Ontiyali kAakorinto
9 Shi na ko nasha nokuyakula aayapuki, inandi pumbwa lela oku mú nyolela, 2 oshoka ondi shi shi kutya omwa halelela okukwathela. Otandi mú itangele kAamakedonia, nonde ya lombwela kutya omumvo aguhe, ne, ooitaali yomuAkaia, omwa kala mwa ilongekidha okukwathela. Molwaashoka omwa halelela okugandja, osha inyengitha oyendji yomuyo nayo ya kale wo ya hala okugandja. 3 Ihe otandi mú tumine aamwatate, opo eitango lyetu lyoku mú itangela moshinima shika kaali kale lyowala, ne mu kale mwa ilongekidha, ngaashi nde ya lombwela. 4 Oshoka ngele otwe ya pamwe nAamakedonia e tatu mú adha inaamu ilongekidha, otashi ke tu sitha ohoni, sho twe mú inekela, notashi ke mú sitha ohoni wo. 5 Onkee ano onda li ndi wete shi li pandunge, ndi ladhipike aamwatate ye ye kune komeho yethimbo, ndi adhe ya longekidha iikwatha, mbyoka mwa uvaneka okugandja, opo yi kale ya longekidhwa yi li omagano gehalo ewanawa, ihe inayi gandjwa kethiminiko.
6 Shoka nda hala okutya ooshono kutya ngoka ta kunu nuuluya ota teya wo oshishona, naangoka ta kunu oshindji ota ka teya wo oshindji. 7 Kehe gumwe na gandje ngaashi a tokola momutima gwe, hanokungungutula,* nenge kethiminiko, oshoka Kalunga oku hole mboka haya gandja nehalo ewanawa.
8 Shimwe ishewe, Kalunga ota vulu oku mú ulukila uuwanawahenda we uunene, opo mu kale aluhe mu na kehe shoka mwa pumbwa nosha gwana, opo mu gwanithe po oshilonga kehe oshiwanawa. 9 (Ngaashi owala kwa nyolwa taku ti: “Okwa gandja omagano ogendji; okwa gandja koohepele. Uuyuuki we otawu kala sigo aluhe.” 10 Ngoka ha gandja oombuto odhindji komukuni nosho wo iikwiila yokulya ote ke mú pa oombuto mu kune, nota ka indjipalitha iizemo iiwanawa yiilonga yeni yuuyuuki.) 11 Moshinima kehe, Kalunga ote ke mú yambeka, opo mu vule okugandja oshindji momukalo kehe, opo ya pandule Kalunga omolwomagano geni, ngoka tatu ya pe; 12 okugandja ekwatho lya tya ngaaka itaku ka kwathela owala aayapuki, mboka ye na ompumbwe, ihe otaku ka inyengitha wo aayapuki oyendji ya pandule Kalunga. 13 Molwaashoka sho tamu gandja omagano ngoka otamu ulike kutya ne aantu ya tya ngiini, naantu otaya ka hambelela Kalunga, oshoka ohamu katuka metsokumwe nonkundana ombwanawa, ndjoka hamu uvitha yi na ko nasha naKristus, nomolwashono hamu gandja kuyo nehalo ewanawa nokaantu ayehe. 14 Otaye ke mú galikanena, notaya ka ulika kutya oye mú hole omolwuuwanawahenda uunene, mboka mwa ulukilwa kuKalunga.
15 Kalunga na pandulwe omolwomagano ge kaage shi okutumbulwa.