paMarkus

10 Okuza mpoka, Jesus okwa yi koongamba dhaJudea handiyaka yaJordan, nongundu yaantu oye mu gongalele ishewe. Opo nduno okwa tameke oku ya longa ngaashi he shi ningi shito. 2 Opo ihe Aafarisayi oye ya kuye nelalakano lyoku mu makela, noye mu pula ngele osha pitikwa ngaa pampango omulumentu a teye ondjokana nomukulukadhi gwe. 3 Okwe ya yamukula ta ti: “Moses okwe mu lombwela shike?” 4 Oya ti: “Moses okwa pitike omusamane a nyole onzapo yeteyondjokana e te mu laleke a ye.” 5 Ihe Jesus okwa ti kuyo: “Ompango ndjoka okwe yi mu nyolele omolwokwaavulika kweni. 6 Ihe okuza petameko lyeshito, ‘Okwe ya shiti omulumentu nomukiintu, 7 nomolwoshinima shoka omulumentu oku na okuthiga po he nayina, 8 oyo notaya ningi omuntu gumwe,’ opo kaaya kale we yaali, ihe omuntu gumwe. 9 Onkee ano shoka Kalunga a tula kumwe, inashi kuthwa kumwe nando okomuntu.” 10 Sho ya yi ishewe megumbo lyontumba, aalongwa oya tameke oku mu pula kombinga yoshinima shoka. 11 Okwa ti kuyo: “Kehe ngoka ta teya ondjokana nomukulukadhi gwe e ta hokana gulwe, ota hondele, 12 nongele omukulukadhi a teya ondjokana nomusamane gwe e ta hokanwa kugulwe, ota hondele.”

13 Opo nduno aantu oya tameke okweeta aanona kuye e ya gume, ihe aalongwa oye ya keelele. 14 Sho Jesus e shi mono, okwa geye nokwa ti kuyo: “Etheni aanona ye ye kungame; inamu ya keelela ko, oshoka Uukwaniilwa waKalunga owaamboka ye ya fa. 15 Oshili tandi mu lombwele, kehe ngoka itaa taamba ko Uukwaniilwa waKalunga ongokanona, ita ka ya mo muwo.” 16 Opo nduno okwa papatele aanona e ta tameke oku ya yambeka moku ya tenteka iikaha ye.

17 Sho Jesus a li mondjila ta yi, omulumentu gumwe okwa matukile kuye e ta tsu oongolo komeho ge, nokwe mu pula ta ti: “Muhongi omwaanawa, ondi na okuninga shike, opo ndi ka mone omwenyo gwaaluhe?” 18 Jesus okwa ti kuye: “Omolwashike to ithana ndje Muhongi omwaanawa? Kaku na ngoka omwaanawa, kakele kaKalunga awike. 19 Iipango owu yi shi: ‘Ino dhipaga, ino hondela, ino yaka, ino fundja, ino kengelela, simaneka ho nanyoko.’” 20 Omulumentu ngoka okwa ti kuye: “Muhongi, iinima ayihe mbyoka onda kala tandi vulika kuyo okuza kuugundjuka wandje.” 21 Jesus okwe mu tala e mu hokwa e ta ti kuye: “Opu na ishewe oshinima shimwe shoka wa pumbwa okuninga. Inda wu ka landithe po iinima yoye ayihe, iimaliwa e to yi pe oohepele, noto kala wu na eliko megulu, opo nduno to ya wu landule ndje.” 22 Ihe sho e shi uvu, okwa uvu nayi e ta zi po a nika oluhodhi, oshoka okwa li e na omaliko ogendji.

23 Konima sho Jesus a tala kaantu, okwa ti kaalongwa ye: “Kashi shi tuu oshidhigu kwaamboka aayamba okuya mUukwaniilwa waKalunga!” 24 Ihe aalongwa oya li ya kuminwa oohapu dhe. Opo nduno Jesus okwa ti: “Aamwandje, kashi shi tuu oshidhigu okuya mUukwaniilwa waKalunga! 25 Oshipu kongamelo okupita meyulu lyonane, shi vulithe okuya kwomulumentu omuyamba mUukwaniilwa waKalunga.” 26 Aalongwa oya li ya kumwa noonkondo noya ti kuye:* “Olye ano nduno ta vulu okuhupithwa?” 27 Jesus okwe ya tala e ta ti kuyo: “Pataloko lyopantu itashi wapa, ihe kapu na shoka tashi nyenge Kalunga.” 28 Opo ihe Petrus okwa ti kuye: “Tala, otwa thiga po iinima ayihe e tatu ku landula.” 29 Jesus okwa ti: “Oshili tandi mu lombwele, kapu na ngoka a thiga po egumbo lye, nenge aamwayinamati, nenge aamwayinakadhona, nenge yina, nenge he, nenge oyana, nenge epya lye omolwandje nomolwonkundana ombwanawa, 30 a kale ando itaa mono lwethele muuyuni mbuka omagumbo, aamwayinamati, aamwayinakadhona, ooyina, oyana, omapya, pamwe nomahepeko, nomuuyuni tawu ya omwenyo gwaaluhe. 31 Ihe oyendji mboka aatango otaya ka ninga aahugunini, naamboka aahugunini otaya ka ninga aatango.”

32 Omanga Jesus naalongwa ye ya li taya yi kuJerusalem, Jesus okwe ya tetekele komeho, ihe aalongwa ye oya li ye shi kuminwa, nayamwe, mboka ya li ye mu landula, oya li ya tila. Opo nduno okwa ithana po aayapostoli ye 12 e te ya lombwele kombinga yiinima, mbyoka e li poku ka ningilwa, ta ti: 33 “Taleni, otatu yeni kuJerusalem, nOmuna gwomuntu ota ka gandjwa miikaha yaayambi aakuluntu noyaalongimpango. Otaye ke mu tokolela eso, notaye ke mu gandja miikaha yaantu yomiigwana, 34 opo ihe otaye ke mu sheka, taye mu hiyile omayeye e taye mu dhipaga, ihe konima yomasiku gatatu, ota ka yumudhwa.”

35 Jakob naJohannes, oyana yaSebedeus, oye ya kuJesus e taye mu pula taya ti: “Muhongi, otwa hala wu tu ningile kehe shoka tatu ku indile.” 36 Jesus okwa ti kuyo: “Omwa hala ndi mu ningile shike?” 37 Oya ti kuye: “Tu pitika tu ka kuutumbe pamwe nangoye mUukwaniilwa woye,* gumwe okolulyo lwoye, namukwawo okolumoho lwoye.” 38 Ihe Jesus okwa ti kuyo: “Kandi wete mu shi shoka tamu pula. Otamu vulu ngaa okunwa moshitenga, shoka ndi li pokunwa, nokuninginithwa neninginitho, ndyoka tandi ninginithwa?” 39 Oya ti kuye: “Eeno, otatu vulu.” Opo nduno Jesus okwa ti kuyo: “Oshitenga shoka tandi nu, osho tamu ka nwa, neninginitho ndyoka tandi ninginithwa, olyo tamu ka ninginithwa. 40 Ihe okukuutumba kolulyo lwandje, nenge kolumoho lwandje hangame tandi shi utha, ihe Tate oye te shi utha.”*

41 Sho aalongwa yalwe omulongo ye shi uvu, oya li ya geyela noonkondo Jakob naJohannes. 42 Ihe Jesus okwa ithana aalongwa ye kuye e ta ti kuyo: “Omu shi shi kutya mboka ya talika ko ye li aapangeli yiigwana ohaya kala ya itala ko ya simana ye vule aalelwa yawo, naanenentu ohaye ya pangele ngaashi ya hala. 43 Ne hasho mu na okukala ngaaka. Ihe kehe ngoka a hala a kale omunene mokati keni, na kale omuyakuli gweni, 44 nakehe ngoka a hala okukala omutango mokati keni, na kale omupiya gweni amuhe, 45 oshoka nokuli nOmuna gwomuntu ine ya okuyakulwa, ihe okuyakula nokugandja omwenyo gwe gu li iikulila omolwoyendji.”

46 Opo nduno oya yi kuJeriko. Ihe sho Jesus naalongwa ye nosho wo ongundu onene yaantu ya li taya zi muJeriko, Bartimeus (omwana gwaTimeus), omuheheli omuposi, okwa li a kuutumba pooha dhondjila. 47 Sho a uvu kutya ngoka ta ende po oJesus Omunasareti, okwa tameke okwiigidha ta ti: “Jesus, Omuna gwaDavid, sila ndje ohenda!” 48 Opo nduno oyendji oya tameke oku mu ganda e taye mu lombwele a kale a mwena, ihe okwa tsikile owala okwiigidha ta ti: “Omuna gwaDavid, sila ndje ohenda!” 49 Onkee ano Jesus okwa thikama e ta ti: “Mu ithaneni e ye kungame.” Opo ihe oya ithana omulumentu ngoka omuposi, noya ti kuye: “Ino tila! Thikama; ote ku ithana.” 50 Opo nduno okwa hula mo onguwo ye yokombanda nokwa thikama nziya e ta yi kuJesus. 51 Opo ihe Jesus okwa ti kuye: “Owa hala ndi ku ningile shike?” Omulumentu ngoka omuposi okwa ti kuye: “Muhongi,* tsikulula ndje.” 52 Jesus okwa ti kuye: “Inda nombili, eitaalo lyoye olye ku aludha.” Nziya, omeho ge oga tsikuluka, nokwa tameke oku mu landula.