PaJohannes

7 Konima yaashika, Jesus okwa tsikile okuuvitha* muGalilea, oshoka ka li a hala okuuvithila muJudea, molwaashoka Aajuda oya li ya hala oku mu dhipaga. 2 Ihe Oshituthi shAajuda shOmatsali gIihwa osha li popepi. 3 Onkee ano aamwayinamati oya ti kuye: “Za mo muka, wu ye kuJudea, opo aalongwa yoye wo yaahoka nayo ya mone iilonga, mbyoka to longo. 4 Oshoka kapu na nando omuntu ta vulu okulonga sha meholamo, ngele okwa hala okutseyika. Ngele oto longo iilonga mbika, ihololela uuyuni.” 5 Aamwayinamati kaya li nokuli ya ulike kutya oye na eitaalo muye. 6 Onkee ano Jesus okwa ti kuyo: “Ethimbo lyandje inali thika natango, ihe ne ethimbo kehe olye mu opalela. 7 Uuyuni kawu na etompelo lyoku mu tonda, ihe ngame owu tonde ndje, oshoka ohandi popi kutya iilonga yawo iiwinayi. 8 Ne otamu vulu okuya koshituthi. Ngame itandi vulu manga okuya koshituthi, oshoka ethimbo lyandje inali thika lela natango.” 9 Onkee ano konima sho e ya lombwele iinima mbika, okwa kala muGalilea.

10 Ihe sho aamwayinamati ya yi koshituthi, naye okwa yi wo. Ine shi ninga ye mu wete, ihe omeholamo. 11 Onkee ano Aajuda oya tameke taye mu kongo poshituthi taya ti: “Omulumentu ngoka oku li peni?” 12 Mongundu yaantu omwa li oyendji taya nongona kombinga ye. Yamwe oya li taya ti: “Oye omulumentu omwaanawa.” Omanga yalwe ya li taya ti: “Ke shi omulumentu omwaanawa. Ota pukitha aantu.” 13 Nokuli kapu na nando omuntu a li a popi kombinga ye montaneho yaantu, oshoka oya li ya tila Aajuda.

14 Sho oshituthi sha li shi li pokupwa, Jesus okwa yi motempeli e ta tameke okulonga aantu. 15 Opo ihe Aajuda oya li ya kumwa, taya ti: “Omulumentu nguka ontseyo yOmanyolo yi thike mpaka okwe yi adha peni, ngele ina longwa koosikola dhopalongelokalunga?”* 16 Jesus okwe ya yamukula ta ti: “Shoka handi longo aantu kashi shi omadhiladhilo gandje mwene, ihe osha za kwaangoka a tuma ndje. 17 Ngele opu na ngoka a hala okulonga ehalo lyaKalunga, ota ka dhimbulula kutya shoka handi longo aantu osha za kuKalunga, nenge osha za kungame mwene. 18 Kehe ngoka ta popi omadhiladhilo ge mwene ota kongo esimano lye mwene. Ihe kehe ngoka ta kongo esimano lyaangoka e mu tuma, oye omunashili nomuyuuki. 19 Mbela Moses ine mu pa Ompango? Ihe kapu na nando ogumwe gwomune ha vulika kuyo. Omolwashike mwa hala okudhipaga ndje?” 20 Ongundu yaantu oye mu yamukula ya ti: “Shila owu niwe kondemoni. Olye a hala oku ku dhipaga?” 21 Jesus okwe ya yamukula ta ti: “Onda longo owala oshikumithalonga shimwe, ihe oshe mu kumitha amuhe. 22 Omolwetompelo ndika, Moses okwe mu pa ompango yi na ko nasha nekenko. Inayi za kuye, ihe oya zi koohokulululwa, nohamu kenke aalumentu mesabati. 23 Ngele ohamu kenke aalumentu mesiku lyesabati, opo kaamu teye Ompango yaMoses, omolwashike mwa geela ndje noonkondo, sho nda aludha omulumentu mesabati? 24 Etheni po okupangula omuntu sha ikolelela keholokopo lye lyokombanda, ihe panguleni pauyuuki.”

25 Nena yamwe yomuJerusalem oya tameke taya ti: “Omulumentu nguka haye ya li ya hala okudhipaga?” 26 Ihe taleni, ota popi montaneho yaantu, noitaya ti sha kuye. Mbela aapangeli oye shi tseya kutya nguka oye Kristus? 27 Ihe tse otu shi shi kutya omulumentu nguka okwa za peni; nuuna Kristus te ya, kapu na ngoka ta ka kala e shi kutya okwa za peni.” 28 Opo ihe sho Jesus a li ta longo aantu motempeli okwa igidha ta ti: “Omu shi ndje, nomu shi mpoka nda za. Inandi ya kehalo lyandje mwene, ihe ngoka a tuma ndje oko e li shili, nokamu mu shi. 29 Ngame ondi mu shi, oshoka ngame omukalelipo gwe, noye a tuma ndje.” 30 Onkee ano oya tameke okukonga ompito, ye mu kwate po, ihe kapwa li nando ogumwe e mu gumu, oshoka ethimbo lye kalya li lya thika natango. 31 Nonando ongawo, oyendji yomongundu ndjoka oye mu itaale, noya li taya ti: “Uuna Kristus e ya, mbela ota ka longa ngaa iikumithalonga oyindji yi vulithe mbyoka ya longwa komulumentu nguka?”

32 Sho Aafarisayi ya uvu ongundu ndjono tayi ngungutula kombinga yaJesus omolwiinima mbyoka, aayambi aakuluntu nAafarisayi oya tumu aalangeli yotempeli ye ke mu kwate po. 33 Opo nduno Jesus okwa ti kuyo: “Otandi kala nane uule wokathimbo okafupi, manga inaandi shuna kungoka a tumu ndje. 34 Otamu ka konga ndje, ihe itamu ka mona ndje, naahoka tandi yi itamu vulu okuya ko.” 35 Onkee ano Aajuda oya pulathana taya ti: “Omulumentu nguka okwa hala okuya peni, mpoka itaatu vulu oku mu mona? Mbela okwa hala okuya kAajuda, mboka ya ihanena mokati kAagreka, e ta ka longa Aagreka? 36 Mbela okwa hala okutya shike, sho a ti: ‘Otamu ka konga ndje, ihe itamu ka mona ndje, naahoka tandi yi itamu vulu okuya ko’?”

37 Mesiku lyahugunina lyoshituthi, ndyoka lya li lya simanenena,* Jesus okwa thikama nokwa igidha ta ti: “Ngele opu na ngoka a sa enota, ne ye kungame, a nwe. 38 Kehe ngoka a itaala ndje ota ka ningilwa ngaashi enyolo tali ti: ‘Meni lye otamu tondoka omeya ge na omwenyo.’” 39 Ihe Jesus okwa popi ngawo shi na ko nasha nombepo ondjapuki, ndjoka ya li poku ka pewa mboka ye mu itaala, oshoka pethimbo ndyoka, kaya li ya gandjwa, molwaashoka Jesus ka li a tumbalekithwa natango. 40 Sho yamwe yomongundu ndjoka ya uvu oohapu ndhoka, oya tameke taya ti: “Nguka omuhunganeki shili.” 41 Yamwe oya li taya ti: “Nguka oye Kristus.” Ihe yalwe oya li taya ti: “Mbela Kristus ota zi ngaa muGalilea? 42 Enyolo nani inali tya kutya Kristus ota ka za moluvalo lwaDavid nosho wo muBetlehem, komukunda hoka David a za?” 43 Onkee ano mokati kongundu ndjoka omwa holoka oontamanana kombinga ye. 44 Nonando yamwe yomuyo oya li ya hala oku mu kwata po, kapu na nando ogumwe e mu gumu.

45 Opo nduno aalangeli yotempeli oya shuna kaayambi aakuluntu nokAafarisayi, noye ya pula taya ti: “Omolwashike inaamu mu eta huka?” 46 Aalangeli yotempeli oya yamukula taya ti: “Inatu mona nando onale omulumentu ta popi ngaashi ye.” 47 Aafarisayi oya ti kuyo: “Nane wo omwa pukithwa? 48 Mbela opu na ngaa gumwe gwomaapangeli, nenge gwomAafarisayi e mu itaala? 49 Ihe ongundu ayihe ndjika yaantu kaayi shi Ompango oya thingwa.” 50 Nikodemus, gumwe gwomAafarisayi, ngoka a yile kuJesus, okwa ti kuyo: 51 Mbela pampango yetu, manga inaatu pangula omuntu, tango ihatu mu pula, opo tu tseye shoka a ninga?” 52 Oya ti kuye: “Ano nangoye wo Omugalilea? Ka konakone Omanyolo, wu mone kutya muGalilea itamu zi omuhunganeki nando.”*