INE ganse wild lüür fon irgends air folk un religione, daue beere. Sai beere alaine, t’hoop mit andrer, in kirche, in tempels, sinagogas, mesquitas un in santuários. Kan sin sai benutse tapëts taum beeren, buiker taum beeren, bijler taum beeren un andrer soo as dës.

Dat beeren mökt dai lüür aners as dai tijre wat upe Ër leewe daue. Is wår, in wek daile sin wij soo as dai tijre. Soo as wij bruuke eeten, wåter uk luft taum hålen. Un wij ware uk geboore, daue leewe un daue doodblijwe. (Eclesiastes 3:19) Åwer bloos dai lüür daue beere. Woweegen?

In pår wöör, dat is soo weegen wij bruuke beere. Mëstümer dai lüür saie dat beeren soo as air dail taum näig kåme an dai daile fom himel. Air dail wat sai nene as hailig un up ümer. Dai Bijbel sägt wij sin måkt woore taum dat måke wile. (Eclesiastes 3:11) Jësus hät ais sägt: “Fröölig sin dai wat waite dat sai God bruuke daue.” (Mateus 5:3)

“Waite dat sai God bruuke daue.” Wen dai lüür ni God bruuke däire, woweegen wäire al dai kirche, dai daile taum beeren un woweegen däire dai lüür tijd benutse taum beeren? Is wår dat wek anglööwe an sich selwst urer an andrer lüür, taum dit krijge wat sai bruuke in gloobe. Åwer däist duu wirklig maine dat süündig lüür koine oos dës hülp geewe? Wij sin soo as air pot wat licht forbreekt, daue wënig leewe un waite ni ales dåroiwer. Bloos air wat kluiker is un al gans kraft hät un däit feel länger leewe as wij, kan oos geewe dat wat wij bruuke. Åwer wat fon sin dës daile wat wij bruuke woo oiwer wij beere muite?

Dau ais denke: Häst duu al bruukt sër air belërung, klaukhët urer antwooren tau frågen wat soo låte däit as dai lüür dat ni forståe daue? Häst duu al tröösten bruukt as air wat’s duu sër lijbe däist doodbleewe is, hülp taum air sër groot uutsuiken måke urer forgeewen as duu dij sër schuldig fornåme häst?

Ine Bijbel stäit dës ale sin daile woo wij oiwer beere koine. Dai Bijbel is dat bauk woo wij oos anhule koine oiwer dit. Ine Bijbel ståe sreewe gebeeds fon feel reäl kërls un fruuges. Sai häwe beert taum forlangen tröösten, belërung, forgeewen un antwooren tau dai frågen wat sër slim sin. (Salmo 23:3, 71:21, Daniel 9:4, 5, 19 un Habacuque 1:3)

Eer beeren wäir ni oiwerain, åwer in air dail däir dat t’hooppasse. Ale wat beere däire, däire waite wat sai måke müste taum God eer beeren hööre, air dail wat feel hüüt ni måke daue. Sai däire waite tau wem sai beere müste.

FEEL lüür daue denke dat God al beeren hööre däit, hät nischt sägen tau wem sai beere daue. Der lüür wat dat gefale däit, sin dai wat t’hoopgåe daue taum beeren mit lüür fon andrer religione, weegen sai denke al religione sin gaud. Åwer däit God dat gefale soo denke?

Dai Bijbel däit inlëre feel lüür däire beere, åwer ni tau dem wår God. As dai Bijbel sreewe woore is, feel lüür däire beere tau daile wat sai reekne däire soo as godes. Åwer feelmåls hät God sägt dat wäir forkërd. Soo as in Salmo 115:4 bet 6 stäit oiwer dai godes: “Sai häwe oore, åwer koine ni hööre.” Den is dat gans klår. Woweegen beere tau aim god wat dij ni ais hööre kan?

Ain geschicht fone Bijbel fortelt hijr oiwer. Dai reäl profët Elias hät tau dai profëten fon Baal sägt sai schule tau eer god beere un nåheer däir hai tau sijm God beere. Elias hät sägt dai God wat dai wår wäir, däir dat gebeed antwoore, åwer dai falsch ni. Nådem dat sai dat annåme häwe, dai profëten fon Baal häwe stark beert, sogår luur raupe, åwer ales unnüte. Dai geschicht sägt: “Kair däir antwoore un kair däir dårnå uppasse.” (1 Reis 18:29) Åwer wat is mit Elias passijrt?

Nå sijm gebeed God hät dat glijk antwoort, hät füür schikt fom himel taum forbrenen wat hai anbåre har. Woweegen hät God Elias sij gebeed antwoort? Elias sij gebeed däit dat antwoore, soo as stäit in 1 Reis 18:36 un 37. Is man air kord gebeed, mit bloos wënsig 30 wöör soo as dat airst hebraico sreewe woore is. Lijkerst soo, Elias hät mit God fortelt doir sijne nåme Jehovaa drai mål säge.

Baal, wat bedüürt “her”, wäir der cananeus eer god. Up wek stele Baal har andrer nåmen. Åwer Jehovaa, is dem ainsig wår God sij nåme. Dës God hät tau sijm folk sägt: “Ik bün Jehovaa. Dit is mijn nåme; ik dau mijn herligkët ni tau der andrer geewe.” (Isaías 42:8)

Woweegen wäir Elias sij gebeed antwoort un Baal sijn profëten eer ni? Dai lüür däire Baal anbeere doir huurerig un lüür doodmåken. Dat däir eer åne wërd låte. Åwer dat dat Israel folk Jehovaa anbeere däir, hare sai groote wërd un wäire frai fon dai slechte daile. Dau ais andenke: Wen’s duu aim lijbe mësche aine braif schike wulst, wulst duu dat dai afgeewt ware däir taum aim mësche wat slecht moors häwe däir, gans aners as der wat’s duu lijbe däist? Gans sicher ni!

Wen’s duu beere däist tau Jehovaa, duu däist beere tau dem wat ales måkt hät, dai Fåter fon al lüür.a In air gebeed, dai profët Isaías hät sägt. “Duu, ach Jehovaa, büst oos Fåter.” (Isaías 63:16) Soo, wäir dës God wat Jësus Kristus maint hät as hai tau sijne jüngers sägt hät: “Ik gå na mij Fåter un juuch Fåter, na mij God un juuch God.” (João 20:17) Jehovaa is Jësus sij Fåter. Tau dësem God däir Jësus beere un hät sijn jüngers inlërt uk tau dem beere. (Mateus 6:9)

Däit dai Bijbel säge dat wij schåle beere tau Jësus, Marij, dai hailige urer dai ängels? Në, bloos tau Jehovaa. Woweegen? Airst, wen wij gebeed måke wij daue anbeere un dai Bijbel sägt bloos Jehovaa God mut anbeert ware. (Êxodo 20:5) Twait, dai Bijbel sägt hai is dai wat dat beeren hööre däit. (Salmo 65:2) Jehovaa God däit andrer feel oiwergeewe, åwer dat beeren hööre hät hai as kaim oiwergeewt. Hai is dai God wat forspråke hät hai selwst oos beeren hööre.

Den, wen’s duu wilst dat God dij beeren hööre däit, dau andenke an dës wöör fone Bijbel: “Jërer dai wat Jehovaa sijne nåme anraupe däit wart rert.” (Atos 2:21) Åwer däit Jehovaa al beeren hööre? Urer is nog aners wat, wat wij waite muite wen wij wile dat Jehovaa oos beeren hööre däit?

FEEL religione daue inlëre wen wij beere dat hauptsach is of wij ståe urer upe knai site, oos wöör wat wij säge un oos moors. Åwer dai Bijbel helpt oos forståe wat wirklig wërd hät wen wij beere daue.

Dai Bijbel fortelt oiwer reäl lüür wat häwe lijs beert uk luur beert. Sai häwe nam himel keeke taum beeren urer sich ruunerböögt taum beeren. Sai häwe kair buiker benutst urer andrer daile taum beere, åwer eer gebeeds wäir uutm härts. Woweegen hät God eer beeren höört?

Soo as wij al saie häwe, sai häwe bloos tau air God beert, Jehovaa. Uk Jehovaa hät eer beeren höört weegen air anerd dail. Stäit soo in 1 João 5:14: “Wij daue oos up em forlåte dat kan sin wat is wat wij em bire, wat mit em sijne wile t’hoopstimt, hai däit oos hööre.” Oos beeren muite t’hoopstime mit God sijne wile. Wat bedüürt dat?

Dat oos beeren mit God sijne wile t’hoopstime daue, wij muite waite wat em sijne wile is. Soo muite wij dai Bijbel lëre taum waiten wat sijne wile is un wosoo beere. Den, muite wij ales oiwer dai Bijbel waite taum God oos beeren hööre? Në. Åwer God wil wij schåle lëre, forståe un leewe nå sijne wile. (Mateus 7:21 bet 23) Wij muite beere nå dat wat wij lëre.

Ji mër as wij oiwer Jehovaa un em sijne wile lëre, gröter wart oos gloobe. Dat hät groote wërd wen wij beere. Jësus hät sägt: “Ales wat jij forlange doir beeren, mit gloobe, daue jij krijge.” (Mateus 21:22) Gloobe häwe is ni an irgends air dail glööwe. Åwer is an air dail glööwe wat wirklig giwt weegen feel pruiwen, wen wij dat uk ni saie koine. (Hebreus 11:1) Dai Bijbel is ful mit daile wat wijse dat Jehovaa, der wat wij ni saie koine, wirklig giwt, uk dat wij oos up em forlåte koine un dat hai wil dat beeren hööre fon dai wat gloobe up em häwe. Wij koine tau Jehovaa forlange dat hai oos aine starke gloobe giwt un hai däit oos geewe mit lust ales wat wij bruuke. (Lucas 17:5 un Tiago 1:17)

Is uk air anerd dail mit groote wërd oiwer wosoo beere. Jësus hät sägt: “Kair kümt nåm Fåter, wen dat ni doir mij is.” (João 14:6) Doir Jësus, kåme wij näig an oose Fåter Jehovaa un Jësus hät sijn jüngers inlërt doir em sijne nåme beere. (João 14:13 un 15:16) Åwer dat bedüürt ni tau Jësus beere. Wij muite beere doir Jësus sijne nåme un andenke dat doir em wij koine an oose hailige Fåter Jehovaa kåme.

Ais häwe Jësus sijn apostels tau em forlangt: “Her, dau oos inlëre beere.” (Lucas 11:1) Sai wule ni waite dat woo wij nuu oiwer fortelt häwe. Sai wule waite woo oiwer sai beere müste.

FEEL maine dat dat gebeed wat Jësus inlërt hät, “Fater Unser”, urer up briånisch “Pai-Nosso”, is dat gebeed wat dai mëste lüür nåsäge. Åwer dai mëste lüür daue ni forståe wat dit gebeed bedüüre däit. Miljone lüür daue jërer dåg dit gebeed nåsäge, kan sin feelmåls upe dag. Åwer Jësus hät ni sägt dat dit gebeed soo måkt ware schul. Wosoo waite wij dit?

Airer as oiwer dës gebeed fortele Jësus hät sägt: “Wen jij beere daue, daut ni ümer dai neemlige daile mål for mål säge.” (Mateus 6:7) Den, woweegen hät Jësus dit gebeed inlërt? Hai wul ni wij schule dat in oose kop behule un dat ümer nåsäge. Jësus däir oos inlëre woo oiwer beere un dai hauptsach daile wat wij in oos gedanke häwe muite wen wij beere. Wiman’s dit gebeed beeter forståe. Dit gebeed stäit in Mateus 6:9 bet 13.

“Oos Fåter im himel, dij nåme schal hailig måkt ware.”

Mit dës wöör, Jësus hät sijn jüngers andenke hulpe dat sai beere müste bloos tau Jehovaa. Åwer wätst duu woweegen God sijne nåme soo’n groote wërd hät un schal hailig måkt ware?

Fom anfang an, God sij hailig nåme wart drekigmåkt mit loigen. God sij faind, Satan, wil dat wij schåle anglööwe dat Jehovaa nischt güne däit tau dai lüür, däit laige un hät ni dai recht taum regijre. (Gênesis 3:1 bet 6) Feel lüür daue Satan bijståe un säge Jehovaa hät kain lijb un wil ni forgeewe. Andrer säge sogår dat giwt kaine God un wek häwe God sijne nåme uut dai Bijbel ruutermåkt un häwe forbåre em sijne nåme benutse.

Dai Bijbel sägt God däit al dës ungerechtigkët int raich bringe. (Ezequiel 39:7) Den, däit hai oos geewe ales wat wij bruuke un däit oos swårhëte almåke. Wosoo mökt hai dit? Dat wat Jësus sägt hät giwt oos dat antwoord.

“Dij Regirung schal kåme.”

Hüütsendåg dai religionschefs waite ni wat God sij Regirung is. Åwer dai wat höört häwe as Jësus dit gebeed inlërt hät, däire al waite wat God måke däir. Hai däir der Messias schike taum köönig sin fon sijn Regirung un dai wild aners måke. (Isaías 9:6, 7 un Daniel 2:44) Dës Regirung däit God sijne nåme hailig måke un däit gans klår wijse dat Satan ain loigensak is. Dai däit dës faind gewine un däit al dai slechte daile almåke. God sij Regirung däit almåke der krijg, dai krankhëte, dai hungersnood un sogår der dood. (Salmo 46:9, 72:12 bet 16, Isaías 25:8 un 33:24) Wen’s duu beere däist dat God sij Regirung kåme schal, duu däist forlange dat al dës daile passijre.

“Dij wile schal måkt ware, soo as im himel, uk upe ër.”

Jësus sijn wöör daue wijse dat God sijne wile måkt wart hijr upe Ër, soo as im himel, woo God wånt. God sij wile is ümer måkt woore im himel. Wosoo waite wij dat? Weegen God sij Kind hät Satan un dai slechte ängels uutm himel ruutersmeete upt Ër. (Apocalipse 12:9 bet 12) Dit wat Jësus forlangt hät, helpt oos forståe dat God sijne wile feel mëre wërd hät as oos wile. Un dat wat God wil, is ümer dat best tau oos. Sogår Jësus wat kain süün har, hät tau sijn Fåter sägt: “Åwer dat dijne wile passijrt un ni mijne.” (Lucas 22:42)

“Geew oos hüüt dat brood tau dësem dag.”

Jësus hät weese wij koine beere oiwer dat wat wij bruuke taum leewen. Dat måke helpt oos andenke dat Jehovaa dat leewend, luft un al dai daile oos geewe däit. (Atos 17:25) Dai Bijbel wijst Jehovaa is soo as air lijblig fåter. Un däit em sër frööge oos geewe wat wij bruuke. Åwer soo as air gaur fåter, wen wij forlange wat ni gaud tau oos is, hai däit oos dat ni geewe.

“Forgeew oos schulden.”

Häst duu schulden mit God? Bruukst duu em sij forgeewen? Feel hüüt waite ni mër wat süün is urer wosoo dai süün oos schåre kan. Åwer dai Bijbel däit oos inlëre dat al dai swårhëte fone süün kåme. Wij daue doodblijwe weegen dai süün. Wij ale ware mit süün geboore un måke forkërde daile. Dårweegen koine wij bloos dat leewend up ümer häwe wen God oos forgeewe däit. (Romanos 3:23, 5:12 un 6:23) Is sër gaud waite wat dai Bijbel sägt: “Weegen duu, ach Jehovaa büst gaud un büst ümer trecht taum forgeewen.” (Salmo 86:5)

“Dau oos fraimåke fon dem Düüwel.”

Kast duu saie dat’s duu God sij behüüten sër bruuke däist? Feel daue glööwe dat dat kaine Düüwel giwt. Åwer Jësus hät inlërt dat dat wirklig aine Düüwel giwt un hät sogår der nent soo as “dai wat dës wild regijrt”. (João 12:31 un 16:11) Satan hät dës wild wat hai regijrt, aflenkt fon God un hai wil dit uk gërn mit dij måke, dat’s duu kain ümgang mit Jehovaa häst. (1 Pedro 5:8) Åwer Jehovaa hät feel mër kraft as Satan un wil behüüte dai wat em lijbe daue.

Wij häwe feel lërt oiwer dat gebeed wat Jësus inlërt hät. Åwer wij koine beere oiwer feel andrer daile. Dau andenke an wat 1 João 5:14 sägt oiwer God: “Kan sin wat, is wat wij em bire, wat mit em sijne wile t’hoopstimt, hai däit oos hööre.” Den, dau nij ais denke duu kast ni oiwer dai swårhëte wat’s duu doirsete däist tau God beere. (1 Pedro 5:7)

Un oiwer dai stuun un stel woo wij beere? Däit dat wat sägen häwe?

FEEL religione daue tau dij säge woo un wonair beere. Åwer däit dai Bijbel säge dat wij koine beere bloos up wek stele un wek stuun?

Dai Bijbel sägt wonair wij beere muite. Soo as airer as Jësus mit sijn jüngers t’hoop geete hät, hai hät ain gebeed måkt taum God danke. (Lucas 22:17) Un as sijn jüngers sich t’hoop forsamle däire taum God dijne, sai däire t’hoop beere. Sai häwe nåmåkt dat wat dai judeus al lang tijd oiwer måke däire, in sijne stele taum God anbeere. God wul dat sijn huus ain stel taum beeren wäir tau dai lüür fon al gëgende. (Marcos 11:17)

Wen God sijn dijners sich t’hoop forsamle un t’hoop beere daue, hai däit dës beeren hööre. God däit gefale wen eer beeren uutm härts kåme un t’hoopstime mit sijm wile. Weegen dit beeren, kan God daile måke wat hai süste ni måke däir. (Hebreus 13:18 un 19) Jehovaas Tüügen daue beere wen eer kristlige forsamlunge anfänge un uk wen dai taum sluss sin. Duu büst nöögt taum kåme up ain fon oos kristlige forsamlunge taum dës beeren hööre.

Ine Bijbel stäit ni woo stuun un stel wij beere muite. Åwer stäit dat God sijn dijners up irgends ain stuun un stel beert häwe. Jësus hät sägt: “Åwer, wen’s duu beere däist, gå riner in dijn aigen stuuw un, nå dat’s duu dai doir taumåkt häst, dau tau dijn Fåter beere, wat ni saien is. Den, dijn Fåter wat in haimligkët saie däit, däit dij beloone.” (Mateus 6:6)

Dat is sër wat gaures! Duu kast tau der Alehöögst beere up dai stuun wat’s duu wilst, wen’s duu uk alaine büst, un duu kast dij sicher sin dat hai dij hööre däit. Dårweegen wul Jësus feelmåls alaine blijwe taum beeren. Jësus hät ais, ain gans nacht oiwer beert airer as hai ain uutsuiken måkt hät. (Lucas 6:12 un 13)

Dai Bijbel fortelt oiwer kërls un fruuges wat beert häwe as sai uutsuiken måke müste urer nood doirsete däire. Wekmåls sai däire luur beere un wekmåls sai däire lijs beere. Sai däire alaine beere urer mit andrer lüür. Dat hauptsach is: sai däire beere. God sägt tau oos: “Daut ümer beere.” (1 Tessalonicenses 5:17) God is ümer trecht taum hööre dai wat em sijne wile måke. Gewis, dat wijst dat hai oos sër lijbe däit!

Hüütsendåg feel lüür maine dat dat beeren kaine wërd hät. Kan sin duu däist dij fråge: ‘Däit dat beere mij wirklig helpe?’

IS gaud tau oos beere? Dai Bijbel wijst wen God sijn reäl dijners beere, dat is wirklig sër gaud tau eer. (Lucas 22:40 un Tiago 5:13) Den, beere däit oos sër helpe. Kan oos helpe näig an God kåme, in dat wat wij forneeme un sogår is gaud tau oos gesundhët. Wosoo?

Dau dij ais denke: Wen’s duu air kind häst un dai krijgt ain geschenk, däist duu eer inlëre bloos dankbårkët forneeme urer uk dankeschöön säge? Wen wij dat säge wat wij forneeme oos dankbårkët wart nog gröter. Is dat uk soo wen wij mit God fortele? Gewis! Wiman’s saie oiwer wat wij beere koine un wosoo oos dat helpt.

Beere taum danken. Wen wij oose Fåter danke for dai gaure daile wat wij krijge, wij daue oos anhule an dai seegen wat God oos giwt. Dat kan oos dankbårkët un frööligkët gröter måke. (Filipenses 4:6)

Denk hijr oiwer: Jësus hät dankbårkët weese tau sijn Fåter dat hai em sij beeren höört hät. (João 11:41)

Beere taum forgeewen forlange. Wen wij tau God forlange hai schal oos forgeewe, dat helpt oos genau waite wat richtig un forkërd is, oos lëd daue fon dat wat wij forkërd måkt häwe un forståe dat wij schåle God horge. Dat helpt oos uk ni taufeel schuld forneeme.

Denk hijr oiwer: Davi hät beert taum wijse dat hai traurig wäir un dat em sijn süün em lëd daue däir. (Salmo 51)

Beere taum belërungs un klaukhët forlange. Forlange tau Jehovaa dat hai oos belërungs un klaukhët geewe däit taum gaur uutsuiken måke, helpt oos gewöönliger sin. Dat helpt oos andenke dat wij Jehovaa sij hülp bruuke un dat wij muite oos up em forlåte. (Provérbios 3:5 un 6)

Denk hijr oiwer: Salomão hät mit gewöönligkët birt belërungs un klaukhët taum Israel regijre. (1 Reis 3:5 bet 12)

Beere wen wij nood doirsete daue. Wen wij tau Jehovaa fortele ales wat wij forneeme wen wij nood doirsete daue, dat helpt oos ruig blijwe un dat wij oos up em forlåte. (Salmo 62:8)

Denk hijr oiwer: Dai köönig Asa hät beert as, foir em, ain stark faind wäir. (2 Crônicas 14:11)

Beere for andrer. Beere for andrer helpt oos ni bloos an oos selwst denke, åwer bedurnis wijse un forståe wat dai andrer forneeme.

Denk hijr oiwer: Jësus hät for sijn jüngers beert. (João 17:9 bet 17)

Beere taum God låwe. Wen wij Jehovaa låwe for al dai faine daile wat hai måkt hät, wij daue em mëre wërd geewe un daue em düler ëre. Dat helpt oos uk näig kåme an oose Fåter.

Denk hijr oiwer: Davi, mit lustigkët, hät God låwt weegen ales wat hai måkt hät. (Salmo 8)

Wen wij beere krijge wij uk “dai freere fon God wat oiwer al forståen is”. (Filipenses 4:7) Freere häwe in dës slecht wild wat wij leewe is sër wat gaures! Dat kan oos helpe sogår gesund sin. (Provérbios 14:30) Åwer kümt dës freere dat wij oos selwst sër anstrenge daue? Urer is dat nog weegen aners wat?

FEEL lüür wile gërn waite of God oos beeren hööre däit un antwoore däit. Of hai oos beeren hööre däit urer ni, kümt up oos an.

Jësus hät weese dat dai religionschefs in sijne tijd, falsch wäire. Sai däire beere bloos taum sich wijse tau dai lüür. Jësus hät sägt dat sai krijge däire wat sai wërd wäire. Dat bedüürt dat sai krijge däire bloos wat sai wule, dat dai lüür nå eer uppasse däire, åwer God däir eer beeren ni hööre. (Mateus 6:5) Hüüt is dat uk soo. Feel lüür beere bloos oiwer eer aigen wile un ni oiwer God sijne wile. Un wen dai lüür dai Bijbel ni horge, God däit eer beeren ni hööre.

Åwer wat mainst duu oiwer dij? Däit God dij beeren hööre un antwoore? Hät nischt sägen wat fon rass duu büst, fon woo duu heerkåme däist urer andrer daile oiwer dij. Dai Bijbel giwt oos dës sicherhët: “Dat God ale oiwerain reekne däit, åwer in al folk hai nimt an der wat angst hät em ni gefale un mökt wat richtig is.” (Atos 10:34 un 35) Is dat uk soo wen’s duu beere däist? Wen’s duu angst häst God ni gefale, den duu däist em ëre. Duu däist nischt måke wat em traurig löt. Gerecht sin bedüürt måke wat God wil un ni wat’s duu un andrer lüür maine wat richtig is. Wilst duu sër gërn dat God dij beeren hööre däit? Dai Bijbel wijst wosoo beere dat God dij hööre däit.a

Feel lüür wile dat God eer beeren bewunrig antwoore däit. Åwer soo as dai Bijbel wijst God hät dat ni oft måkt. Öftens däir lang duure bet God ain bewunrig dail werer måke däir. Dai Bijbel däit uk wijse nå dat dai apostels doodbleewe sin, sin kain bewunrige daile mër passijrt. (1 Coríntios 13:8 bet 10) Den, bedüürt dat, dat God oos beeren ni antwoore däit? Gewis ni! Kijk wosoo God oos beeren antwoore däit.

God giwt oos klaukhët. Al dai wår klaukhët kümt fon Jehovaa. Em däit sër gefale sijn klaukhët der geewe wat dat forlange un wat nå dai leewe wile. (Tiago 1:5)

God giwt oos der hailig gaist. Dai hailig gaist is God sijn kraft. Går nischt hät mër kraft as dai hailig gaist. Dai kan oos helpe pruiwen doirsete. Dai kan oos freere geewe wen wij unruig un traurig sin. Dai helpt oos uk gaur lüür sin. (Gálatas 5:22 un 23) Jësus hät tau sijn jüngers dës sicherhët geewt, dat God wile gërn dit hailig gaist geewe. (Lucas 11:13)

God helpt dai wat em suike mit al härts. (Atos 17:26 un 27) Ine ganse wild sin lüür wat wirklig wile dai wårhët fijne. Sai wile oiwer God lëre: Wat fon sij nåme is, wat hai tau dai lüür un tau dai Ër wil un wosoo näig an em kåme. (Tiago 4:8) Feelmåls, Jehovaas Tüügen daue trefe lüür wat dës daile waite wile. Eer däit sër gefale dëse lüür dit ine Bijbel wijse.

Wilst duu God kenelëre? Is dårweegen dat’s duu dës dün bauk leese däist? Dit kan dat antwoort sin fon God tau dij beeren.