PaJohannes

12 Manga ku na omasiku gahamano Opaasa yi thike, Jesus okwa thiki kuBetania, hoka kwa li Lasarus, ngoka Jesus e mu yumudha kuusi. 2 Onkee ano oye mu longekidhile uulalelo. Marta oye a li te ya yakula, na Lasarus okwa li gumwe gwomwaamboka ya li taya li* pamwe naJesus. 3 Opo nduno Maria okwa kutha ohanga yomagadhi gezimba lya nika nawa getata lyolitela,* gonardelela noge na ondilo e te ga tile koompadhi dhaJesus, nokwe dhi theta nomafufu ge. Opo nduno egumbo alihe olya li lya udha ezimba lyomagadhi ga nika nawa. 4 Ihe Judas Iskariot, gumwe gwomaalongwa yaJesus, ngoka a li e li poku mu gwaaleka, okwa ti: 5 “Omolwashike omagadhi ngaka ga nika nawa inaaga landithwa po koondenari 300, iimaliwa e tayi pewa oohepele?” 6 Shoka ine shi popya molwaashoka e na ko nasha noohepele, ihe omolwaashoka okwa li omufuthi, noye a li ha kala nokaketha kiimaliwa, nokwa li ha yaka mo iimaliwa, mbyoka ya tulwa mo. 7 Opo nduno Jesus okwa ti: “Etheni Maria, opo a longekidhile olutu lwandje efumviko. 8 Oshoka oohepele otamu kala nadho aluhe, ihe ngame itamu kala mu na ndje aluhe.”

9 Sho ongundu onene yAajuda ya uvu kutya Jesus oku li kuBetania, oya yi ya ka mone Jesus nosho wo Lasarus, ngoka Jesus a yumudha kuusi. 10 Opo ihe Aayambi aakuluntu oya pangele ompangela ya dhipage wo Lasarus, 11 oshoka omolwe, Aajuda oyendji oya li taya yi kuBetania, noya itaale muJesus.

12 Esiku lya landula ko, ongundu onene yaantu, ndjoka ya li ye ya koshituthi, oya uvu kutya Jesus ote ya kuJerusalem. 13 Onkee ano oya kutha iiyale yomilunga e taya yi ye ke mu tsakaneke, noya tameke okwiigidha taya ti: “Otatu galikana a hupithwe! Ngoka te ya medhina lyaJehova na lalekwe nuuyamba, Omukwaniilwa gwaIsraeli.” 14 Sho Jesus a mono okasinogona, okwa kuutumba kuko, ngaashi owala kwa nyolwa taku ti: 15 “Ino tila, omwanakadhona gwaSion. Tala, omukwaniilwa gwoye ote ya, a kuutumba kokasinogona.” 16 Petameko aalongwa ye iinima mbyoka kaya li ye yi uvite ko, ihe sho ya mono Jesus ta tumbalekwa, oya dhimbulula kutya iinima mbyoka oya nyolwa kombinga ye nosho wo kutya okwe yi ningilwa.

17 Opo ihe ongundu yaantu ndjoka ya li pamwe naJesus, sho a yumudha Lasarus e te mu ithana mo mombila,* oya kala tayi hokolola kombinga yaashoka sha ningwa po. 18 Shika osho wo sha ningitha ongundu yaantu yi ye yi ka tsakaneke Jesus, sho ya uvu kutya okwa longa oshikumithalonga shika. 19 Onkee ano Aafarisayi oya lombwelathana taya ti: “Oompangela dhetu itadhi kwatha sha. Taleni, uuyuni awuhe otawu mu landula.”

20 Mokati kaamboka ya li ye ya okulongela Kalunga koshituthi omwa li wo mu na Aagreka yamwe. 21 Onkee ano Aagreka mboka oye ya kuFilippus, ngoka a za kuBetsaida shomuGalilea, noya tameke oku mu pula taya ti: “Omusimanekwa, otwa hala okumona Jesus.” 22 Filippus okwa yi e ta ka lombwela Andreas, Andreas naFilippus e taya yi, ya ka lombwele Jesus.

23 Ihe Jesus okwa ti kuyo: “Ethimbo olya thika, Omuna gwomuntu a tumbalekwe. 24 Oshili tandi mu lombwele, ngele omuma yoshilya oya gwile mevi, ihe inayi sila mo, otayi kala owala yimwe. Ihe ngele oya sile mo e tayi mene, ohayi vala iilya oyindji. 25 Kehe ngoka e hole omwenyo gwe ote gu kanitha, ihe kehe ngoka e tonde omwenyo gwe muuyuni mbuka ote gu hupitha, opo a ka mone omwenyo gwaaluhe. 26 Ngele opu na ngoka a hala okuyakula ndje, na landule ndje; naampoka ndi li opo wo omuyakuli gwandje ta ka kala; ngele opu na ngoka a hala okuyakula ndje, ota ka tumbalekwa kuTate. 27 Ngashingeyi ondi na uudhigu momwenyo gwandje; oshike ishewe ndi na okutya? Tate, hupitha ndje kwaashoka ndi li pokuningilwa.* Kombanda yevi, onde ya ko omolwoshinima shika. 28 Tate, simanekitha edhina lyoye.” Opo nduno megulu omwa zi ewi tali ti: “Onde li simanekitha nale, notandi ke li simanekitha ishewe.”

29 Ongundu yaantu, ndjoka ya li ya thikama mpoka oye li uvu, noya tameke taya ti kutya olya fa omundundumo gwomvula. Yalwe oya ti: “Omuyengeli a popi naye.” 30 Jesus okwa ti: “Ewi ndika olya popi, hamolwandje, ihe omolweni. 31 Uuyuni mbuka otawu pangulwa; nomupangeli guuyuni mbuka ota ka umbwa mo. 32 Ihe ngele nda endjelelekwa, otandi ka nanena aantu yomaludhi agehe kungame.” 33 Oohapu ndhika okwe dhi popi, opo a ulike kutya oku li poku ka sa eso lya tya ngiini. 34 Opo nduno ongundu yaantu oya ti kuye: “Ompango oya ti kutya Kristus ota kala sigo aluhe. Ihe omolwashike to ti, Omuna gwomuntu ota ka endjelelekwa? Omuna gwomuntu olye ano?” 35 Onkee ano Jesus okwa ti kuyo: “Uuyelele otawu kala mokati keni uule wokathimbo okafupi. Endeni, manga mu na uuyelele, opo omilema kaadhi mu sinde. Kehe ngoka ta ende momilema ke shi mpoka ta yi. 36 Manga mu na uuyelele, ulikeni kutya omu na eitaalo muwo, opo mu vule okuninga aana yuuyelele.

Sho Jesus a popi iinima mbika, okwa yi nokwe ya holama. 37 Nonando okwa li a longo iikumithalonga oyindji montaneho yawo, kaya li ye mu itaale, 38 opo oohapu dhomuhunganeki Jesaja dhi gwanithwe, ndhoka tadhi ti: “Jehova, olye a itaale shoka a uva kutse? Olye a hololelwa oonkondo* dhaJehova?” 39 Jesaja okwa popi ishewe kutya omolwashike itaaya vulu okwiitaala, a ti: 40 “Okwa tsikitha omeho gawo, nokwa kukutike omitima dhawo, opo omeho gawo kaaga mone ko, nokaaya uve ko shoka ye na okuninga e taya itedhulula, nondi ya aludhe.” 41 Jesaja okwa popi oohapu ndhika, molwaashoka okwa mono etumbalo lyaKristus, nokwa popi kombinga ye. 42 Kakele kaashono, aantu oyendji, mwa kwatelwa nokuli naapangeli, oya li ya itaale muJesus, ihe kaya li ye shi holola omolwAafarisayi, opo kaaya kondwe mo mosinagoga; 43 oshoka oya li ye hole okukala ya hokiwa kaantu, shi vulithe okukala ya hokiwa kuKalunga.

44 Ihe Jesus okwa igidha mokule ta ti: “Kehe ngoka a itaala ndje okwa itaala wo ngoka a tuma ndje; 45 nakehe ngoka a mona ndje okwa mona wo ngoka a tuma ndje. 46 Ngame onde ya, ndi li uuyelele muuyuni, opo kehe ngoka ta itaale ndje kaa kale momilema. 47 Kehe ngoka ta uvu oohapu dhandje, ihe ite dhi dhiginine, itandi mu pangula; oshoka inandi ya okupangula uuyuni, ihe onde ya oku wu hupitha. 48 Kehe ngoka itaa vulika kungame, noita taamba ko oohapu dhandje, opu na ngoka te mu pangula. Oohapu, ndhoka nda popi, odho tadhi ke mu pangula mesiku lyahugunina. 49 Oshoka inandi popya pahalo lyandje mwene, ihe Tate, ngoka a tuma ndje, oye a lombwele ndje shoka ndi na okupopya naashoka ndi na okulonga aantu. 50 Ondi shi kutya shoka a lombwela ndje otashi ti omwenyo gwaaluhe. Onkee ano kehe shoka handi popi, ohandi shi popi naanaa ngaashi Tate e shi lombwela ndje.