PaLukas

3 Momumvo 15 gwokupangela kwOmukesari Tiberius, Pontius Pilatus okwa li ngoloneya gwaJudea, Herodes* okwa li omupangeli gwoshitopolwa* shaGalilea, omumwahe Filippus okwa li omupangeli gwoshitopolwa shaIturea noshaTrakonitis, Lisanias okwa li omupangeli gwoshitopolwa shaAbilene, 2 Annas okwa li omuyambi omukuluntu, naKajafas okwa li omuyambi omunene, nopethimbo olyo tuu ndyoka, Kalunga okwa pe Johannes, omwana gwaSakaria, etumwalaka mombuga.

3 Onkee ano okwa yi komikunda adhihe, ndhoka dhi li popepi nomulonga gwaJordan, ta uvithile aantu kutya oye na okuninginithwa ya ulike kutya oyi itedhulula, opo ya dhiminwe po oondjo dhawo, 4 ngaashi owala sha nyolwa membo lyomuhunganeki Jesaja, sho a ti: “Ewi otali ka igidha mombuga tali ti: ‘Longekidheni ondjila yaJehova! Lalakanitheni omapola ge. 5 Omasilu agehe naga filwe, oondundu niikulundundu ayihe nayi lalakanithwe; oondjila dha goyoka nadhi ukililithwe, noondjila dhiisilukutumba* nadhi yelekanithwe; 6 opo aantu ayehe* ya mone ehupitho lyaKalunga.’”

7 Onkee ano okwa tameke okulombwela ongundu yaantu mboka ye ya ya ninginithwe kuye, ta ti: “Oyana yomapili* ne, olye e mu londodha mu ye ontuku egeelo, ndyoka tali ya? 8 Onkee ano imikeni iiyimati mbyoka tayi ulike kutya omwa itedhulula. Inamu lombwelathana tamu ti: ‘Tse otu na tate Abraham,’ oshoka ngame otandi mu lombwele, Kalunga ota vulu okushitila Abraham aanona okuza momamanya ngaka. 9 Nokuli ekuya olya egekwa nale pekota lyomuti. Onkee ano omuti kehe ihaagu imi iiyimati iiwanawa otagu kewa po e tagu umbilwa momulilo.”

10 Opo nduno ongundu yaantu oye mu pula tayi ti: “Oshike nduno tu na okuninga po?” 11 Ihe okwe ya yamukula ta ti: “Omuntu, ngoka e na oonguwo* mbali, na pe ngoka kee na sha nando, naangoka e na iikulya na ninge sha faathana.” 12 Nokuli naafendelithi oye ya ya ninginithwe, noya ti kuye: “Muhongi, natu ninge shike?” 13 Okwa ti kuyo: “Inamu futitha aantu iifendela ya pitilila.” 14 Aakwiita oye mu pula wo taya ti: “Otu na okuninga shike? Opo ihe Johannes okwa ti kuyo: “Inamu yuga nando omuntu, nenge mu mu lundile, opo e mu pe ombumbo, ihe kaleni mwa gwanenwa kwaashoka mu na.”*

15 Molwaashoka aantu oya li ya tegelela Kristus, oya li taya ipopile momitima dhawo kombinga yaJohannes taya ti: “Pamwe nguka oye Kristus?” 16 Johannes okwe ya yamukula ayehe ta ti: “Ngame kombinga yandje otandi mu ninginitha nomeya, ihe ngoka te ya oku na oonkondo e vule ndje, noinandi gwana nokuli okudhitulula omiya dhoongaku dhe. Ye ote ke mu ninginitha nombepo ondjapuki nosho wo nomulilo. 17 Oshiyelitho* she oku shi na moshikaha she a opaleke olupale lwe nawa, niilya ye ote ke yi pungula moshigandhi, ihe etutu ote ke li fika po nomulilo itaagu vulu okudhimwa.”

18 Okwe ya lombwele wo iinima oyindji, opo e ya tse omukumo, nokwa tsikile oku ya uvithila onkundana ombwanawa. 19 Ihe sho Johannes a pukulula Herodes, omupangeli gwoshitopolwa, shi na ko nasha niilonga iiwinayi ayihe, mbyoka a longa nosho wo kombinga yaHerodias, omukulukadhi gwomumwahe, 20 Herodes okwa longo wo uuwinayi wulwe, sho a tulitha Johannes mondholongo.

21 Konima sho aantu ayehe ya ninginithwa, Jesus naye okwa ninginithwa. Sho a li ta galikana, egulu olya eguluka, 22 opo nduno ombepo ondjapuki oya kulukile kuye yi li molupe lwonguti, nomegulu omwa zi ewi tali ti: “Nguka Omumwandje, omuholike, ngoka nde mu hokwa.”