PaLukas

22 Sho oshituthi shiikwiila inaayi tulwa efulika, shoka hashi ithanwa Opaasa, sha li pokuthika, 2 aayambi aakuluntu naalongimpango oya li taya kongo ompito tayi opalele ya dhipage Jesus, oshoka oya li ya tila aantu. 3 Opo nduno sho Satana a nwetha mo* Judas, ngoka ha ithanwa Iskariot, gumwe gwomaayapostoli 12, 4 Judas okwa yi a ka popye naayambi aakuluntu naawiliki yaalangeli yotempeli kombinga yankene e na oku mu gandja miikaha yawo.* 5 Oya li ye shi nyanyukilwa, noya uvathana oku mu pa iimaliwa yiisiliveli. 6 Onkee ano okwa zimine, nokwa tameke okukonga ompito tayi opalele e mu gandje miikaha yawo* kaapu na ongundu yaantu.

7 Sho esiku lyotango lyiikwiila inaayi tulwa efulika lya thiki, moka hamu yambwa eyambo lyOpaasa, 8 Jesus okwa tumu Petrus naJohannes, ta ti: “Indeni mu ke tu longekidhile uulalelo wOpaasa tu lye.” 9 Oya ti kuye: “Openi wa hala tu ke wu longekidhe?” 10 Okwa ti kuyo: “Taleni, uuna mwa yi moshilando, omulumentu a humbata oshiyuma shomeya ote ke mu tsakaneka. Mu landuleni, sigo omegumbo, moka ta yi. 11 Opo nduno lombweleni mwene gwegumbo ndyoka, tamu ti: ‘Muhongi ota ti: “Openi pu na ondunda yaayenda, moka tandi vulu okulila Opaasa pamwe naalongwa yandje?”’ 12 Opo ihe omulumentu ngoka ote mu ulukile ondunda onene yopombanda ya opalekwa nawa. Moka omo mu na okulongekidhila uulalelo wOpaasa.” 13 Onkee ano oya yi, noya adha ayihe yi li ngaashi Jesus e ya lombwela e taya longekidha uulalelo wOpaasa.

14 Sho ethimbo lya thiki, okwa kuutumba a endeka poshililo* naayapostoli ye. 15 Opo ihe okwa ti kuyo: “Onda halelela okulya pamwe nane Opaasa ndjika, manga inaandi ka hepekwa. 16 Oshoka ngame otandi mu lombwele, itandi ke yi lya we, sigo oosho iinima ayihe, mbyoka ye yi pamba, ya gwanithwa mUukwaniilwa waKalunga. 17 Opo nduno okwa taamba oshitenga, nokwa galikana e ta ti: “Taambeni oshitenga shika e tamu shi paathana, 18 oshoka ngame otandi mu lombwele, okuza ngashingeyi itandi ka nwa we omaviinu, sigo oosho Uukwaniilwa waKalunga we ya.”

19 Okwa kutha wo oshikwiila, ta galikana e te shi pambula, nokwe shi ya pe, ta ti: “Oshikwiila shika otashi thaneke olutu lwandje, ndoka talu gandjwa omolweni. Kaleni hamu shi ningi mu dhimbulukwe ndje.” 20 Konima sho ya li uulalelo, okwa kutha wo oshitenga, ta ningi sha faathana, ta ti: “Oshitenga shika otashi thaneke ehangano epe, ndyoka tali kolekwa kombinzi yandje, ndjoka tayi tilwahi omolweni.

21 “Ihe tala, ngoka ta gwaaleke ndje oku li pamwe nangame poshililo. 22 Odhoshili kutya Omuna gwomuntu ota ka sa, ngaashi sha hunganekwa. Ihe yayee, omulumentu, ngoka te ke mu gwaaleka! 23 Onkee ano oya tameke okupulathana kutya olye lela gwomokati kawo te ke shi ninga.

24 Ihe mokati kawo omwa tukuluka wo oontamanana kutya olye gwomuyo e na okutalika ko omunene e vule ooyakwawo. 25 Opo ihe okwa ti kuyo: “Aakwaniilwa yiigwana ohaya kala ya itala ko ya simana ye vule aalelwa yawo, naamboka haye ya pangele ohaya pewa omadhinasimaneko ga ikalekelwa.* 26 Onkee ano ne hasho mu na okukala ngawo. Ihe ngoka omunene mokati keni na kale a fa oye omushona, naangoka ta kwatele komeho na kale a fa oye omuyakuli. 27 Oshoka olye omunene? Oye ngoka ta li,* nenge oye ngoka ta yakula? Haye ngoka ta li? Ihe ngame ondi li mokati keni nda fa omuyakuli.

28 “Ihe ne one mwa kala pamwe nangame momamakelo gandje, 29 notandi ningi ehangano nane, ngaashi owala Tate a ninga ehangano nangame omolwuukwaniilwa, 30 opo mu ka vule okulya nokunwa poshililo shandje mUukwaniilwa wandje, nokukuutumba kiipangelapundi, mu pangule omazimo 12 gaIsraeli.

31 “Simon, Simon, tala, Satana okwa indila e mu yele amuhe, ngaashi iilya. 32 Ihe onde ku galikanena nda mana mo, opo eitaalo lyoye lyaa nkundipale, nongele wa galuka, koleka aamwaho.” 33 Opo nduno Petrus okwa ti kuye: “Omuwa, ngame onda ilongekidha okusa pamwe nangoye nokuya nangoye mondholongo.” 34 Ihe Jesus okwa ti kuye: “Ngame otandi ku lombwele, Petrus, nena ndjika manga ekondombolo inaali iga, oto ka idhimbika ndje lutatu.”

35 Jesus okwa ti wo kuyo: “Mbela sho nde mu tumine mu ka uvithe kaamu na okampunda kiimaliwa, ompunda yiikulya nosho wo oongaku, omwa li mu na ompumbwe yasha?” Oya ti: “Aawe!” 36 Opo ihe okwa ti kuyo: “Ihe ngashingeyi, ngoka e na okampunda kiimaliwa nompunda yiikulya ne yi kuthe, nosho wo ngoka kee na egongamwele na landithe po onguwo ye yokombanda, a ilandele egongamwele. 37 Oshoka ngame otandi mu lombwele kutya shoka sha nyolwa oshi na okugwanithilwa ndje, sho kwa tiwa: ‘Okwa yalulilwa maakolokoshi.’ Oshoka shika otashi gwanithilwa ndje.” 38 Opo nduno oya ti: “Omuwa, tala, otu na po omagongamwele gaali.” Okwa ti kuyo: “Oga gwana.”

39 Sho a zi po, okwa yi kOndundu yOoholivi, ngaashi ha ningi shito, naalongwa ye wo oye mu landula. 40 Sho a thiki kehala ndyoka, okwa ti kuyo: “Tsikileni okugalikana, opo kaamu iyethele momamakelo.” 41 Opo nduno okwe ya thigi po okakako okashona ke thike pedhaadhigo lyemanya, nokwa tsu oongolo e ta tameke okugalikana 42 ta ti: “Tate, ngele owa hala, kutha ndje oshitenga shika. Ihe hakehalo lyandje, ihe okehalo lyoye.” 43 Opo nduno omuyengeli a za megulu okwa holokele Jesus e mu tse omukumo. 44 Ihe sho a li a taalela onkalo ndjoka ondhigu noonkondo, okwa kala ta galikana a mana mo; nomazigudhe ge oga li ga fa omata gombinzi tayi ndondele pevi. 45 Sho a mana okugalikana, okwa yi kaalongwa ye, nokwe ya adha ya kotha, oshoka oya li ya vulwa, omolwokunika oluhodhi. 46 Okwa ti kuyo: “Omolwashike mwa kotha? Pendukeni e tamu tsikile okugalikana, opo kaamu iyethele momamakelo.”

47 Manga a li ta popi, tala, opwe ya ongundu yaantu, nomulumentu ha ithanwa Judas, gumwe gwomaayapostoli 12, oye a li e ya kwatela komeho, nokwe ya puJesus e te mu hupita. 48 Ihe Jesus okwa ti kuye: “Judas, oto gwaaleke Omuna gwomuntu moku mu hupita?” 49 Sho mboka ya li pamwe naJesus ya mono shoka shi li pokuningwa po, oya ti: “Omuwa, natu ya kondjithe nomagongamwele?” 50 Gumwe gwomuyo okwa umpile nokuli omupiya gwomuyambi omunene, nokwa tete ko okutsi kwe kwokolulyo. 51 Ihe Jesus okwa ti: “Inamu ninga ngaaka.” Opo nduno okwa gumu okutsi kwomupiya ngoka, nokwe mu aludha. 52 Opo ihe Jesus okwa lombwele aayambi aakuluntu, aawiliki yaalangeli yotempeli nosho wo aakuluntu yoshigwana, mboka ye ya oku mu kwata po, ta ti: “Omwe ya okukwata ndje po mu na omagongamwele noondhimbo, mwa fa mwe ya okukwata po omuyugi? 53 Sho nda li handi kala nane motempeli esiku nesiku, inamu kwata ndje po. Ihe ndika olyo ethimbo lyeni, nolyoonkondopangelo dhomilema.”

54 Opo nduno oye mu kwata po e ta ya yi naye, noye mu eta megumbo lyomuyambi omunene. Ihe Petrus okwa li a landula mo e li kokule kashona. 55 Sho aantu ya tema omulilo pokati kehale, oya kuutumba, na Petrus okwa kuutumba pamwe nayo. 56 Ihe sho okakadhona kamwe okapiya ke mu mono a kuutumba pomulilo ta huhulukwa, oke mu tala take mu konenene, noka ti: “Omulumentu nguka naye okwa li pamwe naJesus.” 57 Ihe okwe shi ipatana, ta ti: “Mukiintu ngoye, omulumentu ngoka kandi mu shi.” 58 Konima yokathimbo, omuntu gulwe okwe mu mono, nokwa ti: “Nangoye ogumwe gwomuyo.” Ihe Petrus okwa ti: “Mentu ngoye, hangame.” 59 Konima yowili yimwe lwaampono, omulumentu gumwe naye okwa tameke oku shi koleka ta ti: “Odhoshili kutya omulumentu nguka naye wo okwa li naJesus, oshoka ota ulike kutya ye Omugalilea.” 60 Ihe Petrus okwa ti: “Mentu ngoye, kandi shi kutya oto popi kombinga yashike.” Opo nduno, nziya, manga a li ta popi, ekondombolo olya igi. 61 Opo ihe Omuwa okwa punguluka, nokwa tala Petrus e mu ukilila, na Petrus okwa dhimbulukwa oohapu dhOmuwa, ndhoka e mu lombwelele, sho a ti: “Nena, manga ekondombolo inaali iga, oto ka idhimbika ndje lutatu.” 62 Okuza mpoka okwa yi pondje, nokwa lili nokulililila.

63 Aalumentu, mboka ya li ya langela Jesus, oya tameke oku mu sheka noku mu dhenga. 64 Nokonima sho ya siikile oshipala she, oya kala taye mu pula taya ti: “Tu lombwela* kutya olye e ku dhenge.” 65 Opo nduno oye mu ula wo omalaka galwe ogendji taye mu sheke.

66 Sho kwa shi, aakuluntu yoshigwana ayehe, mwa kwatelwa aayambi aakuluntu naalongimpango, oya gongala pamwe e taya fala Jesus mehala lyOmpangu yoPombanda yAajuda, noya ti kuye: 67 “Tu lombwela ngele ongoye Kristus.” Ihe okwa ti kuyo: “Nonando ondi mu lombwele, itamu itaale ndje nando. 68 Shimwe ishewe, nonando ondi mu pule, itamu kala mwa hala okuyamukula ndje. 69 Nonando ongawo, okuza ngashingeyi, Omuna gwomuntu ota ka kuutumba kolulyo lwaKalunga omunankondo.” 70 Opo ihe ayehe oya ti: “Ano ongoye Omuna gwaKalunga?” Okwa ti kuyo: “Eeno, ongaashi ne yene tamu shi popi kutya ongame.” 71 Oya ti: “Uumbangi ishewe wuni twa pumbwa? Atuheni otwa uvu shoka a popi nokana ke mwene.”