PaMateus

27 Sho kwa shi, aayambi aakuluntu ayehe naakuluntu yoshigwana oya gongala, opo ya kundathane ya dhipage Jesus. 2 Konima sho ye mu manga, oye mu fala kuPilatus, ngoka a li ngoloneya.

3 Opo nduno sho omugwaaleki gwaJesus, Judas, a mono kutya Jesus okwa tokolelwa eso, okwa uvu nayi, nokwa galulile aayambi aakuluntu naakuluntu yoshigwana iimaliwa yiisiliveli 30, 4 ta ti: “Onda yona, sho nda gwaaleke omulumentu kee na ondjo.”* Oya ti kuye: “Otu na shike nasho? Mbyoka iilonga yoye mwene!” 5 Onkee ano okwa umbile iimaliwa yiisiliveli motempeli, nokuza mpono okwe ki imangeleka. 6 Ihe aayambi aakuluntu oya kutha po iisiliveli mbyoka, noya ti: “Kashi li pampango oku yi tula mehala eyapuki lyomayambidhidho, oshoka oyi li ofuto yombinzi.” 7 Konima sho ya kundathana kombinga yiimaliwa mbyoka, oye yi landa po epya lyomuhongi gwiiyuma, li ninge ehala lyokufumvika aakwiilongo. 8 Onkee ano epya ndyoka olya kala hali ithanwa Epya lyOmbinzi, sigo okesiku ndika. 9 Opo nduno oohapu, ndhoka dha popilwe okupitila momuhunganeki Jeremia, odha gwanithwa, ndhoka tadhi ti: “Oya kutha iimaliwa yiisiliveli 30, ofuto yomulumentu, ndjoka oyana yamwe yaIsraeli, ya zimine oku mu landa po, 10 noye yi landa po epya lyomuhongi gwiiyuma, ngaashi Jehova a lombwele ndje.”

11 Jesus okwa thikamekwa komeho gangoloneya. Opo ihe ngoloneya okwe mu pula a ti: “Ongoye omukwaniilwa gwAajuda?” Jesus okwe mu yamukula ta ti: “Eeno, ongaashi we shi popi.” 12 Ihe sho a li ta lundilwa kaayambi nokaakuluntu yoshigwana, ina tya sha. 13 Opo nduno Pilatus okwa ti kuye: “Ku uvite ko ano sho to tamanekelwa iinima ayihe mbika?” 14 Ihe Jesus ine mu yamukula nando, nangoloneya okwa li a kumwa noonkondo.

15 Poshituthi shOpaasa kehe, ngoloneya okwa li e na ondjigilile yokumangulula omunandholongo gumwe, ngoka ongundu yaantu ya hala a mangululwe. 16 Pethimbo mpoka, mondholongo omwa li mu na omunandholongo a tseyika nawa gwedhina Barabbas. 17 Onkee ano sho ya gongala, Pilatus okwe ya pula ta ti: “Olye mwa hala ndi mangulule, oBarabbas, nenge oJesus, ngoka aniwa ha ithanwa Kristus?” 18 Pilatus okwa li e shi kutya oye mu gandja miikaha ye omolwondumbo. 19 Shimwe ishewe, manga a li a kuutumba koshipundi shokupangula, omukulukadhi gwe okwe mu tumine etumwalaka, tali ti: “Omulumentu, ngoka kee na ondjo, ino mu ningila sha oshiwinayi, oshoka onde mu yaguma nena, nondjodhi ndjoka oya tilitha ndje noonkondo.” 20 Ihe aayambi naakuluntu yoshigwana oya hwahwameke ongundu yaantu yi pule Barabbas a mangululwe, na Jesus a dhipagwe. 21 Opo nduno ngoloneya okwe ya pula ta ti: “Pokati kaalumentu mbaka yaali, olye mwa hala ndi mangulule?” Oya ti: “OBarabbas.” 22 Pilatus okwa ti kuyo: “Ye Jesus, ngoka aniwa ha ithanwa Kristus, nandi mu ninge ngiini?” Ayehe oya ti: “Na ka alelwe komuti!” 23 Okwa ti kuyo: “Omolwashike? Okwa ningi shike sha puka?” Natango oya tsikile owala okwiigidha taya ti: “Na ka alelwe komuti!”

24 Sho Pilatus a mono kutya oonkambadhala dhe inadhi pondola, nombuyagano yaantu oya li owala tayi yi pombanda, okwa kutha omeya e ta iyogo kiikaha komeho yongundu yaantu, nokwa ti: “Ngame kandi na ondjo yombinzi yomulumentu nguka. Taleni ne yene kutya otamu mu ningi ngiini.” 25 Opo ihe aantu ayehe oya ti kuye: “Ondjo yombinzi ye nayi kale yetu noyoyana yetu.” 26 Opo nduno Pilatus okwa mangulula Barabbas, ihe okwa dhengitha Jesus noongola e te mu gandja a ka alelwe komuti.

27 Nena aakwiita yangoloneya oya fala Jesus megumbo lyangoloneya, naakwiita ayehe oya gongalele Jesus ye mu kundukidha. 28 Opo nduno oye mu hula onguwo ye e taye mu zaleke elwaakani etiligane mbyu, 29 noya tungu oshishani shomakwega e taye shi mu zaleke komutse, noye mu pe oshihenguti shombungu moshikaha she shokolulyo. Oye mu tsile wo oongolo, taye mu sheke taya ti: “Natu ku kunde, Omukwaniilwa gwAajuda!” 30 Opo nduno oye mu hiyile omayeye e ta ye mu kutha oshihenguti shombungu, noye shi mu dhengitha momutse. 31 Hugunina, konima sho ye mu sheke, oye mu hula elwaakani e taye mu zaleke onguwo ye yokombanda noye mu fala a ka alelwe komuti gwomahepeko.

32 Sho ya li taya yi, oya itsu po omulumentu gumwe gwokuKireni, gwedhina Simon. Omulumentu ngoka oye mu thiminike a humbate ko komuti gwomahepeko* gwaJesus. 33 Opo nduno sho ye ya pehala hali ithanwa Golgata, sha hala okutya, Ehala lyOmakolotse, 34 oya pe Jesus omaviinu ga vongakanithwa mumwe nonyango a nwe; ihe konima sho e ga lolo, okwa tindi oku ga nwa. 35  Sho ye mu alele komuti, oya itopolele onguwo ye yokombanda, pamukalo gwokuumba oshihogololitho, 36 noya kuutumba mpoka ye mu tonatele. 37 Pombanda yomutse gwe, oya mbambangele po okapilangi ka nyolwa oohapu kutya omolwashike a dhipagwa, tadhi ti: “Nguka oJesus, Omukwaniilwa gwAajuda.”

38 Opo nduno aalumentu yaali aayugi oya alelwa pamwe naye komiti dhomahepeko, gumwe okolulyo lwe, namukwawo okolumoho lwe, 39 naamboka ya li taya piti po oya li taye mu sheke nokwiipuka komitse 40 noya ti: “Ngoye ngoka wa ti oto vulu okukumuna po otempeli e to yi tungulula muule womasiku gatatu, ihupitha nduno mwene. Ngele ngoye Omuna gwaKalunga, ikutha ko komuti gwomahepeko.”* 41 Aayambi, aalongimpango naakuluntu yoshigwana nayo oya tameke wo oku mu sheka, taya ti: 42 “Oku shi okuhupitha yalwe, ihe okwa nyengwa okwiihupitha! Oye Omukwaniilwa gwaIsraeli ndishi; na ze ko nduno komuti gwomahepeko, notatu mu itaale. 43 Okwa inekela muKalunga; ne mu hupithe nduno, ngele okwe mu hokwa, oshoka okwa tile, ‘Ngame Omuna gwaKalunga.’” 44 Nokuli naayugi mboka ya li ya alelwa pamwe naye komiti dhomahepeko oya li taye mu sheke.

45 Okuza potundi ontihamano,* oshilongo ashihe osha ningi omilema, sigo opotundi ontimugoyi.* 46 Lwopotundi ontimugoyi, Jesus okwa igidha mokule, ta ti: “Eli, Eli, lama sabaktani?” sha hala okutya, “Kalunga kandje, Kalunga kandje, omolwashike wa ekelehi ndje?” 47 Sho yamwe mboka ya li ya thikama mpoka ye shi uvu, oya tameke taya ti: “Omulumentu nguka ota ithana Elia.” 48 Nziya gumwe gwomuyo okwa matuka e ta ka tala oshiyayo, nokwe shi yaya momaviinu omalulu e te shi tula koshihenguti shombungu, nokwe mu pe a nwe. 49 Ihe ooyakwawo oya ti: “Mu etha a kale ngaaka! Natu tale ngele Elia ote ya e mu hupithe.” 50 Natango Jesus okwa igidha mokule, nokwa si.

51 Ihe tala! etopolitholapi lyotempeli olya tuuka pokati, okuza pombanda sigo opevi, evi olya kakama, nomamanya oga tanduka. 52 Opo nduno oombila* odha makuka, nomidhimba odhindji dhaayapuki odhe ya kombanda, 53 naantu oyendji oya li ye dhi mono. (Aantu, mboka ya li poombila, konima sho Jesus a yumudhwa, oya yi moshilando oshiyapuki.)* 54 Sho omukuluntu gwetangakwiita naamboka ya li naye ya langela Jesus, ya mono ekakamo lyevi niinima ayihe, mbyoka tayi ningwa, oya li ya tila noonkondo e taya ti: “Nguka okwa li shili Omuna gwaKalunga.”

55 Shimwe ishewe, aakiintu oyendji, mboka ya li haya kala ya landula Jesus okuza kuGalilea ye mu yakule, oya li taya tala ya thikama ye li kokule; 56 yamwe yomuyo oya li Maria Magdalena, Maria yina yaJakob naJoses nayina yoyanamati yaSebedeus.

57 Komatango, omulumentu gumwe omuyamba gwokuArimatia, gwedhina Josef, ngoka naye wo a li omulongwa gwaJesus, okwe ya 58 e ta yi kuPilatus, nokwe mu pula omudhimba gwaJesus. Opo nduno Pilatus okwa gandja elombwelo e gu pewe. 59 Josef okwa taamba omudhimba e te gu dhingile moshiyata oshitokele sholiina, 60 opo ihe okwe gu tula mombila* ye mwene ompe, ndjoka a hokitha memanya. Konima sho a undulile po emanya enene posheelo shombila,* okwa yi. 61 Ihe Maria Magdalena naMaria omukwawo oya kala mpoka, ya kuutumba komeho gombila.

62 Esiku lya landula ko, ndyoka lya li esiku lyEsabati, aayambi nAafarisayi oya gongala komeho gaPilatus 63 e taya ti: “Omusimanekwa, otatu dhimbulukwa kutya sho omukotokeli ngwiyaka a li e na omwenyo, okwa tile, ‘Otandi ka yumudhwa konima yomasiku gatatu.’ 64 Onkee ano gandja elombwelo ombila ye yi langelwe, sigo esiku etitatu, opo aalongwa ye kaaye ye ye mu yake mo e taya lombwele aantu taya ti: ‘Okwa yumudhwa kuusi!’ Nena iifundja mbika yahugunina otayi ka kala yi vule yotango.” 65 Pilatus okwa ti kuyo: “Taambeni aalangeli ye ke yi langele, ngaashi tamu pula.” 66 Onkee ano oya yi e taya undulile po nawa emanya lyoposheelo shombila, noya tula po aalangeli.