PaMateus

12 Pompito yimwe, Jesus naalongwa ye oya li taya taakana momapya mesiku lyEsabati. Aalongwa ye oya li ya sa ondjala, onkee oya tameke okupolola iilya ya lye. 2 Sho Aafarisayi ye shi mono, oya ti kuye: “Tala, aalongwa yoye otaya ningi shoka inaashi pitikwa pampango mEsabati.” 3 Jesus okwa ti kuyo: “Mbela inamu lesha nani shoka David nosho wo aalumentu mboka ya li naye, ya ningile sho ya sa ondjala? 4 Mbela David ina ya megumbo lyaKalunga, pamwe naalumentu mboka e taya li iikwiila yeuliko, mbyoka inaaya pitikwa pampango oku yi lya, ihe aayambi owala ye yi pitikilwa? 5 Nenge inamu lesha mOmpango kutya aayambi oya li haya longo motempeli mOmasabati, ihe kaya li haya kala ye na ondjo? 6 Ihe otandi mu lombwele, nguka e li mpaka okwa simana e vule otempeli. 7 Kakele kaashono, andola omwa li mu uvite ko shoka oohapu ndhika tadhi ti: ‘Onda hala esilohenda, ihe hamayambo,’ ando inamu pangula mbaka kaaye na ondjo. 8 Oshoka Omuna gwomuntu oye Omuwa gwEsabati.”

9 Konima sho a zi po pehala mpoka, okwa yi mosinagoga yawo, 10 moka mwa li mu na omulumentu e na oshikaha sha sa. Molwaashoka oya li ya hala okutamaneka Jesus, oye mu pula ya ti: “Osha pitikwa tuu pampango, okwaaludha mEsabati?” 11 Okwa ti kuyo: “Ngele gumwe gwomune oku na owala onzi yimwe e tayi gwile melambo mesiku lyEsabati, mbela ita yi e ke yi hile mo? 12 Mbela omuntu ina simana unene e vule onzi? Onkee ano osha pitikwa pampango okulonga oshilonga oshiwanawa mEsabati.” 13 Opo ihe Jesus okwa ti komulumentu ngoka: “Ukililitha oshikaha shoye.” Opo nduno sho e shi ukililitha, osha aluka e tashi kala sha fa oshikaha oshikwawo. 14 Ihe Aafarisayi oya zi mo noya pangele ompangela ya dhipage Jesus. 15 Sho Jesus e shi ndhindhilike mo, okwa zi po pehala mpoka. Aantu oyendji oye mu landula e ta aludha ayehe, mboka ya li taya ehama noye na omaunkundi. 16 Ihe okwe ya londodha kaaya lombwele nando omuntu kombinga ye, 17 opo oohapu ndhoka dha popiwa okupitila momuhunganeki Jesaja, dhi gwanithwe, ndhoka tadhi ti:

18 “Tala, omupiya gwandje ngoka nda hogolola, omumwandje omuholike, ngoka nda hokwa! Otandi tula ombepo yandje kombanda ye, nota ka tseyithila iigwana shoka sha uka. 19 Ita ka nyenyeta, ye ita ka igidha, newi lye itali ka uvika nando okomuntu momapandaanda. 20 Oshihenguti shombungu sha tanduka ite shi nyanyagula, nelapi lyolamba tali tsina olwithi ite li dhimi, sigo a eta uuyuuki. 21 Eeno, iigwana otayi ka inekela medhina lye.”

22 Opo ihe oye mu etele omulumentu e na ondemoni, ngoka a li omuposi nomuthitawi, nokwe mu aludha e ta tameke okupopya nokumona ko. 23 Sho ongundu yaantu ye shi mono oya li ya kumwa, noya tameke tayi ti: “Pamwe nguka oye Omuna gwaDavid?” 24 Sho Aafarisayi ye shi uvu, oya ti: “Omulumentu nguka oha tidha mo oondemoni medhina lyaBelsebul,* omupangeli gwoondemoni.” 25 Sho Jesus a tseya kutya otaya dhiladhila shike, okwa ti kuyo: “Uukwaniilwa kehe wa topoka otawu teka po, noshilando kehe, nenge egumbo lya topoka itali kala po. 26 Sha faathana, ngele Satana oha tidha mo oondemoni dhe mwene, kungawo, ita ipilukile po ye mwene? Mbela uukwaniilwa we otawu vulu ngaa okukala po? 27 Shimwe ishewe, ngele ohandi tidha mo oondemoni koonkondo dhaBelsebul, yo oyana yeni ohaye dhi tidha mo koonkondo dhalye? Onkee ano yo otaye ke mu pangula. 28 Ihe ngele okoonkondo dhombepo ondjapuki yaKalunga handi tidha mo oondemoni, nena osha hala okutya Uukwaniilwa waKalunga owe mu pitilila po lela. 29 Nenge ongiini gumwe ta vulu okuponokela egumbo lyomulumentu omunankondo e te mu yugu omaliko ge, kaapu na oku mu manga tango? Okonima owala ngele e mu manga, ta vulu oku mu yuga omaliko ge. 30 Kehe ngoka inaa gama kombinga yandje oku li ompinge nangame, nakehe ngoka itaa gongele pamwe nangame, ota halakanitha.

31 “Onkee ano otandi mu lombwele, omuntu ota dhiminwa po eyono kehe nesheko kehe, ihe ngoka ta sheke ombepo ondjapuki ita dhiminwa po. 32 Pashiholelwa, kehe ngoka ta popile Omuna gwomuntu muuwinayi, ota dhiminwa po; ihe kehe ngoka ta popile ombepo ondjapuki muuwinayi, ita dhiminwa po, kutya nduno omuuyuni mbuka,* nenge omwaamboka tawu ke ya.

33 “Ngele ngoye omuti omwaanawa, nena oto ka imika iiyimati iiwanawa, ihe ngele ngoye omuti omwiinayi, oto ka imika iiyimati iiwinayi, oshoka omuti ohagu dhimbululwa kiiyimati yagwo. 34 Oyana yomapili* ne! Ongiini tamu vulu okupopya oohapu oombwanawa, ngele ne aakolokoshi? Oshoka okana ohaka popi shoka sha udhilila momutima. 35 Omuntu omwaanawa oha pititha mo iinima iiwanawa mompungulilo ye yiinima iiwanawa, nomuntu omwiinayi oha pititha mo iinima iiwinayi mompungulilo ye yiinima iiwinayi. 36 Otandi mu lombwele kutya aantu ya tya ngaaka oye na oku ka ihokolola mEsiku lyEpangulo, omolwoohapu oombwinayi ndhoka ya popya; 37 oshoka oohapu dhoye odho tadhi ka utha ngele Kalunga ote ke ku tala ko wu li omuyuuki, nenge ote ke ku geela.”

38 Opo nduno aalongimpango nAafarisayi oya ti kuye: “Muhongi, tu ulukila endhindhiliko.” 39 Jesus okwe ya yamukula ta ti: “Epipi ndika ekolokoshi nokali shi edhiginini, otali tsikile okukonga endhindhiliko, ihe itali pewa endhindhiliko lyasha, kakele kendhindhiliko lyomuhunganeki Jona. 40 Oshoka ngaashi owala Jona a kalele mela lyohi onene uule womasiku gatatu, omutenya nuusiku, nOmuna gwomuntu ota ka kala mombila, uule womasiku gatatu, omutenya nuusiku. 41 Aaninive otaya ka yumudhwa pamwe nepipi ndika mEsiku lyEpangulo, notaye ke li pa uusama, oshoka yo oya itedhulula, sho Jona e ya uvithile. Ihe tala, nguka e li mpaka okwa simana e vule Jona. 42 Omukwaniilwakiintu gwokuumbugantu ota ka yumudhwa pamwe nepipi ndika mEsiku lyEpangulo, note ke li pa uusama, oshoka okwa zile kokule, opo e ye a pulakene koondunge dhaSalomo. Ihe tala, nguka e li mpaka okwa simana e vule Salomo.

43 “Uuna ombepo ya nyata* ya zi mo momuntu, ohayi taakana moombuga, tayi kongo ehala lyokuthuwa po, ihe itayi li mono. 44 Opo ihe otayi ti: ‘Otandi shuna kegumbo lyandje, hoka nda zile.’ Sho ya galuka, oya adha egumbo kaali na omuntu, ihe olya kombwa lya yela sheke nolya opalekwa nawa. 45 Opo ihe oya yi e tayi etelele oondemoni dhilwe heyali, ndhoka dha kolokosha dhi yi vule, nongele dha yi meni, otadhi kala moka. Nena onkalo yahugunina yomuntu ngoka otayi ka kala ombwiinayi noonkondo, yi vule yotango. Shoka osho wo tashi ka ningilwa epipi ndika ekolokoshi.”

46 Omanga a li ta popi nongundu yaantu, yina naamwayinamati oya li ya thikama pondje, ya hala okupopya naye. 47 Onkee ano gumwe okwa ti kuye: “Nyoko naamwanyoko oya thikama pondje, ya hala okupopya nangoye.” 48 Jesus okwe mu yamukula a ti: “Meme olye, naamwamememati oolye?” 49 Opo nduno Jesus okwa ulike kaalongwa ye e ta ti: “Tala, meme naamwamememati oyo mbaka! 50 Oshoka kehe ngoka ha longo ehalo lyaTate, ngoka e li megulu, oye omumwamememati, omumwamemekadhona nameme.”