Daue dai Jehovaas Tüügen dai familge in ainigkët hule urer uutananerbringe?

Soo as Jehovaas Tüügen wij daue oos antrenge dat dai familge in ainigkët sin, oos uk der andrer een. Wij daue God ëre, dai wat dai familg inset hät. (Gênesis 2:21 bet 24 un Efésios 3:14, 15) Ine Bijbel däit God belërunge geewe wat al lüür ine ganse wild hulpe häwe air gaur un fröölig forfrigt leewend häwe.

Wosoo daue dai Jehovaas Tüügen dai familge helpe nog ainige sin?

Wij daue oos best måke taum dai formånen fone Bijbel någåe, weegen dai helpe oos beeter sin soo as kërls, fruuges un papa un mama. (Provérbios 31:10 bet 31, Efésios 5:22 bet 6:4 un 1 Timóteo 5:8) Dai klaukhët fone Bijbel, kan sogåe helpe dai familge woo ni ale tauhööre tau dai neemlig religion. (1 Pedro 3:1, 2) Dau saie wat wek lüür sägt häwe as sij kërl urer sijn fruug Jehovaas Tüügen woore is:

• “In oos airste söss jåre fon oos forfrigt leewend, däire wij oos bloos strijre un hare traurigkët. Nåheer dat Ivete ain Jehovaas Tüügen woore is, eer gedult un dai daile mit lijb anneeme, häwe mij mit langsåm anstöt. Dai ümstelen wat sai måkt hät, hät oos forfrigt leewend rert.” - Clauir, fon Brasil.

• “Ik däir dat ni anneme as Chansa, mij kërl, anfunge hät dai Bijbel lëre mit dai Jehovaas Tüügen, weegen ik däir ümer maine sai däire dai familge uutananerbringe. Åwer nuu häw ik saie dat dai Bijbel oos forfrigt leewend hulpe hät.” - Agness, fon Zâmbia.

In oosem preegarbëd daue wij wijse tau ale, dat måke wat dai Bijbel sägt, kan oos helpe taum

• Waite wosoo aine mësche uutsuike taum frijgen

• Ales doirset krijge in dat airst forfrigt jår

• Gaure ümgang häwe mit dai swijgerfåter un swijgermuter

• Dat gild genau uutgeewen forståe

• Anhule an strijren

• Lëre wosoo forgeewe

• Dai kiner forstand inlëre

In ain anerd religion rinergåe kan dat swårhëte bringe in dat forfrigt leewend?

Wekmåls, jå. In 1998 ain grup wat Sofres haite däir, hät upsuiken måkt fon kërls un fruuges woo bloosig air fon der, Jehovaas Tüügen woore is. Dat hät weese dat in 20 familge woo dit upsuiken måkt woore is, ain hät swårhëte doirset.

Jësus hät sägt dai wat em sij inlëren någåe däire, wekmåls küüne swårhëte ine familg häwe. (Mateus 10:32 bet 36) Will Durant wat geschichte lëre däir, hät saie solang as dai Império Romano wäir, “dai kristen religion wäir updrükt dat sai dai familge uutananerbringe däire”.a Hüüt däit dat neemlig passijre mit wek Jehovaas Tüügen. Åwer is wirklig dai fruug urer kërl wat Jehovaas Tüügen woore is wat dai swårhëte bringt?

As dat upgericht kåme is dat dai Jehovaas Tüügen dai familge uutananerbringe, dat Gericht Huus fone Lüür sijn Gerecht fon Europa, hät sägt dat wek fone familg wat ni Jehovaas Tüügen sin feelmål strijre daue. Dat passijrt weegen dai daue ni “anneeme dai fraihët wat dai anerd fone familg hät, taum tau ain anerd religion tauhööre wat dai wil.” Dai wat in dat Gericht Huus gerichte häwe tauset: “Dit däit passijre in al forfrigt leewend woo dai kërl urer fruug ain anerd religion hät, un ni bloos mit Jehovaas Tüügen.” b Åwer wen air dat uk ni lijre kan, dai Jehovaas Tüügen daue sich anhule an dat formånen fone Bijbel: “Daut ni slechtigkët mit slechtigkët tröögtåle. . . . Wen sin kan, wat up juuch up an kümt, blijwt in freere mit ale.” (Romanos 12:17, 18)

Woweegen daue dai Jehovaas Tüügen glööwe dat sai muite frijge bloos mit air wat uk Jehovaas Tüügen is?

Dai Jehovaas Tüügen daue dai belërung fone Bijbel någåe “sich frijge bloosig im Her”, urer frijge mit aim wat fon dai neemlig religion is. (1 Coríntios 7:39) Dës ordnung stäit ine Bijbel un is sër gaud. Soo as sreewe woore is in ain jornal fon 2010, “kërls un fruuges wat dai neemlig religion häwe un daue an dai neemlige daile glööwe”, koine air beeter forfrigt leewend häwe.c

Åwer dai Jehovaas Tüügen daue kaine taureere taum uutananergåe woo air ni Jehovaas Tüügen is. Dai Bijbel sägt: “Wen air braurer ain fruug hät wat ni krist is, åwer wen eer wile is mit em t’hoopblijwe, dat hai eer ni löt; un wen ain fruug aine kërl hät wat ni krist is, un em sij wile is mit eer t’hoopblijwe, dat sai ni sijne kërl löt.” (1 Coríntios 7:12, 13) Dai Jehovaas Tüügen daue dës ordnung horge.