PaMateus
3 Pomasiku ngeyaka, Johannes Omuninginithi okwa tameke okuuvitha mombuga yaJudea, 2 ta ti: “Itedhululeni, oshoka Uukwaniilwa womegulu owa hedha popepi.” 3 Johannes oye naanaa ngoka a popiwa komuhunganeki Jesaja, sho a ti: “Ewi otali igidha mombuga tali ti: ‘Longekidheni ondjila yaJehova! Lalakanitheni omapola ge.’” 4 Johannes okwa li ha zala onguwo yomafufu gongamelo nepaya lyoshipa mombunda. Iikulya ye oya li oombahu nomagadhi goonyushi. 5 Opo nduno aantu yomuJerusalem, yomuJudea ashihe noyomiitopolwa ayihe mbyoka yi li popepi nomulonga gwaJordan, oya yi kuye. 6 Opo ihe okwe ya ninginitha* momulonga gwaJordan, sho ya hempulula montaneho oondjo dhawo.
7 Sho a mono oyendji yomAafarisayi nAasadukayi taye ya okuninginithwa, okwa ti kuyo: “Oyana yomapili* ne, olye e mu londodha mu ye ontuku egeelo ndyoka tali ya? 8 Onkee ano imikeni iiyimati mbyoka tayi ulike kutya omwa itedhulula. 9 Inamu itungila uugumbo mu tye, ‘Tse otu na tate Abraham.’ Oshoka ngame otandi mu lombwele, Kalunga ota vulu okushitila Abraham aanona okuza momamanya ngaka. 10 Ekuya olya egekwa nale pekota lyomuti. Onkee ano omuti kehe ihaagu imi iiyimati iiwanawa, otagu kewa po e tagu umbilwa momulilo. 11 Ngame kombinga yandje, otandi mu ninginitha nomeya, molwaashoka omwa itedhulula, ihe ngoka te ke ya konima yandje oku na oonkondo e vule ndje, noinandi gwana nokuli okuhula ko oongaku dhe. Ote ke mu ninginitha nombepo ondjapuki nosho wo nomulilo. 12 Oshiyelitho* she oku shi na moshikaha she, nolupale lwe ote ke lu opaleka nawa, niilya ye ote ke yi pungula moshigandhi, ihe etutu ote ke li fika po nomulilo itaagu vulu okudhimwa.”
13 Opo nduno Jesus okwa zi kuGalilea e ta yi komulonga gwaJordan a ka ninginithwe kuJohannes. 14 Ihe Johannes okwa kambadhala oku mu keelela ta ti: “Ongame nda gwana okuninginithwa kungoye, ihe ongoye ishewe to ya kungame ndi ku ninginithe?” 15 Jesus okwe mu yamukula ta ti: “Shoka osho shi na okukala, opo ashihe shoka Kalunga a hala shi gwanithwe po.” Opo nduno Johannes okwa zimine. 16 Sho Jesus a ninginithwa, okwa zi ko mbala kohi yomeya, ihe tala, egulu olya eguluka nokwa mono ombepo yaKalunga ya fa onguti tayi kulukile kuye. 17 Opo nduno megulu omwa zi ewi tali ti: “Nguka Omumwandje, omuholike, ngoka nde mu hokwa.”