PaLukas
17 Opo nduno Jesus okwa ti kaalongwa ye: “Odhoshili kutya aantu otaya ka pundukitha yalwe. Ihe yayee, ngoka te ke shi ninga! 2 Oshi li hwepo omuntu ngoka a mangelwe emanya lyoshini mothingo e ta umbilwa mefuta, shi vulithe ta pundukitha gumwe gwomwaambaka aashona. 3 Itonateleni ne yene. Ngele omumwaho okwa yono kungoye, mu pukulula, nongele okwa iyele ombedhi, mu dhimina po. 4 Nokuli ngele okwa yono kungoye luheyali mesiku e te ya kungoye lwiikando iheyali ta ti: ‘Onda iyela ombedhi,’ mu dhimina po.”
5 Opo ihe aayapostoli oya ti kOmuwa: “Tu gwedhela eitaalo.” 6 Nena Omuwa okwa ti: “Andola omwa li mu na eitaalo li thike owala nando opomuma yosinapi, ando otamu vulu okulombwela omuti nguka,* ‘Ivudha mo mevi e to itsike mefuta,’ notagu vulika kune.”
7 “Mbela olye gwomune, uuna e na omupiya gwe ta pulula, nenge ta litha, ihe sho e ya megumbo, ta ti kuye: ‘Ila mpaka nziya, wu kuutumbe wu lye pamwe nangame’? 8 Pehala lyaashono, ote mu lombwele ta ti: ‘Inda wu ka pakele ndje po uulalelo, to zala okatetahema e to ya wu yakule ndje, sigo nda mana okulya nokunwa, opo nawa nangoye to ya wu lye nokunwa.’ 9 Ita ka pandula omupiya ngoka, molwaashoka okwa gwanitha po owala oshilonga she. 10 Sha faathana, ngele omwa gwanitha po iinima ayihe, mbyoka mwa lombwelwa mu ninge, tyeni: ‘Tse aapiya yowala. Otwa longo owala shoka twa li tu na oku shi longa.’”
11 Jesus sho a li mondjila ta yi kuJerusalem, okwa piti pokati kaSamaria naGalilea. 12 Sho e ya momukunda gwontumba, aalumentu omulongo ye na oshilundu oye mu tsakaneke, ihe oya li ya thikama kokule naye. 13 Opo ihe oya igidha mokule taya ti: “Jesus, Muhongi, tu sila ohenda!” 14 Sho e ya mono, okwa ti kuyo: “Indeni, mu ka iyulike kaayambi.” Sho ye li mondjila taya yi, oya aluka.* 15 Gumwe gwomuyo sho a mono kutya okwa aluka, okwa galukile kuJesus e ta tanga Kalunga newi lyopombanda. 16 Opo ihe okwa inyongamene poompadhi dhaJesus, te mu pandula. Shimwe ishewe, omulumentu ngoka okwa li Omusamaria. 17 Jesus okwa ti: “Mbela ayehe omulongo inaya aludhwa?* Yalwe omugoyi oye li peni nduno? 18 Kapu na nando ogumwe a galuka e ye a hambelele Kalunga, kakele komulumentu nguka gwomoshigwana shilwe?” 19 Opo nduno Jesus okwa ti kuye: “Thikama e to yi; eitaalo lyoye olye ku aludha.”
20 Sho Jesus a pulwa kAafarisayi kutya Uukwaniilwa waKalunga otawu ya uunake, okwe ya yamukula a ti: “Sho Uukwaniilwa waKalunga tawu ya, itawu ka ndhindhilikwa mo kwaayehe; 21 naantu itaya ka tya: ‘Tala, owo mbuka,’ nenge, ‘Owo mbwiyaka.’ Oshoka taleni, Uukwaniilwa waKalunga owu li mokati keni.”
22 Okuza mpono, Jesus okwa ti kaalongwa ye: “Ethimbo otali ya, uuna tamu ka kala mwa halelela okumona limwe lyomomasiku gOmuna gwomuntu, ihe itamu ke li mona. 23 Naantu otaye ke mu lombwela taya ti: ‘Tala, oye ngwiyaka,’ nenge: ‘Tala, oye nguka.’ Inamu ya itaala, nenge mu ya landule. 24 Ngaashi owala olwaadhi talu adhima okuza kombinga yimwe yegulu, sigo okombinga onkwawo, osho wo tashi ka kala, sho Omuna gwomuntu ta ka holoka mesiku lye. 25 Nonando ongawo, tango, Omuna gwomuntu oku na okupita momahepeko ogendji, noita ka taambiwa ko kepipi ndika. 26 Shimwe ishewe, ngaashi owala sha li pethimbo lyaNoa, osho wo tashi ka kala pomasiku gOmuna gwomuntu. 27 Pethimbo ndyoka, aantu oya li taya li notaya nu, aalumentu taya hokana, naakiintu taya hokanwa, sigo esiku, ndyoka Noa a yi monguluwato, neyelu olye ya e tali ya hanagula po ayehe. 28 Sha faathana, ngaashi owala sha li pethimbo lyaLot: aantu oya li taya li, taya nu, taya landa, taya landitha, taya tsike notaya tungu. 29 Ihe esiku ndyoka Lot a zi mo muSodom, omulilo nosulufuli oya loko okuza megulu, noye ya hanagula po ayehe. 30 Osho wo tashi ka kala mesiku ndyoka, uuna Omuna gwomuntu ta ka holoka.
31 “Mesiku ndyoka, ngoka ta adhika kontala yegumbo, noku na iinima ye e yi thigi megumbo, ina za ko e ke yi tale mo, naangoka ta adhika mepya, ina shuna megumbo a ka tale mo iinima ye. 32 Dhimbulukweni omukulukadhi gwaLot. 33 Kehe ngoka ta kambadhala okuhupitha omwenyo gwe ote ke gu kanitha, ihe ngoka te gu kanitha ote ke gu mona. 34 Ngame otandi mu lombwele, uusiku mboka, aantu yaali otaya ka adhika ya lala kombete yimwe; gumwe ota kuthwa po, ihe mukwawo ota ka thigwa po. 35 Aakiintu yaali otaya ka adhika taya tsu poshini shimwe; gumwe ota kuthwa po, ihe mukwawo ota ka thigwa po.” 36 —— 37 Onkee ano aalongwa oya ti kuye: “Omuwa, shoka otashi ka ningilwa peni?” Okwa ti kuyo: “Mpoka pu na omudhimba opo wo hapu kala pwa gongala omakodhi.”*