Yotango kAakorinto

8 Ngashingeyi, otandi mú nyolele kombinga yiikulya, mbyoka ya yambelwa iikalunga. Otu shi shi kutya atuheni otu na ontseyo kombinga yoshinima shika. Ontseyo ohayi etitha einenepeko, ihe ohole ohayi tungu. 2 Ihe ngele gulwe ota dhiladhila kutya oku na ontseyo kombinga yoshinima shontumba, ke na natango ontseyo ya ihwa po kombinga yoshinima shoka. 3 Ihe ngele gumwe oku hole Kalunga, nena oye a tseyika kuye.

4 Shi na ko nasha niikulya, mbyoka ya yambelwa iikalunga, otu shi kutya oshikalunga kashi na oshilonga sha sha muuyuni, nokaku na Kalunga kalwe, ihe gumwe awike. 5 Oshoka nokuli nando opu kale mboka haya ithanwa aniwa ookalunga, kutya nduno omegulu, nenge okombanda yevi, ngaashi owala ku na “ookalunga” oyendji “naawa” oyendji, 6 tse otu na owala Kalunga gumwe, Tate, ngoka kuye kwa za iinima ayihe, natse oye; oku na owala Omuwa gumwe, Jesus Kristus, ngoka okupitila muye iinima ayihe ya shitwa, natse wo twa kwatelwa mo.

7 Ihe haayehe ye na ontseyo ndjika. Ihe molwaashoka yamwe oya li haya longele iikalunga, uuna taya li iikulya ya yambelwa iikalunga, eiyuvo lyawo lya nkundipala ohali ya nyenyetele.* 8 Iikulya itayi tu hedhitha popepyeelela naKalunga; itatu kanitha sha, ngele itatu li iikulya mbyoka, noitatu likola wo sha, uuna tatu yi li. 9 Ihe kaleni mwa kotoka, opo emanguluko lyeni lyokuninga omatokolo kaali pundukithe mboka aankundi. 10 Oshoka omuntu, ngono e na eiyuvo enkundi, ngele ta mono ngoka e na ontseyo ta li e li motempeli yoshikalunga, mbela oshinima shono itashi mu ningitha a kale a hala okulya iikulya, mbyoka ya yambelwa iikalunga? 11 Onkee ano omolwontseyo yoye, oto yono po omumwaho, ngoka omunkundi, ngono wo a silwa kuKristus. 12 Ngele tamu yono kaamwaho momukalo nguka, notamu ya ladhipike ya ninge iinima, mbyoka eiyuvo lyawo enkundi hali ya nyenyetele, nena otamu yono kuKristus. 13 Onkee ano ngele iikulya otayi pundukitha omumwatate, itandi li we onyama nando, opo kaandi pundukithe omumwatate.