PaLukas

9 Opo nduno Jesus okwa ithana aayapostoli ayehe 12, nokwe ya pe oonkondo nosho wo oonkondopangelo dhokutidha mo oondemoni nokwaaludha omikithi. 2 Opo ihe okwe ya tumu ya ka uvithe kombinga yUukwaniilwa waKalunga nokwaaludha 3 e ta ti kuyo: “Inamu ya nasha molweendo, kutya nduno onompunda yiikulya, noshikwiila, niimaliwa,* nenge noonguwo mbali.* 4 Ihe uuna tamu yi megumbo lyontumba, kaleni moka sigo tamu zi mo moshitopolwa shoka. 5 Kehe moshilando, moka aantu itaaye mu taamba, sho tamu zi mo, ipupuleni ontsi koompadhi dheni, shi kale uumbangi kuyo.” 6 Okuza mpono oya yi komikunda taya uvitha onkundana ombwanawa noya aludha aantu apuhe.

7 Opo ihe sho Herodes,* omupangeli gwoshitopolwa shaGalilea,* a uvu kombinga yaashihe shoka sha ningwa po, okwa li a limbililwa unene, molwaashoka yamwe oya li taya ti kutya oJohannes a yumudhwa kuusi, 8 ihe yamwe oya li taya ti oElia, omanga yalwe ya li taya ti ogumwe gwomaahunganeki yonale a yumuka. 9 Nena Herodes okwa ti: “Johannes onde mu tetitha omutse. Olye ano nani nguno ndi uvite a ninga iinima ayihe mbika?” Onkee ano okwa li a halelela oku mu mona.

10 Sho aayapostoli ya galuka, oya hokololele Jesus ashihe shoka ya ningi. Opo nduno okwa zi po nayo oyo ayeke, noya yi koshilando shedhina Betsaida. 11 Ihe sho ongundu yaantu ye shi mono, oye mu landulile ko. Opo ihe okwe ya taamba ko nombili e ta tameke okupopya nayo kombinga yUukwaniilwa waKalunga, nokwa aludha mboka ya li ya pumbwa okwaaludhwa. 12 Opo nduno sho kwa toko, aayapostoli 12 oye ya kuJesus e taya ti kuye: “Laleka ongundu yaantu, yi ye momikunda dhopopepi, yi ka konge omulalo nosho wo iikulya, oshoka kehala huka tu li okokule.” 13 Ihe okwa ti kuyo: “Ya peni sha shokulya.” Oya ti kuye: “Otu na po owala iikwiila itano noohi mbali, shila ongele tatu yi, tu ka landele aantu ayehe mbaka iikulya.” 14 Opwa li aalumentu 5 000 lwaampono. Ihe Jesus okwa lombwele aalongwa ye ta ti: “lombweleni aantu ya kuutumbe moongundu; kehe mongundu namu kale aantu 50 lwaampono.” 15 Oya ningi ngaashi e ya lombwele, naantu ayehe oya kuutumba. 16 Opo nduno Jesus okwa kutha iikwiila itano noohi mbali e ta ligamene kegulu, nokwa galikana. Opo ihe okwa pambula iikwiila e ta tameke oku yi pa aalongwa, ye yi topolele oongundu dhaantu. 17 Onkee ano ayehe oya li noya kuta. Opo nduno oya gongele iipambu mbyoka ya hupu po, miimbamba 12.

18 Konima yethimbo, manga Jesus a li ta galikana e li oye awike, aalongwa oye ya kuye, nokwe ya pula ta ti: “Aantu otaya ti ongame lye?” 19 Oye mu yamukula ya ti: “OJohannes Omuninginithi, ihe yamwe otaya ti ongoye Elia, nayalwe otaya ti ogumwe gwomaahunganeki yopethimbo lyonale a yumuka.” 20 Opo nduno okwa ti kuyo: “Ihe ne otamu ti ongame lye?” Petrus okwe mu yamukula a ti: “Ongoye Omugwayekwa gwaKalunga.” 21 Opo ihe okwe ya indike, kaaye shi lombwele nando omuntu, 22 nokwe ya lombwele ta ti: “Omuna gwomuntu ota ka hepekwa nonyanya, noita ka taambiwa ko kaakuluntu yoshigwana, kaayambi aakuluntu nokaalongimpango, nota ka dhipagwa e ta yumudhwa mesiku etitatu.”

23 Nena Jesus okwa lombwele ayehe ta ti: “Kehe ngoka a hala okulandula ndje na ihupule ye mwene, ye ta itsike omuti gwe gwomahepeko* kehe esiku e ta tsikile okulandula ndje; 24 oshoka kehe ngoka ta kambadhala okuhupitha omwenyo gwe, ote ke gu kanitha, nakehe ngoka ta kanitha omwenyo gwe omolwandje ote gu hupitha. 25 Onkee ano otashi kwatha shike, ngele omuntu ta ilikolele uuyuni awuhe, e ta kanitha omwenyo gwe, nenge e ta iyono po? 26 Kehe ngoka ta si ndje ohoni nosho wo oohapu dhandje, Omuna gwomuntu ote ke mu sa ohoni, sho te ke ya meadhimo lye nosho wo lyaHe nolyaayengeli aayapuki. 27 Ihe oshili tandi mu lombwele, putse mpaka opwa thikama yamwe mboka itaaya ka makela eso nando, sigo oosho tango ya mono Uukwaniilwa waKalunga.”

28 Konima yomasiku gahetatu lwaampono, sho Jesus a popi oohapu ndhoka, okwa kutha Petrus, Johannes naJakob e taya londo kondundu, a ka galikane. 29 Manga a li ta galikana, oshipala she osha shituluka, noonguwo dhe odha toka to. 30 Ihe tala, aalumentu yaali oya li taya kundathana naye; oya li Moses naElia. 31 Aalumentu mboka oya holoka ye na eadhimo, noya tameke okupopya kombinga yokuya* kwaJesus, hoka kwa li ku li poku ka ningilwa kuJerusalem. 32 Petrus naamboka ya li pamwe naye oya li ya pwila moomposi, ihe sho ya papudhuka mo, oya mono eadhimo lyaJesus nosho wo aalumentu yaali, mboka ya thikama naye. 33 Opo nduno sho aalumentu mboka ya li taya zi po puJesus, Petrus okwa ti kuye: “Muhongi, oshe tu opalela okukala mpaka. Onkee ano tu pitika tu dhike omatsali gatatu mpaka, limwe olyoye, limwe olya Moses, nekwawo olyaElia.” Ka li e shi shoka ta popi. 34 Ihe manga a li ta popi iinima mbika, opwa holoka oshikogo e tashi tameke oku ya siikila, noya li ya tila. 35 Opo ihe moshikogo omwa zi ewi tali ti: “Nguka Omumwandje, ngoka nda hogolola. Pulakeneni kuye.” 36 Sho ewi tali popi, oya mono Jesus e li oye awike. Ihe oya kala ya mwenena shoka ya mono, noinaye shi lombwela nando omuntu uule wethimbo.

37 Esiku lya landula ko, sho ya kuluka kondundu, ongundu onene yaantu oye ya okutsakaneka Jesus. 38 Ihe tala, omulumentu gumwe gwomongundu ndjoka okwa igidha ta ti: “Muhongi, otandi ku indile wu kwathele* omumwandjemati, molwaashoka oye awike ndi na. 39 Tala, oha kwatwa kombepo ya nyata,* noha tameke okwiigidha. Ohayi mu thathalitha e ta tameke okututuma ondutu mokana, noihayi mu etha nuupu, sigo oosho ye mu ehameke. 40 Onda indile aalongwa yoye ye yi tidhe mo, ihe inaya vula oku shi ninga.” 41 Jesus okwe mu yamukula ta ti: “Yakwetu, epipi ndika kaali na eitaalo nolya yonuka, sigo uunake ndi na okukala nane noku mu idhidhimikila? Eta omumwoyemati huka.” 42 Manga omumati ngoka a li e li pokuthika puJesus, ondemoni oye mu hata pevi e tayi mu thathalitha noonkondo. Ihe Jesus okwa ganda ombepo ndjoka ya nyata, nokwa aludha omumati ngoka e te mu gandja kuhe. 43 Opo nduno aantu ayehe oya li ya kuminwa oonkondo oonene dhaKalunga.

Manga aantu ya li ya kuminwa iinima ayihe, mbyoka a li ta longo, Jesus okwa lombwele aalongwa ye ta ti: 44 “Pulakeneni nawa e tamu kaleke oohapu ndhika momadhiladhilo,* oshoka Omuna gwomuntu ota ka gwaalekwa e ta gandjwa miikaha yaantu.” 45 Ihe kaya li ye uvite ko shoka a hala okutya, oshoka osha li she ya holekwa, opo kaaye shi uve ko, noya li ya tila oku mu pula kombinga yeityo lyasho.

46 Opo ihe mokati kawo omwa tukuluka oontamanana kutya olye omunene e vule ooyakwawo. 47 Molwaashoka Jesus okwa li e shi shoka taya dhiladhila momitima dhawo, okwa kutha okanona e te ka thikameke ponto ye, 48 nokwa ti kuyo: “Kehe ngoka ta taamba ko okanona ngaashi haka medhina lyandje, okwa taamba ndje ko wo; nakehe ngoka ta taamba ndje, okwa taamba ko wo Ngoka a tuma ndje. Onkee ano ngoka a itala ko oye omushona mokati keni amuhe, oye omunene.”

49 Johannes okwe mu yamukula ta ti: “Muhongi, otwa mono gumwe ta tidha mo oondemoni medhina lyoye, notwa kambadhala oku mu keelela, molwaashoka ke shi gumwe gwomutse.” 50 Ihe Jesus okwa ti kuye: “Inamu kambadhala oku mu keelela, oshoka kehe ngoka kee li ompinge nane, okwa gama kune.”

51 Sho omasiku ga li taga hedha popepi, Jesus a ye megulu, okwa tokola a ye kuJerusalem. 52 Onkee ano okwa lombwele aalongwa ye, ye mu tetekele. Opo nduno oya yi momukunda gwAasamaria, ye ke mu longekidhile ehala. 53 Ihe Aasamaria inaye mu taamba ko, molwaashoka okwa li a tokola okuya kuJerusalem. 54 Sho aalongwa ye, Jakob naJohannes, ye shi mono, oya ti: “Omuwa, owa hala tu indile omulilo okuza megulu, gu ya hanagule po?” 55 Ihe okwa piluka e te ya ganda. 56 Onkee ano oya yi komukunda gulwe.

57 Opo nduno manga ya li taya ende taya yi, omulumentu gumwe okwa ti kuye: “Otandi ku landula shaampoka to yi.” 58 Ihe Jesus okwa ti kuye, “Ookaandje oye na omakwena, noondhila dhokegulu odhi na iihandhila, ihe Omuna gwomuntu ke na mpoka ta langeke omutse gwe.” 59 Opo ihe Jesus okwa lombwele omulumentu gulwe ta ti: “Ninga omulanduli gwandje.” Omulumentu ngoka okwa ti kuye: “Omuwa, pitika ndje manga ndi fumvike tate.” 60 Ihe okwa ti kuye: “Etha aasi ya fumvike aasi yawo, ihe ngoye inda wu ka uvithe kombinga yUukwaniilwa waKalunga kehe pamwe.” 61 Opo nduno omulumentu gulwe okwa ti kuJesus: “Omuwa, otandi ku landula, ihe tango, pitika ndje ndi ka laleke yaandjetu.” 62 Jesus okwa ti kuye: “Kehe ngoka ta tameke okupulula e ta tala konima, ina opalela Uukwaniilwa waKalunga.”