paMarkus

9 Jesus okwe ya lombwele ishewe a ti: “Oshili tandi mu lombwele, putse mpaka opwa thikama yamwe, mboka itaaya ka makela eso nando, sigo oosho tango ya mono Uukwaniilwa waKalunga wa dhikwa po.” 2 Konima yomasiku gahamano, Jesus okwa kutha Petrus, Jakob naJohannes e ta yi nayo kondundu ondeendeka, ye li oyo ayeke. Opo nduno okwa shituluka montaneho yawo; 3 nonguwo ye yokombanda oya tameke okwaadhima e tayi toka to, nokapu na gumwe kombanda yevi a li a vulu okutokeka oonguwo ngaaka. 4 Shimwe ishewe, Elia naMoses oya holoka komeho gawo, noya li taya kundathana naJesus. 5 Opo ihe Petrus okwa ti kuJesus: “Muhongi,* oshe tu opalela okukala mpaka. Onkee ano tu pitika tu dhike omatsali gatatu mpaka, limwe olyoye, limwe olyaMoses nekwawo olyaElia.” 6 Petrus ka li e shi kutya na ninge shike nokuli, oshoka oya li ya tila noonkondo. 7 Opo ihe oshikogo osha holoka e tashi ya siikile, nomwa zi ewi tali ti: “Nguka Omumwandje, omuholike; pulakeneni kuye.” 8 Ihe nziya sho ya lengalenga, oya mono owala Jesus oye awike.

9 Omanga ya li taya londoloka kondundu, Jesus okwe ya londodha kaaya lombwele nando omuntu kombinga yaashoka ya mono, sigo oosho Omuna gwomuntu a yumudhwa kuusi. 10 Oohapu ndhoka oye dhi pungula momitima dhawo,* ihe oya kundathana kutya okwa hala okutya shike, sho a ti kutya ota ka yumudhwa kuusi, 11 noya tameke oku mu pula taya ti: “Omolwashike aalongimpango haya ti Elia oye e na okuya tango?” 12 Okwa ti kuyo: “Elia oku na okuya tango nota ka ukitha iinima ayihe. Ihe ongiini ano sho kwa nyolwa kutya Omuna gwomuntu ota ka hepekwa noonkondo nokudhinwa? 13 Ihe ngame otandi mu lombwele kutya Elia okwa li e ya, noya ungaunga naye ngaashi ya hala, ngaashi naanaa sha nyolwa kombinga ye.”

14 Sho ya galukile kaalongwa ooyakwawo, oya dhimbulula kutya oya ngundumanenwa kongundu yaantu, nopwa li aalongimpango taya ludhikathana nayo. 15 Ihe nziya sho ongundu yaantu ya mono Jesus, oya li ya kumwa noya matukile kuye ye ke mu kunde. 16 Onkee ano okwe ya pula ta ti: “Otamu ludhikathana kombinga yashike?” 17 Opo ihe gumwe gwomongundu yaantu okwe mu yamukula a ti: “Muhongi, onde ku etela omumwandjemati, molwaashoka oku na ombepo ya nyata* ye mu thitika ewi. 18 Uuna ye mu kwata, ohayi mu hata pevi e ta tameke okututuma ondutu mokana nokwiikokota komayego noha kanitha oonkondo. Onda pula aalongwa yoye ye yi tidhe mo, ihe inaya vula oku yi tidha mo.” 19 Jesus okwe mu yamukula a ti: “Yakwetu, epipi ndika kaali na eitaalo, sigo uunake ndi na okukala nane? Sigo uunake ndi na oku mu idhidhimikila? Mu eteni huka kungame.” 20 Onkee ano oya eta omumati kuye, ihe sho ombepo ya nyata* ya mono Jesus, oya thathalitha omumati. Konima sho ye mu hata pevi, okwa kala ta galangata nota tutuma ondutu mokana. 21 Opo nduno Jesus okwa pula he yomumati a ti: “Okwa kala he shi ningi uule wethimbo li thike peni?” He okwa ti: “Okuza kuunona we, 22 nolundji ohayi mu undulile momulilo nosho wo momeya, opo yi mu dhipage. Ihe ngele oto vulu okuninga po sha, tu sila ohenda wu tu kwathele.” 23 Jesus okwa ti kuye: “Omolwashike to ti kutya, ‘Ngele oto vulu?’ Kehe shimwe otashi vulu okuningilwa ngoka e na eitaalo.” 24 Nziya, he yomumati okwa igidha ta ti: “Ondi na eitaalo! Ihe kwathela ndje ndi kale ndi na eitaalo lya kola.”

25 Sho Jesus a mono ongundu yaantu tayi matuka ya uka kuyo, okwa ganda ombepo ya nyata,* ta ti: “Mbepo ya nyata, ngoye ho ningitha omuntu kaa vule okupopya nokuuva ko, otandi ku lombwele, za mo muye, noino shuna mo we muye!” 26 Konima sho ya igidha e tayi thathalitha omumati, oya zi mo muye. Omumati okwa li ta monika a fa a sa, naantu oyendji oya li taya ti: “Okwa sa!” 27 Ihe Jesus okwe mu kwata moshikaha e te mu ambidhidha a thikame. 28 Onkee ano konima sho a yi megumbo lyontumba, aalongwa ye oye mu pula ye li po oyo ayeke taya ti: “Omolwashike tse inaatu vula oku yi tidha mo?” 29 Okwa ti kuyo: “Oombepo dha nyata* dholudhi ndoka ohadhi vulu owala okutidhwa mo kegalikano.”

30 Okuza mpoka, oya yi e taya pitile muGalilea, ihe ka li a hala aantu ye shi tseye, 31 oshoka okwa li ta longo aalongwa ye noku ya lombwela ta ti: “Omuna gwomuntu ota ka gwaalekwa e ta gandjwa miikaha yaantu, notaye ke mu dhipaga, ihe nonando ota ka dhipagwa, ota ka yumudhwa mesiku etitatu.” 32 Ihe kaya li ye uvite ko oohapu dhe ndhoka noya li ya tila oku mu pula.

33 Opo ihe oye ya muKapernaum. Sho Jesus a yi megumbo lyontumba, okwa pula aalongwa ye a ti: “Mondjila, omwa li tamu ludhikathana kombinga yashike?” 34 Oya kala owala ya mwena, oshoka oya li taya ludhikathana mondjila kutya olye omunene mokati kawo. 35 Onkee ano okwa kuutumba nokwa ithana aayapostoli ye 12 e ta ti kuyo: “Ngele opu na ngoka a hala okukala omutango mokati keni, oye na kale omuhugunini kwaayehe nomuyakuli gwaayehe.” 36 Opo nduno Jesus okwa kutha okanona e te ka thikameke mokati kawo; nokwe ka kwata komapepe e ta ti kuyo: 37 “Kehe ngoka ta taamba ko kamwe komaanona ngaashi haka medhina lyandje okwa taamba ndje ko wo; nakehe ngoka ta taamba ndje ko, hangame owala a taamba ko, ihe naangoka wo a tuma ndje.”

38 Johannes okwa ti kuye: “Muhongi, otwa mono gumwe ta tidha mo oondemoni medhina lyoye, notwa kambadhala oku mu keelela, molwaashoka ke shi gumwe gwomutse.” 39 Ihe Jesus okwa ti: “Inamu kambadhala oku mu keelela, oshoka kaku na ngoka ta vulu okulonga oshikumithalonga medhina lyandje e ta popile ndje ishewe muuwinayi. 40 Kehe ngoka kee li ompinge natse okwa gama kutse, 41 nakehe ngoka te mu pe oshitenga shomeya mu nwe, molwaashoka mu li aalongwa yaKristus, oshili tandi mu lombwele, ita kala nando inaa pewa ondjambi ye. 42 Ihe kehe ngoka ta pundukitha gumwe gwomwaambaka aashona ye na eitaalo, oshi li hwepo a mangelwe emanya lyoshini mothingo, ndyoka hali tanaunwa kokasino e ta umbilwa mefuta.

43 “Ngele oshikaha shoye otashi ku yonitha, shi teta ko, oshoka oshi li hwepo oku ka mona omwenyo wu li oshilema, shi vulithe okukala niikaha yoye ayihe iyali e to umbilwa muGehenna,* ano momulilo ngoka itaagu vulu okudhimwa. 44 —— 45 Ngele ompadhi yoye otayi ku yonitha, yi teta ko, oshoka oshi li hwepo oku ka mona omwenyo wu li oshitiningili, shi vulithe okuumbilwa muGehenna* wu na oompadhi dhoye adhihe mbali. 46 —— 47 Ngele eho lyoye otali ku yonitha, li tsipula mo e to li ekelehi, oshoka oshi li hwepo okuya mUukwaniilwa waKalunga wu na eho limwe, shi vulithe okukala wu na omeho goye agehe gaali e to umbilwa muGehenna,* 48 moka mu na omazinyo ihaaga si, nomulilo ihaagu dhimi.

49 “Aantu ya tya ngaaka otaya ka lokithilwa omulilo ngaashi owala omuntu ta gundu omongwa miikulya. 50 Omongwa omwaanawa, ihe ngele ogwa kanitha omulyo,* otagu toyalekwa we nashike? Kaleni mu na omongwa mune yene nokukala nombili mokati keni.”