PaJohannes

18 Konima sho Jesus a popi oohapu ndhika, okwa yi pamwe naalongwa ye handiyaka yolusilu lwaKidron,* hoka kwa li ku na oshikunino, nokwa yi naalongwa ye moshikunino moka. 2 Judas, omugwaaleki gwe, naye kehala hoka okwa li e shi ko, molwaashoka hoka oko Jesus a li ha tsakanene olundji naalongwa ye. 3 Onkee ano Judas okwe ya hoka pamwe nongundu yaakwiita nosho wo naalangeli yotempeli, ya tumwa kaayambi aakuluntu nokAafarisayi, ye na oonyeka, oolamba niikondjitho. 4 Opo nduno Jesus okwa hedha komeho, molwaashoka okwa li e shi ashihe shoka a li e li poku ka ningilwa, nokwa ti kuyo: “Otamu kongo lye?” 5 Oye mu yamukula ya ti: “OJesus Omunasareti.” Okwa ti kuyo: “Ongame nguka!” Judas, omugwaaleki gwe, naye okwa li a thikama pamwe nongundu ndjoka.

6 Ihe sho Jesus a ti kuyo: “Ongame nguka,” oya hedha monima e taya ihata pevi. 7 Onkee ano okwe ya pula ishewe ta ti: “Otamu kongo lye?” Oya ti: “OJesus Omunasareti.” 8 Jesus okwe ya yamukula ta ti: “Onde mu lombwela kutya ongame nguka. Onkee ano ngele ongame tamu kongo, etheni aalumentu mbaka ya ye.” 9 Shoka osha ningwa, opo oohapu ndhoka a popile, dhi gwanithwe, ndhoka tadhi ti: “Inandi kanitha nando ogumwe gwomwaamboka wa pa ndje.”

10 Nena Simon Petrus, ngoka a li e na egongamwele, okwe li pweya mo, nokwa umpile omupiya gwomuyambi omunene, nokwa tete ko okutsi kwe kwokolulyo. Edhina lyomupiya ngoka oMalkus. 11 Ihe Jesus okwa ti kuPetrus: “Shuna egongamwele lyoye molumpangwa. Mbela kandi na okunwa oshitenga shoka nda pewa kuTate?”

12 Opo ihe aakwiita, omuwiliki gwetangakwiita nosho wo aalangeli yotempeli yAajuda oya kwata po Jesus e taye mu manga. 13 Oye mu fala tango kuAnnas, hemweno yaKajafas, ngoka a li omuyambi omunene omumvo ngoka. 14 Kajafas oye nokuli a li a lombwele Aajuda kutya oshi lile po uuwanawa wawo, omuntu gumwe a se, pehala lyaantu ayehe.

15 Simon Petrus nomulongwa gulwe oya li ya landula Jesus. Omulongwa ngoka okwa li e shiwike komuyambi omunene, nokwa yi naJesus mehale lyomuyambi omunene, 16 ihe Petrus okwa kala pondje, a thikama posheelo. Onkee ano omulongwa omukwawo, ngoka a li e shiwike komuyambi omunene, okwa yi e ta ka popya nokakadhona okapiya, hoka haka keelele posheelo, nokwa eta Petrus meni. 17 Onkee ano okakadhona okapiya hoka oka ti kuPetrus: “Ano nangoye ku shi omulongwa gwomulumentu nguka?” Petrus okwa ti: “Aawe.” 18 Aapiya nosho wo aalangeli yotempeli oya li ya thikama pomulilo, ngoka ya tema, taya huhulukwa, molwaashoka okwa li ku na uutalala. Petrus naye okwa li a thikama pamwe nayo ta huhulukwa.

19 Onkee ano omuyambi omukuluntu okwa pula Jesus kombinga yaalongwa ye nosho wo kombinga yaashoka ha longo aantu. 20 Jesus okwe mu yamukula ta ti: “Onda kala handi popi montaneho yaantu. Onda kala wo handi longo aluhe aantu mosinagoga nomotempeli, moka Aajuda ayehe haya gongala, noinandi popya nando osha meholamo. 21 Omolwashike to pula ndje? Pula mboka ya uva shoka nde ya lombwela. Tala, oye shi shoka nda popya.” 22 Sho Jesus a popi oohapu ndhoka, gumwe gwomaalangeli yotempeli, ngoka a li a thikama popepi, okwe mu dhenge enkawa moshipala, nokwa ti kuye: “Osho to yamukula omuyambi omukuluntu ngawo?” 23 Jesus okwe mu yamukula ta ti: “Ngele onda popya sha sha puka, shi lombwela ndje, ihe ngele shoka nda popya oshi li mondjila, owa dhengele ndje shike?” 24 Opo nduno Annas okwa mangitha Jesus e te mu tumu komuyambi omunene, Kajafas.

25 Simon Petrus okwa li a thikama mpoka ta huhulukwa. Opo nduno mboka ya li po oye mu pula taya ti: “Ano nangoye ku shi gumwe gwomaalongwa ye?” Petrus okwe shi ipatana, ta ti: “Aawe.” 26 Gumwe gwomaapiya yomuyambi omunene, omukwanezimo gwomulumentu, ngoka a li a tetwa okutsi kuPetrus, okwa ti: “Ano inandi ku mona wu li naye moshikunino?” 27 Ihe natango, Petrus okwe shi ipatana, na nziya ekondombolo olya igi.

28 Opo ihe oya kutha Jesus megumbo lyaKajafas, noye mu fala kegumbo lyangoloneya. Osha li ongula onene. Ihe yo yene inaya ya mo megumbo lyangoloneya, opo kaaya inyateke, ya vule okulya Opaasa. 29 Onkee ano Pilatus okwe ya kuyo pondje, nokwa ti: “Omulumentu nguka otamu mu tamanekele shike?” 30 Oye mu yamukula ya ti: “Andola omulumentu nguka ka li a ninga sha sha puka,* ando inatu mu eta kungoye.” 31 Onkee ano Pilatus okwa ti kuyo: “Mu kuthii po e tamu ke mu pangula sha ikolelela kompango yeni.” Aajuda oya ti kuye: “Inashi pitikwa pampango, tu dhipage omuntu.” 32 Shoka osha ningwa, opo oohapu, ndhoka Jesus a popile kutya ota ka sa eso lya tya ngiini, dhi gwanithwe.

33 Onkee ano Pilatus okwa shuna megumbo ishewe e ta ithana Jesus, nokwa ti kuye: “Ongoye Omukwaniilwa gwAajuda?” 34 Jesus okwe mu yamukula ta ti: “Oto pula ndje ngaa shili molwaashoka wa hala oku shi tseya, nenge omolwaashoka wa uva kombinga yandje kuyalwe?” 35 Pilatus okwa ti kuye: “Ngame kandi shi Omujuda. Oshigwana sheni naayambi aakuluntu oyo ye ku eta kungame. Owa ninga shike?” 36 Jesus okwe mu yamukula ta ti: “Uukwaniilwa wandje kawu shi oshitopolwa shuuyuni mbuka. Andola owa li oshitopolwa shuuyuni mbuka, ando aayakuli yandje oya kondja, opo kaandi gandjwe miikaha yAajuda. Ihe ngaashi nde ku lombwela, Uukwaniilwa wandje kawu shi womuuyuni mbuka.” 37 Onkee ano Pilatus okwa ti kuye: “Eewa ano; tashi ti ngoye omukwaniilwa?” Jesus okwe mu yamukula ta ti: “Eeno, ongaashi we shi popi kutya ngame omukwaniilwa. Onda valwa, nonde ya muuyuni, opo ndi hokolole kombinga yoshili. Kehe ngoka ha kala metsokumwe noshili ota pulakene kewi lyandje.” 38 Pilatus okwa ti kuye: “Oshili oshike?”

Konima sho a popi ngawo, okwa yi ishewe pondje kAajuda, nokwa ti kuyo: “Inandi mu mona ondjo yasha. 39 Shimwe ishewe, omu na ondjigilile yokupula ndje, ndi mu mangululile omulumentu gumwe pOpaasa. Onkee ano nandi mu mangululile Omukwaniilwa gwAajuda?” 40 Natango, oya igidha taya ti: “Tu mangululila Barabbas, pehala lyomulumentu nguka.” Barabbas okwa li omuyugi.