Iilonga yaayapostoli
22 “Aalumentu ne, aamwatate nootate, pulakeneni, sho tandi ipopile koshipala sheni ngashingeyi.” 2 Ano sho ya uvu kutya ota popi nayo melaka lyOshihebeli, oya kala ya mwena thilu, opo ihe okwa ti: 3 Ngame Omujuda, nda valelwa muTarsus shomuKilikia, ihe onda sikola muka muJerusalem, nda longwa kuGamaliel ye mwene,* nonda nongekwa, ndi kale handi landula thiluthilu Ompango, ndjoka ya li hayi landulwa kootatekulululwa, nondi na uulaadhi wokulongela Kalunga, ngaashi amuhe mú wu na nena. 4 Onda kala nokuhepeka aalumentu naakiintu, mboka haya landula Ondjila yOmuwa, noku ya dhipagitha nokuli, oku ya mangitha po noku ya tulitha mondholongo. 5 Omuyambi omunene naakuluntu ayehe yoshigwana otaya vulu oku shi koleka. Oya li wo ya pa ndje oontumwafo, ndi ye nadho kAajuda ooyakwetu kuDamaskus, ndi ete ooitaali mboka kuJerusalem ya mangwa, opo ye ye ya geelwe.
6 “Ihe mokati komutenya, sho nda li mondjila, nondi li pokuthika muDamaskus, ohaluka, onda kundukidhwa kuuyelele wa tsa, wa zi megulu, 7 e tandi ihata pevi, nonda uvu ewi tali ti kungame: ‘Saulus, Saulus, omolwashike to hepeke* ndje?’ 8 Onde mu pula nda ti: ‘Omusimanekwa, ongoye lye?’ Opo nduno okwa ti: ‘Ongame Jesus Omunasareti, ngoka to hepeke.’* 9 Aalumentu, mboka ya li pamwe nangame, uuyelele mboka oye wu mono, ihe inaya uva ewi lyaangoka a li ta popi nangame. 10 Opo ihe onda ti: ‘Omusimanekwa, nandi ninge po shike?’ Okwa lombwele ndje a ti: ‘Thikama e to yi kuDamaskus, naahoka oko to ka lombwelwa ashihe, shoka wu na okuninga.’ 11 Ihe molwaashoka kanda li ndi wete ko nando omolwuuyelele, mboka wa tsa, muDamaskus, onda yi mo nda kwatwa moshikaha kaalumentu, mboka nda li nayo.
12 “Nena omulumentu gwedhina Ananias, omutilikalunga, noha dhiginine Ompango, ngoka e na epopilo ewanawa mokati kAajuda ayehe, mboka ya li haya zi moka, 13 okwe ya kungame. Okwa thikama pungame, nokwa lombwele ndje ta ti: ‘Omumwatate Saulus, tsikuluka!’ Pethimbo olyo tuu ndyono, onda ligamene pombanda, nonde mu mono. 14 Okwa ti: ‘Kalunga kootatekulululwa okwe ku hogolola, wu tseye ehalo lye, nowu mone ngoka omuyuuki nokuuva ewi lye, 15 molwaashoka ongoye to ka hokololela aantu iinima ayihe, mbyoka wa mona, nowa uva kuye. 16 Ihe ngashingeyi, omolwashike to kakadhala? Thikama e to ka ninginithwa, opo oondjo dhoye dhi dhimwe po mokwiithana edhina lye.’
17 “Ihe sho nda shuna kuJerusalem, nonda li tandi galikana motempeli, onda mono emoniko, 18 ndi mu wete ta lombwele ndje ta ti: ‘Endelela, wu ze mo muJerusalem nziya, molwaashoka itaya ka itaala shoka to ya lombwele kombinga yandje.’ 19 Opo nduno onda ti kuye: ‘Omuwa, yo yene oye shi shi nawa kutya onda li handi tulitha mondholongo ayehe, mboka ya itaala mungoye noku ya dhengitha noongola moosinagoga. 20 Sho ombangi yoye, Stefanus, tayi dhipagwa,* opo nda li nda thikama, nonda li nde shi panda; onda li tandi tonatele oonguwo dhokombanda dhaamboka taye mu dhipaga.’ 21 Ihe nonando ongawo, Omuwa okwa lombwele ndje a ti: ‘Inda, molwaashoka otandi ke ku tuma mokati kiigwana yokokule.’”
22 Aantu oya kala taya pulakene kuye, sigo oosho a popi oohapu ndhoka. Opo nduno oya igidha mokule taya ti: “Omulumentu nguka mu dhipageni, oshoka ina gwana okukala nomwenyo!” 23 Molwaashoka oya li taya igidha taya umbile mombanda oonguwo dhawo dhokombanda nokufundila evi mombepo, 24 omuwiliki gwetangakwiita okwa gandja elombwelo Paulus a etwe momuhandjo gwaakwiita a pulwapulwe nokudhengwa, opo omuwiliki gwaakwiita a mone kutya omolwashike aantu ya li taya igidha Paulus a dhipagwe. 25 Ihe sho ye mu manga nelalakano lyoku mu dhenga noongola, Paulus okwa lombwele omukuluntu gwetangakwiita ngoka a li a thikama mpoka, ta ti: “Osha pitikwa ngaa pampango yoshigwana Omuroma* a dhengwe manga inaa pangulwa?” 26 Sho omukuluntu gwetangakwiita e shi uvu, okwa yi komuwiliki gwetangakwiita, nokwe shi mu lombwele, ta ti: “Oshike to dhiladhila okuningila omulumentu nguka Omuroma?” 27 Onkee ano omuwiliki gwetangakwiita okwe ya puPaulus, nokwe mu pula ta ti: “Lombwela ndje, tashi ti nani ngoye Omuroma?” Paulus okwa ti: “Eeno.” 28 Omuwiliki gwetangakwiita okwa ti: “Ngame uukwashigwana waRoma onde wu landa niimaliwa oyindji.” Paulus okwa ti: “Ihe ngame omvalele yaRoma.”
29 Onkee ano aalumentu, mboka ya li ye li poku mu pulapula taye mu monitha iihuna oye mu etha nziya. Opo ihe omuwiliki gwetangakwiita okwa kwatwa kuumbanda, sho a mono kutya Paulus Omuroma, naasho e mu mangitha nomalyenge.
30 Esiku lya landula ko, molwaashoka okwa li a hala okutseya nawa kutya omolwashike Paulus ta tamanekwa kAajuda, okwe mu mangulula, nokwa gandja elombwelo, opo aayambi aakuluntu nosho wo Ompangu ayihe yopombanda yAajuda yi gongale. Opo ihe okwa eta Paulus, nokwe mu thikameke mokati kawo.