

16. Wat häwe wij lërt bet nuu hen?

¹⁶ Dat uutsuiken, sich tau God anbaire un sich tauwe låte, is ni irgends air dail. Soo as wij al saie häwe, taum dit måke must dij wilens sin anneeme wat dår tauhööre däit, soo as dai swårhëte un daile wat duu ümstig låte must. Åwer dai seegens wat’s duu krijge däist, sin feel mër as dai swårhëte. Dat tauwen kan dij rere un kan låte dat’s duu ain gaure forstand foir God krijge däist. Dai hauptsach dail wat duu dij uutsuike däist taum sich tauwe låte, mut sin dai lijb wat’s duu oiwer Jehovaa God häwe däist. Duu must uk mitm ganse härts glööwe an dai wårhëte wat’s duu lërt häst oiwer der Fåter, oiwer dat kind un oiwer der hailig gaist. Nuu dat wij dit ales al fortelt häwe, woo däist duu dës fråg antwoore: “Bün ik al trecht taum mij tauwe låte?”

WAT MUST DUU MÅKE AIRER DAT’S DUU DIJ TAUWE LÖTST

17. Säg wek daile wat air mësch måke mut airer as dai sich tauwe löt.

¹⁷ Wen’s duu maine däist dat’s duu trecht büst taum dij tauwe låte, kan sin dat’s duu al wat måkt häst taum ain gaur ümgang mit Jehovaa häwe.c Dat’s duu dai Bijbel jërer week studijrt häst, häst duu al feel daile oiwer Jehovaa un Jësus kent. Nuu häst duu wirklig gloobe. (Heb 11:6) Duu däist dij gans un går upforlåte an dat wat Jehovaa ine Bijbel forspråke hät un duu häst gloobe dat Jësus sijne dood dij rere kan, fone süün un dai dood. Dijn süün häwe dij lëd dår. Duu blijwst traurig weegen dai forkërde daile wat’s duu måkt häst un häst al Jehovaa forlangt dat hai dij forgeewe schal. Duu büst halw rümergåe urer nuu däist duu gans aners leewe as airste un däist soo leewe taum God gefale. (Atos 3:19) Duu häst lust kreege taum mit dai andrer fortele oiwer dat wat’s duu fone Bijbel lërt häst. Dårweegen häst duu ales måkt wat nöörg wäir taum anfänge preege t’hoop mit andrer fone gemaind airer dat’s duu dij tauwe låte häst. (Mat 24:14) Jehovaa is sër fröölig dat’s duu dit ales måkt häst. Duu häst em sijne härts sër fröögt. (Prov 27:11)

18. Wat fon andrer daile must duu måke airer dat’s duu dij tauwe låte däist?

¹⁸ Airer dat’s duu dij tauwe låte däist, must duu nog wek daile måke. Soo as wij al saie häwe is nöörg sich tau God anbaire. Wen’s duu alaine büst, duu däist ain gebeed tau Jehovaa måke un däist em forsprääke dijn leewend benutse taum em sijne wile måke. (1 Ped 4:2) Denåste fortel mit dai ülst wat dai grup ülster lenkt, dat’s duu dij tauwe låte wilst. Hai däit forlange dat andrer ülster sich forsamle daue mit dij. Duu bruukst kain angst häwe. Dës lijb ülster daue dij al kene un dij lijbe. Sai daue mit dij wek daile wat’s duu fone Bijbel al lërt häst nåsaie. Sai daue dit måke weegen sai bruuke sicherhët häwe dat’s duu forståe häst dat wat’s duu fone Bijbel lërt häst un dat’s duu waite däist woo groot wërd hät sich anbaire un sich tauwe låte. Wen sai maine daue dat’s duu trecht büst taum dij tauwe låte, daue sai dij dat säge un den in dai anerd kongress urer aine dag kongress kast duu dij tauwe låte.

WAT MUST DUU MÅKE NÅ DAT’S DUU DIJ TAUWE LÅTE DÄIRST

19-20. Wat must duu måke nå dat’s duu dij tauwe låte häst un wosoo kast duu dat måke?

¹⁹ Un nå dat’s duu dij tauwe låte häst, wat must duu måke?d Dau andenke dat sich anbaire is air dail wat’s duu taum Jehovaa forsprääke däist un hai wil dat’s duu dat mökst. Dårweegen, nå dat’s duu dij tauwe låte häst, must duu leewe soo as duu forspråke häst. Wosoo kast duu dat måke?

²⁰ Airst, blijwt ümer t’hoop mit dai gemaind. Wen’s duu dij tauwe låte däist, däist duu tauhööre tau ain groot familg ine ganse wild. (1 Ped 2:17) Dai bruirers un swesters ine gemaind, ware dijn familg ine gloobe sin. Wen’s duu ümer upe forsamlung büst, däit dijn ümgang mit eer ümer stärke ware. Twait, dau dai Bijbel jërer dag leese un dår angrüüwle. (Sal 1:1 un 2) Nå ain stük fone Bijbel leese, dau dij ain tijd neeme taum genau dåroiwer denke. Soo, däit in dijne härts blijwe dat wat dai Bijbel sägt. Drür, daut bijblijwe bijm beeren. (Mat 26:41) Wen’s duu uutm härts beere däist, kümst duu näiger an Jehovaa raner. Firt, ‘dau bijblijwe God sij Regirung ine airste stel suike’. (Mat 6:33) Duu kast dat måke for groot wërd taum dat preegarbëd geewe. Wen’s duu jërer week preege däist, däit dijn gloobe stärke ware. Den krijgst duu andrer lüür helpe dai weeg fone ëwig leewend fijne. (1 Tim 4:16)

21. Wat kast duu krijge wen’s duu dij tauwe låte däist?

²¹ Sich anbaire tau Jehovaa un sich tauwe låte is dat hauptsach uutsuiken wat’s duu in dijn leewend måke däist. Is wår dat’s duu wek swårhëte doirsete must un wek daile ümstig låte. Åwer gans sicher, dat måke däit oos groot seegens bringe. Irgends air swårhët wat’s duu doirsete däist “is up ain kord tijd un is ni tau swår”. (2 Cor 4:17) Dij tauwe låte, mökt dat’s duu hüüt ain fröölig leewend häwe kast un ain “wår leewend” in dai tijd wat nog kümt. (1 Tim 6:19) Dårweegen, dau gaud denke un beere oiwer dai antwoord wat’s duu geewe däist taum dai fråg: “Bün ik al trecht taum mij tauwe låte?”