PaJohannes

11 Omulumentu gwedhina Lasarus, gwomomukunda Betania, omumwayina gwaMaria naMarta, okwa li ta ehama. 2 Maria, omumwayina gwaLasarus, ngoka a li ta ehama, oye a li a gwayeke oompadhi dhOmuwa nomagadhi ga nika nawa e te dhi theta nomafufu ge. 3 Onkee ano aamwayinakadhona yaLasarus oya tumu etumwalaka kuJesus taya ti: “Omuwa, tala, kuume koye, ngoka wu hole ota ehama.” 4 Ihe sho Jesus e shi uvu, okwa ti: “Uuwehame mbuka itawu fala meso, ihe otawu simanekitha Kalunga, opo Omuna gwaKalunga naye a simanekithwe okupitila muwo.”

5 Jesus okwa li e hole Marta, Maria naLasarus. 6 Ihe sho Jesus a uvu kutya Lasarus ota ehama, kehala, hoka a li, okwa kala ko natango uule womasiku gaali. 7 Konima yaashika, okwa lombwele aalongwa ye ta ti: “Natu shuneni kuJudea.” 8 Aalongwa oya ti kuye: “Muhongi,* Aajuda opo owala ya li ya hala oku ku dhenga* nomamanya, ihe owa hala okushuna ko natango?” 9 Jesus okwe ya yamukula ta ti: “Mbela esiku ka li na oowili 12? Ngele omuntu ota ende muuyelele, kapu na shoka tashi mu pundukitha, molwaashoka oku wete uuyelele wuuyuni mbuka. 10 Ihe ngele opu na ngoka ta ende uusiku, ota punduka, molwaashoka muye kamu na uuyelele.”

11 Konima sho a popi oohapu ndhoka, okwa gwedha ko ta ti: “Kuume ketu Lasarus okwa kotha, notandi yi ko, ndi ke mu penduthe.” 12 Opo nduno aalongwa oya ti kuye: “Omuwa, ngele okwa kotha, ota aluka.” 13 Jesus okwa li ta popi kombinga yeso lyaLasarus, ihe aalongwa oya li taya dhiladhila kutya ota popi kombinga yoomposi dho dhene. 14 Opo ihe Jesus okwe ya lombwele sha yela ta ti: “Lasarus okwa sa, 15 ihe onawa, sho inaandi adhika ko, opo mu vule okwiitaala. Natu yeni ko kuye.” 16 Onkee ano Tomas, ngoka ha ithanwa Omukwanambwiyu, okwa lombwele aalongwa ooyakwawo ta ti: “Natse wo natu yeni, tu ka seni pamwe naJesus.”

17 Sho Jesus a thiki, okwa adha nale Lasarus a kala uule womasiku gane mombila.* 18 Betania osha li popepi naJerusalem, nopwa li oshinano shookilometa ndatu lwaampono.* 19 Aajuda oyendji oya li ye ya okuhekeleka Marta naMaria omolweso lyomumwayinamati. 20 Sho Marta a uvu kutya Jesus oku li mondjila te ya, okwa yi, e ke mu tsakaneke. Ihe Maria okwa kala megumbo a kuutumba. 21 Opo nduno Marta okwa ti kuJesus: “Omuwa, andola opo wa li, ando omumwamememati ina sa. 22 Ihe nonando ongawo, ondi shi kutya kehe shoka to pula Kalunga, ote shi ku pe.” 23 Jesus okwa ti kuye: “Omumwanyoko ota ka yumuka.” 24 Marta okwa ti kuye: “Ondi shi kutya ota ka yumuka mesiku lyahugunina.” 25 Jesus okwa ti kuye: “Ongame eyumuko nomwenyo. Ngoka ta ulike kutya oku na eitaalo mungame, nonando oku se, ota ka kala ishewe nomwenyo; 26 nakehe ngoka e na omwenyo, nota ulike kutya oku na eitaalo mungame, ita si sigo aluhe.* Mbela shika owe shi itaala?” 27 Marta okwa ti kuJesus: “Eeno, Omuwa, onda itaala kutya ongoye Kristus, Omuna gwaKalunga, ngoka a li e na okuya muuyuni.” 28 Sho a popi ngawo, okwa yi e ta ka ithana omumwayina Maria, nokwe mu lombwele, ye li po oyo ayeke, ta ti: “Muhongi okwe ya, note ku pula.” 29 Sho Maria e shi uvu, okwa thikama nziya e ta yi kuJesus.

30 Jesus ka li natango a thika momukunda ngoka, ihe okwa li natango pehala, mpoka a tsakanekwa kuMarta. 31 Sho Aajuda, mboka ya li megumbo taya hekeleke Maria, ya mono kutya okwa thikama nziya e ta zi mo, oye mu landula, taya dhiladhila kutya ota yi kombila,* a ka lilile hoka. 32 Sho Maria a thiki mpoka Jesus a li, okwe mu mono e ta tsu oongolo poompadhi dhe, nokwa ti kuye: “Omuwa, andola opo wa li, ando omumwameme ina sa.” 33 Sho Jesus a mono Maria nosho wo Aajuda, mboka ye ya pamwe naye, taya lili, okwa fudha* muule e ta kala a nika oluhodhi. 34 Opo nduno Jesus okwa ti: “Omwe mu langeke peni?” Oya ti kuye: “Omuwa, ila, wu ka tale po.” 35 Opo ihe Jesus okwa lili. 36 Nena Aajuda oya tameke taya ti: “Taleni, okwa li e mu hole noonkondo shili!” 37 Yamwe yomuyo oya ti: “Omolwashike omulumentu, ngoka a tsikulula omuposi, inaa keelela eso lyaanguka?”

38 Opo nduno Jesus okwa fudha* ishewe mokule e ta yi kombila.* Ombila ndjoka oya li ekololo, nopwa li pwa edhilwa nemanya. 39 Jesus okwa ti: “Undulii po emanya.” Opo nduno Marta, omumwayina gwanakusa, okwa ti kuJesus: “Omuwa, oku na okukala nokuli ta nika, oshoka okwa ninga mo ngashingeyi omasiku gane.” 40 Jesus okwa ti kuye: “Inandi ku lombwela kutya ngele owa itaala, oto ka mona oonkondo dhaKalunga?” 41 Onkee ano oya undula po emanya. Opo nduno Jesus okwa ligamene kegulu, nokwa ti: “Tate, otandi ku pandula, sho wa uva egalikano lyandje. 42 Ondi shi kutya oho uvu ndje aluhe. Ihe otandi popi ngeyi, omolwongundu yaantu, mbaka ya kundukidha ndje, opo ya itaale kutya ongoye wa tuma ndje.” 43 Sho a popi oohapu ndhoka, okwa igidha mokule ta ti: “Lasarus, za mo!” 44 Omulumentu ngoka a li a sa okwa zi mo, a siikilwa nelapi koshipala, nokwa dhingilwa nomalapi komaako sigo okomagulu. Jesus okwa ti kuyo: “Mu mangululeni e tamu mu etha, a ye.”

45 Onkee ano Aajuda oyendji, mboka ya li ye ya kuMaria, noya mono shoka Jesus a ningi, oye mu itaale, 46 ihe yamwe yomuyo oya yi kAafarisayi e taye ya lombwele shoka Jesus a ningi. 47 Onkee ano aayambi aakuluntu nAafarisayi oya gongaleke Ompangu yoPombanda yAajuda, noya ti: “Molwaashoka omulumentu nguka ota longo iikumithalonga oyindji, oshike tu na okuninga po? 48 Ngele otwe mu etha a tsikile okuninga ngawo, aantu ayehe otaya ka itaala muye, nAaroma otaye ke ya e taye tu kutha otempeli* noshigwana shetu. 49 Ihe gumwe gwomuyo, Kajafas, ngoka a li omuyambi omunene omumvo ngoka, okwa ti kuyo: “Ne onkalo kamu yi uvite ko 50 nosho wo kutya oshi lile po uuwanawa weni omuntu gumwe a se pehala lyaantu ayehe, shi vulithe oshigwana ashihe shi hanagulwe po.” 51 Shoka ine shi popya pahalo lye mwene, ihe molwaashoka oye a li omuyambi omunene omumvo ngoka, okwa hunganeke kutya Jesus ota ka sila oshigwana. 52 Hashigwana owala, ihe oku na wo okugongela oyana yaKalunga, mboka ya li ya ihanena apuhe. 53 Onkee ano okuza esiku ndyoka, oya pangele ompangela, ye mu dhipage.

54 Onkene Jesus ka li we ha ende montaneho yAajuda, ihe okwa yi koshilando shi li popepi nombuga, hashi ithanwa Efraim, nokwa kala hoka pamwe naalongwa ye. 55 Oshituthi shOpaasa shAajuda osha li popepi, naantu oyendji oya li ya yi kuJerusalem, ya za komikunda, omanga oshituthi shoka inaashi thika, opo ya yogolwe sha ikolelela kOmpango yaMoses. 56 Opo ihe oya li taya kongo Jesus, noya pulathana, manga ya li ya thikama motempeli, taya ti: “Otamu ti ngiini? Mbela ote ya ngaa koshituthi?” 57 Ihe aayambi aakuluntu nAafarisayi oya gandja elombwelo kutya ngele opu na ngoka e shi kutya Jesus oku li peni, ne ya tseyithile, opo ya vule oku mu kwata po.