paMarkus
16 Onkee ano konima yesiku lyEsabati, Maria Magdalena, Maria yina yaJakob nosho wo Salome oya landa iigwanga ya nika nawa, opo ya ka gwayeke omudhimba gwaJesus. 2 Opo nduno ongula onene mesiku lyotango lyoshiwike, sho etango tali piti, oye ya kombila.* 3 Oya li taya pulathana taya ti: “Olye te tu kuthile po emanya posheelo shombila?” 4 Ihe sho ya tala kombila, oya mono kutya emanya olya undulwa po nale, nonando olya li enene noonkondo. 5 Sho ya yi mo mombila, oya mono omulumentu omugundjuka a kuutumba kolulyo, a zala onguwo ontokele, noya haluka. 6 Okwa ti kuyo: “Inamu tila. Otamu kongo Jesus Omunasareti, ngoka a li a alelwa komuti. Okwa yumudhwa. Ke po mpaka. Taleni, pehala mpaka opo ya li ye mu langeka. 7 Ihe indeni, ka lombweleni aalongwa ye nosho wo Petrus kutya, ‘Ote mu tetekele kuGalilea. Oko tamu ke mu mona hoka, ngaashi owala e mu lombwelele.’” 8 Onkee ano sho ya zi mo mombila, oya zi po taya matuka taya kakama ya kwatwa kuumbanda. Ihe inaya lombwela nando omuntu sha, oshoka oya li ya tila.*