Hofnung: Is dat bloos air droom urer kan dat wirklig oos helpe?

AIR JONG wat Daniel haite däir, wäir bloos 10 jåre uld åwer hai har ain slecht krankhët wat câncer wäir. Hai däir al ain jår lang dat doirsete däir un dai dokters däire maine dat kain hülp mër wäir dårmit. Soo uk däire sijn familg un andrer maine wat em lijbe däire. Åwer, Daniel har ain hofnung.a Hai däir glööwe dat hai beeter ware küün. Hai wul groot ware taum uutlëre un ruuterfijne woo dai câncer kurijre. Ain dokter wat genau kene däir dës sort krankhët, schul Daniel besuike un hai wäir sër fröölig dårmit un däir anglööwe dat dës dokter em helpe küün. Åwer, as dai dag kåme is, dai dokter hät küüt ni hengåe. Dårweegen is Daniel gans un går forsocht woore. Dun, hai wul ni mër leewe. Pår dåg wijrer is hai doodbleewe.

Ain uutgelërt mësch hät Daniel sijn geschicht fortelt hät taum wijse woo hofnung häwe urer ni kan dai gesundhët angåe. Kan sin dat’s duu soo wat al höört häst. Dat is neemlig soo wen air ul mësch taum doodblijwen lëge däit, åwer wil sër gërn dat al sijn familg dai besuike däit un däit dës dag sër luure. Wen dai dag kåme däit wat dai ul mësch sër luurt hät, nåheer blijwt dai dood. Woweegen daue soo’n daile passijre? Kan dai hofnung wirklig soo stark sin as wek anglööwe daue?

Dokters wat upsuike daue dåroiwer maine dat an gaure daile denke, hofnung häwe un andrer gaur forneemen häwe, daue dai mësch eer leewend un gesundhët beeter måke. Åwer ni al dai dokters daue soo denke. Wek daue maine dat soo’n daile stime ni t’hoop mit dat wat sai ruuterfuune häwe. Sai daue ni anglööwe dat dai forneemen koine oos gesundhët beeter måke urer dat schåre.

Is ni bloos hüütsendågs dat wek, dai hofnung kaine wërd geewe daue. Mër as 2 duusend jåre trööguut, Aristóteles, air sër bekand grego schaullërer, hät soo sägt oiwer dai hofnung: “Hofnung is wen dai mësch dröömig leewe däit.” Un mër as 2 huunerd jåre trööguut, Benjamin Franklin, air amerikaner politik, hät spåss måkt: “Wee fon hofnung leewe däit, däit forhungre.”

Den, kan dai hofnung wirklig oos helpe urer ni? Bedüürt dai hofnung dat wij bloos ni wile kijke dai daile wat passijre daue un dat wij ine droom leewe daue? Urer kan dai hofnung wirklig oos frööligkët un gesundhët geewe?

Woweegen muite wij hofnung häwe?

WAT küün mit Daniel passijre, dai klair jong wat câncer har, wat wij al sägt häwe, wen hai sij hofnung hule har? Küün hai beeter ware? Küün hai leewig sin hüüt? Kan sin dat sogår dai wat sër anglööwe daue an dai hofnung, dat dat oos helpe kan gesund sin, däire ni jå antwoore tau dës fråge. Un dat kan oos wat inlëre. Wij koine ni säge dat bloos hofnung häwe, ales in’t raich bringe däit. Dai hofnung mökt ni dai gans nood al.

Aine dag ine televison, dai dokter Nathan Cherney hät sägt oiwer ni taufeel an dai hofnung glööwe taum slechte krankhëte kurijre. Dës dokter hät soo sägt oiwer ain kërl un sijn fruug wat câncer har: “Dai kërl is sër wüütend woore mit dai fruug, weegen hai däir maine dat sai ni naug glööwt dat sai beeter ware küün”. Den, dai dokter hät soo forståe: “Dat is ain droom wen ain mësch maine däit dat bloos feel hofnung häwe mökt dat dai câncer ni slimer wart. Den, wen dai câncer slimer wart, wek anfänge andenke dat dai krank mësch hät schuld dåroiwer weegen dai ni naug glööwt hät. Åwer dai krank is ni dår wërd, dat is ni richtig mit dës mësch.”

Dat is ni richtig weegen dai wat dës krankhët doirsete daue, sin dat al lëgt dårmit. Den, wee wat ain krank mësch lijbe däit, wil ni dat dës mësch sich schuldiger forneeme däit, weegen eer dracht is al sër swår taum drågen. Den, schule wij denke dat dai hofnung kaine wërd hät?

Gans sicher ni! Dai dokter Cherney, wat wij al sägt häwe, däit ni dai lüür uppasse taum eer krankhët kurijre, åwer dat sai sich beeter befijne daue un dat sai kraft krijge koine taum dai krankhët doirsete. Dokters soo as hai, daue wirklig glööwe dat hät feele wërd dai helpe wat slecht krankhët häwe taum frööliger sin. Den, hät feel prööw dat dai hofnung kan dat måke un nog mër.

Wofeele wërd hät dai hofnung?

Dai jornalista un dokter W. Gifford-Jones hät soo sägt: “Dai hofnung däit wirklig helpe”. Hai hät saie wat passijrt is mit feel lüür, wat taum doodblijwen laige, taum waite of wërd har dës lüür helpe sich beeter befijne. Dårmit däit hai maine dat wen dai lüür hülp krijge taum dai krankhët doirsete koine sai mër hofnung häwe. In 1989 ain upsuiken is uk måkt woore un hät dat weese: wek krank lüür wat hülp krëge taum dai krankhët doirsete, häwe nog länger leewt. Åwer upsuiken wat spårer hen måkt woore sin, hät ni dat gans sicher weese. Kan sin wat is, dai upsuiken häwe weese dat dai lüür wat hülp kreege häwe taum sich beeter befijne, häwe wënig depressão un wënig waidåg as dai wat dat ni kreege häwe.

Anerd upsuiken oiwer härts krankhëte hät weese woo hofnung häwe urer ni kan dai härts angåe. Doir dës upsuiken lang, fon ain grup mit 1.300 kërls is ruuterfuune woore wee in leewend hofnung hare un wee ni. Tëgen jåre nåheer, 12% fon dës kërls häwe härts krankhët hat. Fon dës wat krankhët hat häwe, dai wat kain hofnung hare wäire bijnå twai mål mër as dai wat hofnung hare. Dai schaullërersch Laura Kubzansky, fon dai Escola de Saúde Pública de Harvard, sägt soo: “Airer as dës upsuiken wij hare kain sicherhët wen dai hofnung wirklig oos gesundhët helpe kan. Åwer, dës upsuiken wat dai dokters måkt häwe, däit klår wijse woo gaud is hofnung häwe wen man härts krankhët hät.”

Wek upsuiken häwe weese dat dai wat maine daue dat eer gesundhët swak is, ware ni soo rasch beeter nå ain cirurgij as dai wat maine daue dat sij gesundhët gaud is. Is sogår ruuterfuune woore dat dai wat hofnung häwe daue länger leewe. Ain upsuiken oiwer uld ware, hät weese woo hofnung häwe urer ni, kan dai ule lüür angåe. Nå dat dai ule lüür häwe wek daile höört un saie wat wijse däire dat uld ware hät besägen mit klaukhët, sai häwe anfånge an stark gåe. Dun, sai sin beeter woore un sin stark woore soo as sai 12 weeke ine academia gåe däire!

Woweegen kan hofnung häwe un an gaud daile denke oos gesundhët beeter måke? Kan sin dat dai uutgelërte un dai dokters ni oos gedanke un körper gaud forståe daue taum dës fråg antwoore. Lijkerst soo, dai dokters wat dës upsuiken måkt häwe, koine daile fortele wat wat up sich häwe. Ain schaullërer fon neurologia sägt soo: “Fröölig sin un hofnung häwe is sër gaud, däit oos helpe oos gaud befijne, ruig ware un dat oos körper gesund wart. Is nog ain dail wat dai lüür måke koine taum gesund sin.”

Wek psicólogos, dokters un uutgelërte lüür koine sich bewuunre dårmit, åwer dat is kain nijg dail tau dai wat dai Bijbel lëre daue. 3 duusend jåre trööguut dai klauk köönig Salomão hät ine Bijbel soo sreewe: “Ain fröölig härts is ain gaur melicin, åwer dai forsocht mësch bliwt åne kraft.” (Provérbios 17:22) Sai dat dai spruch sägt ni dat ain fröölig härts däit ain krankhët kurijre, åwer dat dat bloos “ain gaur melicin is”. Un dat wirklig t’hoopstime däit.

Nå as wij dit ales saie häwe, is gaud oos fråge: wen dai hofnung ain melicin wäir, wat fon dokter däir ni dat upsrijwe? Un nog, hofnung häwe däit mër ruutergeewe as bloos gaud gesundhët häwe.

Hofnung häwe urer ni kan dij leewend angåe

Dai uutgelërte häwe ruuterfuune dat wee hofnung hät, eer leewend wart beeter ine schaul, ine arbëd un wen sai esportes smijte daue. In ain grup fruuges wat loope däire taum gewine, dai wat eer helpe däire, häwe saie wat fon dai wäire dai beste taum loopen. Sai sin uk uutfrågt taum waite wen sai glööwe däire dat sai gewine küüne. Dårmit, dai wat eer helpe däire häwe saie dat wen sai glööwe däire dat sai gewine küüne, dat har mëre wërd as gaud loope forståe. Woweegen kan dai hofnung oos soo dul mithelpe?

Dai uutgelërte daue uk lëre oiwer kain hofnung häwe, dårmit häwe sai wek daile ruuterfuune. In dai jåre 1960, dai uutgelërte häwe wek tijre ankeeke taum oiwer eer wat lëre. Nåheer häwe sai neemlig måkt mit dai lüür. Un sai häwe ruuterfuune wat passijrt mit dai tijre un uk mit dai lüür. Ain grup lüür müst ain slecht gewald hööre wat eer ni gefale däir. Dai uutgelërte häwe sai uutdüürt sai küüne wek knööp genau ruperdrüke taum dat ni mër hööre. Un sai häwe kreege dat måkt.

Neemlig soo, is mit anerd grup lüür måkt woore – åwer mit dai, dat hät ni richtig geewt. Dai knööp häwe ni funktionijrt. Dårweegen feel in dëse grup sin forsocht woore ån waite wat sai måke küüne. Dun, in andrer daile wat sai in dai neemlige dag måke müste, sai häwe ni dai belërung någåe. Weegen dat wat airer passijrt is, sai häwe maint dat nischt loone däir. Dai psicólogos daue dës moor nene soo as “desamparo aprendido”. Åwer, sogår in dës twait grup, dai wat hofnung hare sin ni nålåte, sai sin ni forsocht woore.

Dai dokter Martin Seligman, wat dës upsuiken anfånge hät, hät wijrerlërt oiwer hofnung häwe urer ni. Hai hät feel upsuiken måkt mite lüür wat mëst ümer sich forsocht forneeme däire. Hai hät saie dat wen dai mësch ümer sich forsocht forneeme däit, dat kan eer leewend sër forstööre un mite tijd dai mësch wil nischt mër måke. Dokter Seligman hät soo sägt oiwer kain hofnung häwe un woo dat dai lüür angåe kan: “Doir dës 25 jåre lang dat ik dës upsuiken måkt häw, ik häw lërt un ik bün sicher dat wen wij ümer denke soo as air wat ümer forsocht is un maine dat ales forkërd gët, nischt sägen wat wij måke daue, wij häwe den mër swårhët as wen wij hofnung häwe.”

Wek koine maine dat is ain nijg dail, åwer dai wat dai Bijbel lëre daue dat al waite. Sai wat sägt Provérbios 24:10: “Wen’s duu forsocht ware däist in dai swår tijd, den, dijn kraft wart wënig.” Soo as duu saie kast, dai Bijbel däit klår låte dat forsocht ware un kain hofnung häwe, kan dijn kraft wegneeme. Wat kast duu den måke dat’s duu hofnung häwe däist un dat’s duu ni forsocht ware däist?

[Bijld upe sijr]

Mit hofnung ales kan aners sin

Duu kast werer hofnung krijge

WEN in dijn leewend wat passijrt wat’s duu ni luure däist, woo däist duu dij forneeme dåroiwer? Feel uutgelërte daue nuu glööwe dat, kümt up an woo’s duu dës fråg antwoore däist, kan man waite wen’s duu ain mësch büst wat hofnung hät urer ni. Wij ale daue swårhët in leewend doirsete, wek mër as andrer. Woweegen daue wek dai eelend oiwerståe un foirwärtsgåe åwer andrer daue nålåte wen wat swår passijrt, lijkerst wen ni soo groot is?

Denk man ais dat’s duu aine arbëd suike däist. Duu däist dår hengåe woo’s duu maine däist dat ain arbëd krijge kast, fortelst mit dai mësch åwer krijgst ni dai arbëd. Woo fornimst duu dij dåroiwer? Kan sin dat’s duu maine däist dat’s duu kaine wërd häst un duu sägst tau sich selwst: ‘Ik dau nij ais ain arbëd krijge.’ Urer nog slechter, kan sin dat’s duu dårweegen fängst an denken dat al dai andrer daile in dij leewend forkërd gåe daue un denkst: ‘Ik dau nischt doige’. Kan sin wat is, soo denke wist dat’s duu kaine hofnung häst.

Streng dij an taum werer hofnung krijge

Wat kast duu måke? Dai airst dail taum måken wat groote wërd hät, is forståe dat soo’n gedanke sin ni gaud. Dai twait dail taum måken is soo’n gedanke uut dij kop slåe. Dau aners denke: Is wirklig wår dat’s duu kaine arbëd krijge däirst weegen kaine dij dai arbëd geewe däir? Urer mag dat sin dat dai schef bloos ain mësch bruuke däir wat andrer daile måke forstüün?

Wen’s duu genau grüüwle däist, däist duu den saie dat’s duu dai daile maine däist slechter as dai wirklig sin. Soo denke is ni gaud. Wen ain dail ni richtig geewe däit soo as duu wile däist, bedüürt dat ales forkërd gët in dijn leewend? Wen’s duu denke däist an dai daile wat’s duu tau God mökst, an dijn familg urer an dai lüür woo’s duu ümgang häst, kast duu saie dat dai daile mëst ümer richtig geewe daue? Dau lëre dat wen’s duu ain dail saie däist as slechter as wirklig is, dat is kain hofnung wijse. Woo kast duu dij sicher sin dat’s duu nij ais ain arbëd krijge däist? Un duu kast nog mër måke taum dai hofnung werer krijge.

Dau anglööwe dat’s duu måkt krijgst wat’s duu wist

In dai lätste jåre dai uutstudijrte daue dai hofnung soo uutdüüre: hofnung häwe is wen dai mësch anglööwe däit dai daile måkt krijge wat dai wil. Soo as duu nog saie däist, dai hofnung is mër as dit. Åwer dat wat sai uutdüürt häwe kan sër mithelpe. Wen wij hofnung häwe dat wij dai daile måkt krijge wat wij wile dat is gaud tau oos.

Wen wij wek daile kreege häwe dat giwt oos hofnung dat wij andrer daile måkt krijge wat wij wile. Åwer wen’s duu maine däist dat’s duu nij ais wat måke kreege häst, kan sin dat’s duu must denke oiwer dai daile wat’s duu tau sich selwst inrichtet häst. In airste, dau dij fråge: Wat wil ik im leewend måke? Is gans licht jërer dag in looperig leewe åne denke an wat wij wirklig måke wil in oos leewend, an wat hauptsach is tau oos. Dai Bijbel däir al säge oiwer denke an wat hauptsach is in leewend. Dår stäit soo: ‘Dat jij uunersuike wat fon daile häwe mëst wërd’. (Filipenses 1:10)

Wen wij al waite wat is hauptsach tau oos is lichter wek daile uutsuike oiwer oos gloobe, in oos familg un oiwer oos arbëd. Åwer in anfang wij döre ni tau feel daile inrichte. Den is uk gaud anfänge mit dai daile wat lichter sin taum måken. Åwer wen’s duu måke wist ain dail wat is tau swår taum måkt krijge, duu kast forsocht ware un den nålåte. Dårweegen wen’s duu wat grootes måke wil, is beeter wen’s duu dat anfänge däist mit klaine daile, bet’s duu dai grötst daile måkt krijge däist.

Fon früüer heer bet hüüt däire wek lüür säge dat wen’s duu wat wünsche däist, krijgst duu dat måkt, un dat kan wår sin. Den wen wij al waite daue wat wij måke wile, muite wij oos sër anstrenge dårtau un ni nålåte. Wat kan oos helpe dat krijge? Wij muite grüüwle an wofeel wërd hät dat måke un wat gaures häwe wij wen wij dat måkt krijge. Is wår dat is ni licht, åwer wen swårhët upkåme daue wij muite dai saie soo as daile wat wij oiwerståe koine.

Åwer wij muite uk denke an wat wij måke muite taum wat krijge. Charles R. Snyder hät feel studijrt oiwer wofeel wërd hät hofnung häwe un hai hät sägt wen dat wat’s duu måke wist ni dai airst mål richtig gët, duu kast dat twait mål aners måke urer uk drür mål aners måke, un soo wijrer.

Snyder sägt uk dat wij muite lëre, wonair wij ümstele muite wat wij måke wile. Wen wij wirklig ni måkt krijge wat wij wile, wij ware forsocht wen wij bloos dåroiwer denke. Åwer wen wij ümstele daue wat wij måke wile up ain daile wat lichter is, krijge wij den werer hofnung.

Ine Bijbel hät ain geschicht wat mökt dat klår. Köönig Davi wul sër gërn air huus buuge tau Jehovaa sijn God. Åwer God hät em sägt dat Davi däir ni dat måke, wäir sijn kind Salomão wat dat måke däir. Davi is ni argrig woore mit God dårweegen, åwer hät ümstelt wat hai inrichtet hät. Hai hät anfånge an gild spåre un daile forwåre tau sijn kind Salomão helpe God sijn huus buuge. (1 Reis 8:17 bet 19, 1 Crônicas 29:3 bet 7)

Kan sin wen wij oos sër anstrenge daue, koine wij hofnung in oos leewend häwe. Åwer wen wij dat nood ine wild saie daue, kan sin dat wij ni sofeel hofnung häwe. Woweegen? Weegen koine wij ni dat nood ine ganse wild in’t raich bringe, dårweegen forneeme wij oos wek måls åne hofnung. Wen wij denke an dai feel eelend wat dai lüür ine wild doirsete daue soo as, armhët, krijg, ungerechtigkët, krankhëte un dood, woo koine wij nog soo hofnung häwe?

[Bijld upe sijr]

Wen’s duu ni dai arbëd krijge däist wat’s duu wist, däist duu maine dat’s duu kain arbëd krijge däist?

[Bijld upe sijr]

Köönig Davi hät ümstelt wat hai inrichtet hät

Woo kast duu dai wår hofnung fijne?

DENK man ais: dijn klok is stil ståe. Kan sin dai mut int raich bröcht. Wen’s duu air suike däist taum dat henstele, duu däist den saie dat sin feel wat dat måke daue. Ale daue säge dat sai dai arbëd genau måke daue. Åwer, wen’s duu ruuterfijne däist dat dai wat dai klok måkt hät, näig bij dij wåne däit? Un nog beeter, duu waiten krijge däist dat hai wil sër gërn dij ümsüss helpe. Den, is gans licht uutsuike wat måke, is ni wår?

Nuu, dau dai klok wat ni onlig gët t’hoopmaine mit dijn hofnung. Wen’s duu maine däist, dat’s duu kain hofnung häwe däist, soo as feel in dës slime tijd, woo kast duu hülp krijge? Feel daue säge wat dij helpe koine. Åwer, dat wat sai säge daue, kan swår sin taum forståe urer ni t’hoopstime däit. Den, wäir ni beeter dai suike wat oos måkt hät un oos hofnung geewt hät? Dai Bijbel sägt dat hai is ni wijdaf fon jërer ainsig fon oos un wil sër gërn oos helpe. (Atos 17:27 un 1 Pedro 5:7)

Wat mër bedüürt dai hofnung?

Ine Bijbel sägt nog mër oiwer dai hofnung as dat wat dai dokters, dai uutgelërte un dai psicólogos hüüt maine daue. Up dai språke woo dai Bijbel sreewe woore is, hofnung bedüürt wat gaures mit groot forlang luure. Hofnung hät besägen mit twai daile: wat gaures wünsche un woweegen kan man glööwe dat dai gaure daile wirklig passijre daue. Nå dai Bijbel sägt, hofnung häwe is ni bloos in ain droom leewe. Hofnung häwe is waite woweegen as duu an dat glööwe däist un prööw häwe dåroiwer weegen dai daile wat al passijrt sin.

Hofnung is neemlig soo as gloobe, wij muite wat häwe wat oos sicherhët geewe dåroiwer. (Hebreus 11:1) Åwer ine Bijbel, gloobe un hofnung sin aners. (1 Coríntios 13:13)

Wiman’s denke: Duu däist air mësch forlange woo’s duu dij upforlåte däist taum dij ain gefale måke. Kan sin dat’s duu hofnung häst dat hai dij helpe däit. Dës hofnung is ni åne wërd, weegen duu häst gloobe an dai. Duu däist em gaud kene un hät al saie dat hai sich bekümert oiwer dai andrer un fraigeewig is. Den, duu häst hofnung weegen duu häst uk gloobe an em, åwer dës twai daile sin ni dat neemlig. Woo kast duu soo’n hofnung an God häwe?

Woweegen koine wij hofnung häwe?

Fon God kümt dai wår hofnung heer. Ine früüsche tijd Jehovaa wäir nent soo as “hofnung fon Israel”. (Jeremias 14:8) Dai wår hofnung wat sij folk har, kaim fon em heer. Den, wäir hai eer hofnung. Dës hofnung däir ni bedüüre dat sai bloos wule dat wat passijre däir. Doir God, sai däire waite woweegen sai hofnung hare. Doir feel jåre lang, God hät feel daile tau eer forspråke un hät måkt dat dës daile passijre däire. Josué, dai schef fon Israel in dai tijd, hät soo sägt tau dat folk: “Jij daue gaud waite  . . . dat kain fon dai gaure wöör hät fëgelt wat Jehovaa juuch forspråke hät, al sin passijrt. Kain hät fëgelt.” (Josué 23:14)

Feel jåre nåheer, God is ni aners woore. Ine Bijbel ståe feel daile wat God forspråke hät un dat dës daile sin wirklig passijrt. Wek daile wat God forspråke hät, sin sreewe woore soo as dai al passijrt sin. Dat wijst woo dul koine wij anglööwe an dat wat God forspråke hät.

Dårweegen koine wij dai Bijbel nene soo as “hofnungs bauk”. Ji mër as duu dai Bijbel studijre däist oiwer woo God mit dai lüür wäir, ji grööter wart dijn hofnung an em. Dai apostel Paulo hät sreewe: “Dai ganse daile wat trööguut sreewe woore sin, sin sreewe taum oos inlëre, soo doir oos stramblijwen un dai tröösten fone Sriwte, koine wij hofnung häwe.” (Romanos 15:4)

Wat fon hofnung giwt God oos?

Wonair muite wij mër hofnung häwe? Dat is wen air doodblijwt, is ni wår? Åwer, wen air wat dai lüür lijbe daue doodblijwt, feel maine dat hofnung häwe is bloos air droom. Wat kan slechter sin as dem dood? Der dood wil jërer ainsig fon oos angrijpe. Wij koine ni oos forsteeke fone dood un ni forbaire dat dat passijre däit. Dårweegen sägt dai Bijbel dat der dood is oos “lätst faind”. (1 Coríntios 15:26)

Den woo koine wij hofnung fijne tau der dood? Sai dat dai neemlig spruch wat sägt dat der dood oos lätst faind is sägt uk dat dai ‘tau nischt måkt wart’. Jehovaa God is feel grööter as der dood un hai hät dat feel mål weese. Wosoo? Hai hät dai doore upleewt. Dai Bijbel sägt oiwer neegen lüür wat God mit sijn kraft upleewt hät.

Ain fon dës wat upleewt woore sin, is Lázaro wääst, Jehovaa hät sijn kind Jësus kraft geewt taum sijn amigo Lázaro upleewe. Hai wäir dood al fair dåg lang. Jësus hät ni dat haimlig måkt, åwer foir feel lüür. (João 11:38 bet 48, 53, 12:9 un 10)

Kan sin dat’s duu dij fråge däist: ‘Wat fone wërd hät dat dës lüür upleewt woore sin wen sai uld woore un doodbleewe sin?’ Is wår dat sai werer doodbleewe sin, åwer weegen dës geschichte wat wirklig passijrt sin, koine wij ni bloos wünsche dat dai lüür wat wij lijbe daue wat al dood sin upleewe daue. Dårdoir koine wij uk luure un glööwe dat dës daile wirklig passijre daue, dat bedüürt dat wij ain wår hofnung häwe.

Jësus hät sägt: ‘Ik bün dai upleewen un dai leewend.’ (João 11:25) Is tau em wat Jehovaa kraft geewe däit ine ganse wild lüür upleewe. Jësus hät sägt: ‘Kümt dai tijd woo ale dai wat im andenken grääwer sin, Jësus sijn stim hööre un kåme ruuter.’ (João 5:28 un 29) Gans sicher, al dai wat in graw lëge daue koine upleewt ware taum ine paradijs hijr upe Ër leewe.

Dai profeta Isaías däit oos denke helpe woo fain dat upleewen wart sin: “Juuch doore daue leewe, juuch doore daue upståe. Dai wat in stow lëge daue, daue upståe un juuche, weegen dijn doog, ach God is ain doog wat leewend giwt un dai Ër däit dai doore upe wild bringe.” (Isaías 26:19, Almeida Revista e Atualizada up briånisch)

Däit dat dij beschööne? Soo as air klairkind gaud forwårt is in dai mama sij körper, dai doore sin gaud forwårt in God sijn gedanke. Wosoo? Dai wat in graw lëge daue, sin gaud forwårt, weegen God wat dai gans kraft hät, in sij kop däit dai upbehule un däit nij ais dai forgeete. (Lucas 20:37 un 38) Neemlig soo as air klairkind wat sër luurt wart for dai familg un wen dai kümt dai familig sër fröölig bliwt, dai doore ware bald upleewt taum leewe in ain wild mit freere un sai ware gaud upnåme. Den sogår tau der dood giwt ain hofnung.

Woo kan dai hofnung dij helpe?

Paulo däit oos feel inlëre oiwer wofeel wërd dai hofnung hät. Hai hät oiwer ain stük fortelt wat feel wërd hät in oos krijgtüüg wat wij benutse daue taum oos gedanke behüüte: dai kapacët. (1 Tessalonicenses 5:8) Wat bedüürt dat wat Paulo sägt hät? Früüer heer as dai soldåte nåm krijg gåe däire sai hare upm kop ain kapacët fon metal, uuner dai kapacët sai hare upm kop ain müts wat fon wul urer fon leerer wäir. Dai kapacët däir mithelpe taum dai soldåte eere kop ni stööte, den sai ni doodblijwe däire. Paulo däir uutdüüre den dat soo dai kapacët dai kop behüüte däit, dai hofnung däit oos gedanke behüüte. Wen’s duu ain starke gloobe häst an God sijne wile, den dijn hofnung wart uk stark, lijkerst wen’s duu slim daile doirsete däist urer angst häst, soo häst duu ümer freere. Wij ale bruuke soo’n kapacët, is ni wår?

Paulo hät anerd dail t’hoopmaint taum uutdüüre dat dai hofnung hät besägen mit God sijne wile. Hai hät dai hofnung t’hoopmaint mit ain geschir wat dai schif fast anhåke däit. (Hebreus 6:19) Paulo däir dat gaud forståe weegen hai is leewig bleewe nog dat wënsig twai måls dat dai schif woo hai rëse däire uunergåe is. As sai saie däire dat ain unweerer kaim dai wat in dai schif arbëre däire, däire dai schif fast anhåke. Wen dai schif fast anhåkt wäir den däir dai ni ane felsen intwëbreeke däir.

Neemlig soo, wen wij ain stark hofnung häwe an dai daile wat God forspråke hät, dat kan oos helpe dës slime tijd doirsete. Jehovaa sägt dat bald, kain krijg, kain gewald, kain truur un kain dood geewe ni mër upm wild. Oos up dës hofnung hule, kan oos behüüte fon gefärlig daile, dat helpt oos uk dat wij God sijne wile måke un ni leewe soo as dai lüür fon dës wild wat sofeel slechte daile måke.

Jehovaa däit uk dij geewe dës hofnung. Hai wil dat’s duu alaine ruuterfijne däist wat fon leewend hai wil tau dij. Hai wünsch dat al sort lüür rert ware. Wosoo? Airst, jërer ainsig mut dai wårhët genau kene. (1 Timóteo 2:4) Dit ales is tau dij taureere taum dës kenen suike, wat in God sij Woord stäit, wat dijn leewend beeter måke kan. Doir dës kenen, God däit dij ain hofnung geewe wat feel grööter is as irgends ain dail wat dai wild dij anbaire kan.

Wen’s duu dës hofnung häst, däist duu dij ni alaine forneeme, weegen warst duu dij sicher up sin dat God dij dai kraft geewe däit wat’s duu bruukst taum irgends ain dail måke wat’s duu wist wat nå em sijn wile is. (2 Coríntios 4:7 un Filipenses 4:13) Is dës sort hofnung wat’s duu bruukst? Wen jå, dau ni nålåte. Duu kast dat fijne.

[Sai mër upe sijr]

Woweegen koine wij hofnung häwe?

Dës wårhëte wat ine Bijbel stäit koine dijn hofnung stark måke:

◼ God hät ain fröölig tijd wat nog kümt forspråke.

God sij Woord sägt dat dai ganse Ër ain paradijs wart woo ainig un fröölig lüür leewe daue. (Salmo 37:11, 29, Isaías 25:8, Apocalipse 21:3 un 4)

◼ God kan ni laige.

Hai däit al sort loigen hasse, weegen hai is gans un går hailig un åne fëgels. Hai kan ni laige. (Provérbios 6:16 bet 19, Isaías 6:2 bet 3, Tito 1:2 un Hebreus 6:18)

◼ God sijn kraft wart nij ais al.

Bloos Jehovaa hät al gans kraft. Kaine un nischt kan em forbaire taum måken wat hai forspråke hät. (Êxodo 15:11, Isaías 40:25 un 26)

◼ God wil dat’s duu up ümer leewe schast.

(João 3:16, 1 Timóteo 2:3 un 4)

◼ God däit ümer glööwe dat wij oos best måke daue.

Hai däit ümer denke an oos gaure daile un soo as wij oos anstrenge daue airer as an oos fëgels denke. (Salmo 103:12 bet 14, 130:3 un Hebreus 6:10) Hai däit glööwe dat wij måkt krijge wat richtig is un hai däit sij frööge wen wij dat måke. (Provérbios 27:11)

◼ God sägt dij dat hai däit dij helpe måke wat’s duu måke wist wat soo is as em sijne wile.

Dai wat God dijne daue, daue nij ais åne hofnung sich forneeme. Hai däit oos frai geewe dai grötst kraft wat giwt, sijn hailig gaist. (Filipenses 4:13)

◼ An God glööwe is nij ais unnüte.

Hai is gans un går reäl un wij koine up em oos forlåte. Hai däit nij ais fëgle mit oos. (Salmo 25:3)

[Sai mër upe sijr]

Soo as ain kapacët dai kop behüüte däit, dai hofnung behüüt oos gedanke

[Sai mër upe sijr]

Soo as ain schif wat fast anhåkt is, ain stark hofnung kan dij helpe upståe sin

[Höört tau]

Bild fon Cortesia de René Seindal/Su concessione del Museo

Archeologico Regionale A. Salinas di Palermo