Ontiyali kAatessalonika
3 Hugunina, aamwatate, kaleni hamu tu galikanene, opo oohapu dhaJehova dhi tsikile okutaandela neendelelo, nodhi simanekwe, ngaashi owala tadhi simanekwa mokati keni. 2 Tu galikaneneni wo, opo Kalunga e tu hupithe kwaamboka ya nika oshiponga nokaakolokoshi, oshoka haantu ayehe ye na eitaalo. 3 Ihe Omuwa omudhiginini, note ke mú koleka noku mú gamena kumwiinayi. 4 Kakele kaashono, otu na einekelo mOmuwa kombinga yeni kutya ohamu landula omalombwelo getu, notamu ka tsikila oku shi ninga. 5 Omuwa na tsikile okuwilika omitima dheni nomupondo, mu kale mu hole Kalunga, nomu kale mu na eidhidhimiko, opo mu vule okutsikila okulandula Kristus.
6 Aamwatate, otatu mú pe omalombwelo okupitila medhina lyOmuwa gwetu, Jesus Kristus, kaamu endathane nakehe omumwatate, ngoka kee na elandulathano,* noiha kala metsokumwe nomalombwelo, ngoka twe mú pa.* 7 Oshoka omu shi shi ne yene nkene mu na oku tu holela, molwaashoka sho twa kala mokati keni, katwa li tu na eihumbato ewinayi, 8 noinatu lya nando iikulya yomuntu oshali.* Mepingathano naashono, otwa longo nuudhiginini nokupusha omutenya nuusiku, opo kaatu tsike nando ogumwe gwomune omutenge omudhigu. 9 Nonando otwa li tu na uuthemba wokupewa iinima kune, inatu wu longitha, ihe otwe mú tulile po oshiholelwa, mu shi landule. 10 Nokuli sho twa li mokati keni, otwa li hatu mú lombwele kutya: “Ngoka inaa hala okulonga ina lya.” 11 Oshoka otwa uva kutya mokati keni omu na yamwe, mboka kaaye na elandulathano, aananyalo, nohaya idhopo owala miinima, mbyoka inaayi ya pamba. 12 Aantu ya tya ngaaka otatu ya lombwele noku ya kumagidha okupitila mOmuwa Jesus Kristus kutya naya longe meimweneneno, nokulya iikulya, mbyoka ya longela yo yene.
13 Kombinga yeni, aamwatate, inamu sa uunye okulonga uuwanawa. 14 Ihe ngele opu na gumwe, ngoka itaa vulika koohapu dhetu, ndhoka dhi li montumwafo ndjika, mu ndhindhilikeni,* noinamu endathana naye, opo a se ohoni. 15 Nonando ongawo, inamu kala mwe mu tala ko e li omutondi, ihe tsikileni oku mu pukulula e li omumwaho.
16 Omuwa ye mwene, ngoka ha gandja ombili, na tsikile aluhe oku mú pa ombili momikalo adhihe. Omuwa na kale pamwe nane amuhe.
17 Ngame Paulus, otandi mú kundile po noohapu, ndhoka nda nyola noshikaha shandje mwene, ngaashi handi ningi montumwafo kehe; osho handi nyola ngeyi.
18 Uuwanawahenda wOmuwa gwetu, Jesus Kristus, nawu kale pamwe nane amuhe.