PaJohannes
21 Konima yaashika, Jesus okwa ihololele ishewe aalongwa ye, pefuta lyaTiberias. Sho e ya ihololele, shika osho sha ningwa po: 2 Simon Petrus oya li pamwe naTomas, ngoka ha ithanwa Omukwanambwiyu, naNatanael, ngoka a za kuKana shomuGalilea, noyanamati yaSebedeus nosho wo naalongwa ye yamwe yaali. 3 Simon Petrus okwa ti kuyo: “Otandi yi, ndi ka yule oohi.” Oya ti kuye: “Natse otatu yi nangoye.” Opo nduno oya yi e taya londo mowato, ihe uusiku mboka, inaya kwata sha.
4 Ihe sho eluwa tali tende, Jesus okwa li a thikama pomunkulofuta, ihe aalongwa ye inaye mu dhimbulula kutya oye. 5 Opo nduno Jesus okwa ti kuyo: “Aamwandje, omu na ngaa sha* shokulya?” Oye mu yamukula ya ti: “Aawe!” 6 Okwa ti kuyo: “Umbileni onete yeni kolulyo lwowato, notamu kwata oohi.” Onkee ano oye yi umbile mo, ihe inaya vula oku yi nanena mo mowato, molwaashoka oohi odha li odhindji noonkondo. 7 Opo ihe omulongwa, ngoka a li e holike kuJesus, okwa ti kuPetrus: “Nani Omuwa.” Sho Simon Petrus a uvu kutya Omuwa, okwa zala onguwo ye yokombanda, molwaashoka okwa li e li owala* e ta nukile mefuta. 8 Ihe aalongwa yalwe oye ya nokawato okashona, taya hili onete ndjoka ya udha oohi, molwaashoka kaya li unene kokule nomutunda. Oya li owala kokule noshikako shoometa 100 lwaampono.
9 Sho ye ya komunkulofuta, oya adha oohi niikwiila pomakala tayi yothwa. 10 Jesus okwa ti kuyo: “Eteni oohi dhimwe, ndhoka opo mwa kwata.” 11 Onkee ano Simon Petrus okwa yi mowato e ta hili mo onete ya udha oohi oonene, dhi li 153. Nonando oohi odha li odhindji noonkondo, onete inayi tuuka. 12 Jesus okwa ti kuyo: “Ileni, mu lye oshuumbululwa.” Ihe molwaashoka aalongwa oya li ye shi kutya Omuwa, kapu na nando ogumwe e mu pula kutya: “Ongoye lye?” 13 Jesus okwe ya e ta kutha iikwiila e te yi ya pe, nokwe ya pe wo oohi. 14 Shoka osho sha li oshikando oshititatu, Jesus ta ihololele aalongwa ye, konima sho a yumudhwa kuusi.
15 Sho ya mana okulya oshuumbululwa, Jesus okwa ti kuSimon Petrus: “Simon, omuna gwaJohannes, owu hole ndje ngaa shi vulithe mbika?” Okwa ti kuye: “Eeno, Omuwa, owu shi shi kutya ondi ku hole.” Jesus okwa ti kuye: “Palutha oonzigona dhandje.” 16 Jesus okwe mu pula ishewe oshikando oshitiyali ta ti: “Simon, omuna gwaJohannes, owu hole ndje ngaa?” Okwe mu yamukula ta ti: “Eeno, Omuwa, owu shi shi kutya ondi ku hole.” Jesus okwa ti kuye: “Litha uunzigona wandje.” 17 Jesus okwe mu pula ishewe oshikando oshititatu ta ti: “Simon, omuna gwaJohannes, owu hole ndje ngaa?” Petrus okwa tameke okukala a nika oluhodhi, sho Jesus e mu pula oshikando oshititatu ta ti: “Owu hole ndje ngaa?” Onkee ano okwa ti kuJesus: “Omuwa, iinima ayihe owu yi shi; owu shi kutya ondi ku hole.” Jesus okwa ti kuye: “Palutha uunzigona wandje. 18 Oshili tandi ku lombwele, sho wa li omugundjuka, owa li ho izaleke ngoye mwene, nowa li ho yi kehe mpoka wa hala. Ihe uuna wa koko, oto ka yelutha omaako goye e to zalekwa kugumwe, note ke ku fala hoka inoo hala.” 19 Okwa popi ngawo, a ulike kutya Petrus ota ka sa eso lya tya ngiini, opo a simanekithe Kalunga. Konima sho a popi ngawo, okwa ti kuye: “Tsikila okulandula ndje.”
20 Petrus okwa punguluka, nokwa mono omulongwa, ngoka a li e holike kuJesus, te ya landula, ngoka wo a li a egamena pontulo yaJesus, sho ya li taya li uulalelo, nokwa li a ti: “Omuwa, olye ngoka te ke ku gwaaleka?” 21 Onkee ano sho Petrus e mu mono, okwa pula Jesus ta ti: “Omuwa, oshike tashi ningilwa omulumentu nguka?” 22 Jesus okwa ti kuye: “Ngele onda hala a kale nomwenyo, sigo tandi ya, oshi na shike nangoye? Ngoye tsikila owala okulandula ndje.” 23 Onkee ano ehokololo, kombinga yomulongwa ngoka kutya ita si, olya taandele mokati kaamwatate. Ihe Jesus ine mu lombwela kutya ita si, ihe okwa ti: “Ngele onda hala, a kale nomwenyo, sigo tandi ya, oshi na shike nangoye?”
24 Omulongwa ngoka oye a hokolola kombinga yiinima mbika, noye a nyola kombinga yayo, notu shi shi kutya ehokololo lye olyoshili.
25 Opu na wo iinima yilwe oyindji Jesus a ninga, mbyoka inaayi nyolwa, nongele andola iinima mbyoka oya nyolelwe, ando oondhingambo ndhoka inadhi gwana mo muuyuni.