PaLukas

2 Pomasiku ngeyaka, Omukesari Augustus okwa gandja elombwelo aantu kombanda yevi alihe, mboka ye li kohi yepangelo lye, ya ka inyolithe. 2 (Einyolitho ndika olyo lyotango, nolya ningwa pethimbo Kirenius a li ngoloneya gwaSiria.) 3 Opo nduno aantu ayehe oya yi ya ka inyolithe, kehe gumwe okoshilando shaandjawo. 4 Josef naye wo okwa zi kuGalilea, koshilando shaNasaret, nokwa yi kuJudea, koshilando shaDavid, shoka hashi ithanwa Betlehem, oshoka okwa li gwomoluvalo lwaDavid. 5 Okwa yi pamwe naMaria, omuyalekwa gwe, ya ka inyolithe, ngoka a li e li pokumona okanona. 6 Manga ye li muJudea, ethimbo lye lyokumona okanona olya thiki. 7 Opo nduno Maria okwa mono okanona okamati, okasheeli ke, e te ka dhingile momalapi, nokwe ka langeke metemba lyokulila iimuna, oshoka kaya li ya mono ondunda mehala lyaayenda.

8 Moshitopolwa omo tuu moka omwa li mu na aasita ya langela iimuna yawo melundu uusiku. 9 Ohaluka, omuyengeli gwaJehova okwa thikama komeho gawo, nuuyelele weadhimo lyaJehova owe ya minikile, noya li ya tila noonkondo. 10 Ihe omuyengeli okwa ti kuyo: “Inamu tila, taleni, ondi mu nine onkundana ombwanawa, ndjoka tayi ka etela aantu ayehe enyanyu enene. 11 Nena ndjika, moshilando shaDavid omwa valelwa omuhupithi, ngoka e li Kristus, Omuwa. 12 Endhindhiliko lyoku mu dhimbulula olyo ndika: Otamu ka mona okahanona ka dhingilwa momalapi noka langekwa metemba lyokulila iimuna.” 13 Ohaluka, pomuyengeli ngoka opwa holoka ongundu onene yetangakwiita lyomegulu, tayi hambelele Kalunga tayi ti: 14 “Esimano olyaKalunga, ngoka e li pombandambanda, nombili kombanda yevi otayi kala mokati kaantu, mboka a hokwa.”

15 Onkee ano sho aayengeli ya zi po puyo e taya shuna megulu, aasita yiimuna oya tameke okulombwelathana taya ti: “Natu yeni mbala kuBetlehem tu ka taleni shoka sha ningwa ko, shoka Jehova e shi tu hololele.” 16 Opo nduno oya yi nziya, noya mono Maria naJosef, nokahanona ka lala metemba lyokulila iimuna. 17 Sho ya mono ayihe mbyoka, oya hokolola shoka ya lombwelwa kombinga yokanona. 18 Opo ihe ayehe, mboka ya uvu shoka aasita yiimuna taya popi, oya li ya kumwa, 19 ihe Maria okwa pungula oohapu adhihe ndhoka momutima gwe, nokutedhatedha kudho. 20 Opo nduno aasita yiimuna oya shuna taya hambelele Kalunga noku mu tanga, omolwiinima ayihe, mbyoka ya uvu noya mono, ngaashi owala ye yi lombwelwa.

21 Okanona sho ka gwanitha omasiku gahetatu, oka kenkwa, noka lukwa Jesus, edhina ndyoka lya gandjwa komuyengeli, manga inaaka valwa.

22 Shimwe ishewe, sho esiku lyawo lyeyogolo* lya thiki, ngaashi sha popiwa mOmpango yaMoses, oya fala okanona kuJerusalem ye ke ka ulike* kuJehova, 23 ngaashi sha nyolwa mOmpango yaJehova, ndjoka tayi ti: “Okamati kehe okasheeli* oke na okuyapulilwa Jehova.” 24 Opo ihe oya gandja eyambo sha ikolelela kwaashoka sha popiwa mOmpango yaJehova, ndjoka tayi ti: “Gandjeni omatendenguti gaali, nenge uungutyona uyali.”

25 Ihe tala, muJerusalem omwa li mu na omulumentu gwedhina Simeon. Omulumentu ngono okwa li omuyuuki noha tila Kalunga. Okwa li wo a tegelela ethimbo li thike, sho Kalunga ta ka hekeleka Israeli, nombepo ondjapuki yaKalunga oya li tayi mu wilike. 26 Shimwe ishewe, ombepo ondjapuki oya li ye mu hololele kutya ita si inaa mona Omugwayekwa* gwaJehova. 27 Kohi yewiliko lyombepo ondjapuki, okwa yi kotempeli, naasho aavali ya eta mo okanona Jesus, ka ningilwe ngaashi hashi ningwa paMpango, 28 okwe ka ukata momaako ge e ta hambelele Kalunga ta ti: 29 “Omuwa Omunamapangeloagehe, ngashingeyi oto vulu okweetha omupiya gwoye a se nombili ngaashi wa popya, 30 oshoka omeho gandje oga mona ehupitho, 31 ndyoka wa longekidha montaneho yaantu ayehe, 32 noli li uuyelele tawu minikile iigwana mbyoka yi li momilema, notali ka etela oshigwana shoye Israeli esimano.” 33 Opo nduno he nayina yokanona oya kala taya ipula kombinga yiinima mbyoka tayi popiwa kombinga yako. 34 Simeon okwe ya yambeke wo e ta lombwele Maria, yina yokanona, ta ti: “Tala, okanona haka oka langekwa po okupundukitha nokuyambula po ishewe oyendji muIsraeli. Ihe nonando Kalunga ota ka holola omandhindhiliko, ngoka taga holola kutya oku li pamwe nako, oyendji otaye ke ka popila muuwinayi, 35 opo omadhiladhilo, ngoka ge li momitima dhoyendji, ga hololwe.” (Nangoye mwene oto ka ululwa negongamwele ele.)

36 Pethimbo ndyoka opwa li pu na omuhunganeki omukiintu, gwedhina Anna, omwanakadhona gwaFanuel, gwomezimo lyaAser. Omukiintu ngoka okwa li omukokele. Okwa hokanwa manga a li omukadhona natango, nokwa kala nomusamane gwe uule womimvo heyali. 37 Pethimbo ndyoka, okwa li omuselekadhi gwomimvo 84. Okwa li aluhe ha yi kotempeli, ta longele Kalunga uusiku nomutenya, nokwa li wo ha idhilike iikulya nokugalikana a mana mo. 38 Pethimbo olyo tuu ndyoka, okwa hedha popepi nayo, nokwa tameke okupandula Kalunga, nokulombwela ayehe kombinga yokanona, mboka ya li ya tegelela ehupitho lyaJerusalem.

39 Onkee ano sho ya ningi iinima ayihe, mbyoka ya li ye na okuninga paMpango yaJehova, oya shuna kuGalilea, koshilando shaandjawo, Nasaret. 40 Opo nduno okanona oka tsikile okukoka, noka tsikile wo okupewa uunongo owindji, na Kalunga okwa kala e ka hokwa.

41 Aavali yaJesus oya li ye na ondjigilile yokuya kuJerusalem omumvo kehe ya ka dhane oshituthi shOpaasa. 42 Sho Jesus a li e na omimvo 12, oya yi kuJerusalem ya ka dhane oshituthi shoka, ngaashi hashi ningwa shito. 43 Oshituthi sho sha pu, oya idhenge ondjila ya shune, ihe Jesus okwa thigala muJerusalem, naavali ye kaya li ye shi ndhindhilika. 44 Molwaashoka oya li taya dhiladhila kutya oku li mokati kaamboka taya ende pamwe nayo, oya tsikile okweenda oshikako shuule wesiku limwe. Opo nduno oya tameke oku mu konga mokati kaakwanezimo naatseyikile. 45 Ihe sho inaaye mu mona, oya shuna kuJerusalem, noye mu kongo ya itula mo. 46 Opo ihe konima yomasiku gatatu, oye mu adha motempeli, a kuutumba mokati kaalongi yOmpango ta pulakene kuyo note ya pula omapulo. 47 Ihe ayehe, mboka ya li taya pulakene kuye, oya li ya kuminwa euvoko* lye nomayamukulo ge. 48 Sho aavali ye ye mu mono, oya li ya kumwa, yina e ta ti kuye: “Mumwandje, omolwashike we tu ningile ngeyi? Ngame naho otwa kala tatu ku kongo kehe pamwe.” 49 Ihe okwa ti kuyo: “Otamu kongele ndje shike? Nani kamwa li mu shi kutya ondi na okukala* megumbo lyaTate?” 50 Nonando ongawo, kaya li ye uvite ko shoka a hala okutya.

51 Opo nduno okwa yi nayo e taya shuna kuNasaret, nokwa tsikile okuvulika kuyo. Shimwe ishewe, yina okwa pungula oohapu adhihe ndhoka momutima gwe. 52 Opo nduno Jesus okwa tsikile okukoka palutu nomoondunge, nokwa kala a hokiwa kuKalunga nokaantu.