KAagalati

2 Opo nduno konima yomimvo 14, onda shuna ishewe kuJerusalem pamwe naBarnabas, notwa yi wo pamwe naTitus. 2 Onda yi ko, sho nda hololelwa emoniko, nonde ya lombwele onkundana ombwanawa, ndjoka tandi uvitha mokati kiigwana. Shoka onda li owala nde shi lombwele aalumentu, mboka ya li ya talika ko ya simana megongalo, opo ndi shilipaleke ngele otandi longele Kalunga momukalo gwa uka, nenge hasho. 3 Nonando ongawo, nokuli naTitus, ngoka a li pamwe nangame, ka li a thiminikwa a kenkwe, nonando okwa li Omugreka. 4 Ihe ompata ndjoka oye ya po omolwayamwe, mboka ya li taya iti kutya aamwatate, ya iyakele megongalo, ye tu ndaadhe, opo ya yone po emanguluko lyetu, ndyono tu na, sho tu li muukumwe naKristus Jesus, nelalakano lyoku tu ningitha aapikeelela yompango; 5 tse inatu igandja kuyo nando okashona, nokuli nonando uule wokathimbo kowala,* opo mu vule okutsikila okudhiginina oshili yi na ko nasha nonkundana ombwanawa.

6 Ihe kombinga yaamboka taya monika ya fa ya simana, kaye na shoka taya longo ndje oshipe, kutya nduno oya li oyo oolye, kungame kapu na eyooloko, oshoka Kalunga iha tala eholokopo lyomuntu lyokombanda. 7 Mepingathano naashono, sho ya mono kutya onda inekelelwa oshinakugwanithwa shokuuvithila aantu onkundana ombwanawa, mboka inaaya kenkwa, ngaashi Petrus a li a inekelelwa okuuvithila mboka ya kenkwa — 8 oshoka ngoka a pa Petrus oonkondo a uvithile mboka ya kenkwa oye wo a pa ndje oonkondo ndi vule okuuvithila iigwana — 9 sho Jakob, Kefas* nosho wo Johannes, mboka ya talika ko ye li oongudhi, ya dhimbulula kutya onda ulukilwa uuwanawahenda, oye tu minike naBarnabas noshikaha shokolulyo, ya ulike kutya otaya tsu kumwe natse, opo tse tu ka uvithile iigwana, omanga yo taya ka uvithila mboka ya kenkwa. 10 Oye tu lombwele owala tu kaleke oohepele momadhiladhilo, oshinima, shoka nangame nda li nda halelela oku shi ninga.

11 Ihe sho Kefas* e ya kuAntiokia, onde mu ganda nde mu ukilila molwaashoka okwa li lela a puka. 12 Oshoka manga aalumentu yontumba, mboka ya li ya tumwa kuJakob inaaye ya, okwa li ha li pamwe naantu yomiigwana. Ihe sho ye ya, okwa etha po oku shi ninga, nokwa itopola ko kuyo, oshoka okwa li a tila mboka ya kenkwa. 13 Aajuda ooyakwawo nayo oya li ye mu holele mokwiiningitha* ya fa ihaaya li pamwe naantu yomiigwana, noya li wo ya nwetha mo Barnabas a iningithe ngaashi yo. 14 Ihe sho nda mono kutya itaya katuka metsokumwe noshili yonkundana ombwanawa, onda lombwele Kefas* komeho gawo ayehe nda ti: “Ngele ngoye, ngoka wu li Omujuda, oto ihumbata ngaashi aantu yomiigwana, ihe hangaashi Aajuda, ongiini to vulu okuningitha aantu yomiigwana ya landule omikalo dhOshijuda?”

15 Tse, mboka Aajuda pakuvalwa nokatu shi aalunde yomiigwana, 16 otu shi shi kutya omuntu iha talika ko omuyuuki omolwokudhiginina ompango, ihe omolwa owala eitaalo lye muJesus Kristus. Onkee ano natse otwa itaala muKristus Jesus, opo tu talike ko tu li aayuuki omolweitaalo lyetu muKristus, ihe hamolwokudhiginina ompango, oshoka kapu na nando ogumwe* ta ka talika ko omuyuuki omolwokudhiginina ompango. 17 Ngele natse, mboka twa hala okukala aayuuki okupitila muKristus, otwa talika ko tu li aalunde, mbela kungawo Kristus okwa ninga omuyakuli gwuulunde? Hasho nando! 18 Ngele onda tameke okutungulula shoka nda li nda hanagula po nale, nena kungawo, otandi ulike kutya ngame omuyoni gwompango. 19 Oshoka okupitila mompango, ngame onda sa pataloko lyompango, opo ndi vule okukala nomwenyo, ndi longele Kalunga. 20 Ngame onda alelwa komuti pamwe naKristus. Itandi kala we nomwenyo omolwandje mwene, ihe omolwaKristus, ngoka e li muukumwe nangame. Onkalamwenyo yandje yongashingeyi oyi li metsokumwe naashoka nda itaala kombinga yOmuna gwaKalunga, ngoka e hole ndje, nokwa igandja omolwandje. 21 Itandi tindi uuwanawahenda waKalunga, oshoka ngele omuntu oha talika ko omuyuuki omolwompango, nena okusa kwaKristus osima yowala.