Yotango kAakorinto
1 Ngame Paulus, ngoka nda hogololwa ndi ninge omuyapostoli gwaKristus Jesus pahalo lyaKalunga, nondi li pamwe nomumwatate Sostenes, 2 otandi nyolele egongalo lyaKalunga, ndyoka li li muKorinto, oomboka mwa yapulwa muukumwe naKristus Jesus, nomwa hogololwa, mu ninge aayapuki, pamwe naayehe yomomahala gi ili nogi ili, mbono haya ithana edhina lyOmuwa gwetu Jesus Kristus, Omuwa gwawo nogwetu wo:
3 Uuwanawahenda nombili, ndjoka hayi zi kuKalunga, Tate yetu, nosho wo kOmuwa Jesus Kristus, nayi kale pamwe nane.
4 Ohandi pandula aluhe Kalunga kandje omolwuuwanawahenda waKalunga, mboka e mú ulukila okupitila muKristus Jesus; 5 molwaashoka omolwe, Kalunga okwe mú pe iinima ayihe, mbyoka mu na, mwa kwatelwa uunongo wa ihwa po wokuuvitha oohapu dhaKalunga nosho wo ontseyo ya ihwa po, 6 ngaashi owala uumbangi kombinga yaKristus wa kolekwa mokati keni, 7 opo mwaa kale mwa pumbwa nando osha,* manga mwa tegelela nondjuulukwe esiku, ndyoka Omuwa gwetu, Jesus Kristus, ta ka holoka. 8 Ote ke mú koleka wo sigo ehulilo, opo mesiku lyOmuwa gwetu Jesus Kristus kaapu ka kale nando ogumwe te mú tamanekele sha. 9 Kalunga omudhiginini, ngoka e mú hogolola, mu kale muukumwe nOmwana Jesus Kristus, Omuwa gwetu.
10 Otandi mú kumagidha, aamwatate, okupitila medhina lyOmuwa gwetu Jesus Kristus, amuhe mu kale hamu uvathana, opo mokati keni mwaa kale etopoko, ihe mu kale mwa hangana thiluthilu mu na edhiladhilo limwe noku tala ko iinima momukalo gwa faathana. 11 Oshoka yamwe yaandjaKloe oya lombwela ndje kutya ne, aamwatate, kamu uvitathane mokati keni. 12 Shoka nda hala okutya osho shika, yamwe yomune ohamu ti: “Ngame ogwaPaulus,” yalwe ohaya ti: “Ngame ogwaApollos,” omanga yalwe haya ti: “Ngame ogwaKefas”* nayalwe ohaya ti: “Ngame ogwaKristus.” 13 Mbela Kristus okwa topolwa ano moongundu? Mbela Paulus okwa alelwa komuti gwomahepeko omolweni? Nenge omwa ninginithwa medhina lyaPaulus? 14 Otandi pandula Kalunga sho inaandi ninginitha nando ogumwe gwomune, kakele kaKrispus naGaius, 15 opo kaapu kale nando ogumwe ta ti kutya okwa ninginithwa medhina lyandje. 16 Eeno, onda ninginitha wo Stefanas naanegumbo lye. Kakele kayo, kandi shi shi ngele onda ninginitha yalwe ishewe. 17 Oshoka Kristus ina tuma ndje ndi ninginithe, ihe ondi uvithe onkundana ombwanawa; hanuunongo wopantu, opo omuti gwomahepeko* gwaKristus kaagu kale kaagu na oshilonga.
18 Oshoka etumwalaka kombinga yomuti gwomahepeko* olyo uugoya kwaamboka taya ka hanagulwa po, ihe kwaamboka taya ka hupithwa olyo oonkondo dhaKalunga. 19 Oshoka okwa nyolwa taku ti: “Uunongo waanongo otandi wu hulitha po, noondunge dhaanandunge itandi dhi taamba.”* 20 Aanongo oye li peni? Aalongimpango* oye li peni? Oonkulungu dhokuludhika dhomuuyuni mbuka* odhi li peni? Mbela Kalunga ine shi ulika kutya uunongo wuuyuni owo uugoya? 21 Oshoka omolwuunongo waKalunga, uuyuni inawu mu tseya okupitila muunongo wawo. Pehala lyaashono, Kalunga okwa li a hokwa okuhupitha mboka ya itaala metumwalaka, ndyoka yalwe ya tala ko li li uugoya.
22 Oshoka Aajuda otaya pula omandhindhiliko, nAagreka otaya kongo uunongo. 23 Ihe otatu uvitha kutya Kristus okwa alelwa komuti, shoka tashi pundukitha Aajuda, noshi li uugoya kiigwana. 24 Ihe mboka ya ithanwa kuKalunga, Aajuda nAagreka, kuyo Kristus oye oonkondo dhaKalunga nuunongo waKalunga. 25 Molwaashoka oshinima shaKalunga, shoka aantu ya tala ko shi li uugoya, oshi vule aantu muunongo, noshinima shaKalunga shoka aantu ya tala ko kaashi na oonkondo, oshi vule aantu moonkondo.
26 Aamwatate, omu shi shi kutya aantu, mboka a hogolola, pataloko lyopantu, oyendji yomuyo kaye na oondunge, oyendji yomuyo kaye na oonkondo, noyendji yomuyo inaya za momazimo ga simana, 27 ihe Kalunga okwa hogolola iinima, mbyoka uuyuni wa tala ko yi li uugoya, opo a sithe ohoni aanongo; na Kalunga okwa hogolola iinima, mbyoka uuyuni wa tala ko kaayi na oonkondo, opo a sithe ohoni iinima, mbyoka yi na oonkondo; 28 na Kalunga okwa hogolola wo iinima, mbyoka uuyuni wa tala ko inaayi simana noya dhinika, ano iinima, mbyono kaayi po, opo mbyoka yi li po yi kale inaayi simana, 29 opo pwaa kale nando ogumwe* ta itanga koshipala shaKalunga. 30 Ihe omolwe, omwa hangana naKristus Jesus, ngoka e tu pa uunongo wa za kuKalunga. Okupitila muye, Kalunga okwe tu ningi aayuuki naayapuki, nokwe tu mangulula okupitila mekulilo, 31 opo shi kale ngaashi kwa nyolwa taku ti: “Ngoka ta itanga na itangele Jehova.”