paMarkus
15 Nziya, sho eluwa tali tende, aayambi aakuluntu, aakuluntu yoshigwana nosho wo aalongimpango, ano Ompangu ayihe yopombanda yAajuda, oya kundathana e taya manga Jesus kiikaha, noye mu fala kuPilatus. 2 Onkee ano Pilatus okwe mu pula ta ti: “Ongoye Omukwaniilwa gwAajuda?” Jesus okwe mu yamukula ta ti: “Eeno, ongaashi we shi popi.” 3 Ihe aayambi aakuluntu oya li taye mu tamanekele iinima oyindji. 4 Opo ihe Pilatus okwa tameke ishewe oku mu pula ta ti: “Ito yamukula sha? Tala owala iinima ayihe, mbyoka taye ku tamanekele.” 5 Ihe Jesus ine mu yamukula nando, nosha li sha kumitha Pilatus.
6 Poshituthi shOpaasa kehe, Pilatus okwa li ha mangulula omunandholongo gumwe, ngoka aantu taya pula. 7 Pethimbo mpoka, omulumentu gwedhina Barabbas okwa li mondholongo pamwe naakolokoshi ooyakwawo, mboka ya li ya tsu ondumbo nepangelo, noya li ya dhipaga aantu. 8 Onkee ano ongundu yaantu oye ya kuPilatus noya tameke oku mu pula e ya mangululile omunandholongo gumwe, ngaashi he ya ningile shito. 9 Okwe ya yamukula ta ti: “Omwa hala ndi mu mangululile Omukwaniilwa gwAajuda?” 10 Okwa li e shi kutya aayambi aakuluntu oya gandja Jesus miikaha ye omolwondumbo. 11 Ihe aayambi aakuluntu oya hwahwameke ongundu yaantu yi pule Barabbas oye a mangululwe, pehala lyaJesus. 12 Natango Pilatus okwa ti kuyo: “Ye Jesus, ngoka hamu ithana Omukwaniilwa gwAajuda, nandi mu ninge ngiini?” 13 Natango oya tsikile okwiigidha taya ti: “Na ka alelwe komuti!”* 14 Ihe Pilatus okwe ya pula ishewe ta ti: “Omolwashike? Okwa ningi shike sha puka?” Natango oya tsikile owala okwiigidha taya ti: “Na ka alelwe komuti!”* 15 Ihe molwaashoka Pilatus okwa li a hala okwoopalela ongundu yaantu, okwe ya mangululile Barabbas, nokonima sho a dhengitha Jesus noongola, okwe mu gandja a ka alelwe komuti.
16 Opo nduno aakwiita oye mu fala mehale, ano megumbo lyangoloneya, noya ithana aakwiita ayehe. 17 Opo nduno oye mu zaleke elwaakani etiliganembwilili, noya tungu oshishani shomakwega e taye shi mu zaleke. 18 Opo ihe oya tameke oku mu kunda taya ti: “Natu ku kunde, Omukwaniilwa gwAajuda!” 19 Shimwe ishewe, oya li taye mu dhenge noshihenguti shombungu momutse, taye mu hiyile omayeye noye mu tsile oongolo.* 20 Hugunina, konima sho ye mu sheke, oye mu hula elwaakani etiligane mbyu e taye mu zaleke onguwo ye yokombanda. Opo nduno oye mu fala a ka alelwe komuti. 21 Sho ye li mondjila, oya tsakaneke omulumentu Omukireni gwedhina Simon, he yaAleksander naRufus, ta zi komukunda, noye mu thiminike a humbate ko komuti gwomahepeko* gwaJesus.
22 Onkee ano oya eta Jesus kehala hali ithanwa Golgata, edhina ndyoka tali ti, “Ehala lyOmakolotse.” 23 Hoka oya kambadhala oku mu pa omaviinu ga vongakanithwa mumwe nomira, ihe ine ga nwa. 24 Opo nduno oye mu alele komuti, noya itopolele onguwo ye yokombanda pamukalo gwokuumba oshihogololitho, ya mone kutya olye ta kutha po shike. 25 Potundi ontitatu,* oye mu alele komuti. 26 Opo ihe pombanda yomutse gwe oya mbambangele po okapilangi ka nyolwa oohapu kutya omolwashike a dhipagwa, tadhi ti: “Omukwaniilwa gwAajuda.” 27 Shimwe ishewe, oya alele pamwe naye komiti dhomahepeko aalumentu yaali aayugi, gumwe okolulyo lwe, nomukwawo okolumoho lwe. 28 —— 29 Mboka ya li taya piti po oya li wo taye mu sheke nokwiipuka komitse taya ti: “Hee! Ngoye ngoka wa ti oto vulu okukumuna po otempeli e to yi tungulula muule womasiku gatatu, 30 ihupitha nduno mwene mokuza ko komuti gwomahepeko.”* 31 Aayambi aakuluntu naalongimpango nayo wo oya tameke oku mu sheka taya lombwelathana taya ti: “Oku shi okuhupitha yalwe, ihe okwa nyengwa okwiihupitha! 32 Ndishi oye Kristus, Omukwaniilwa gwaIsraeli, na ze ko nduno ngashingeyi komuti gwomahepeko.* Ngele otwe shi mono, otatu mu itaale.” Nokuli naamboka ya alelwa pamwe naye komiti dhomahepeko oya li taye mu sheke.
33 Sho otundi ontihamano* ya thiki, oshilongo ashihe osha ningi omilema sigo opotundi ontimugoyi.* 34 Opo nduno potundi ontimugoyi, Jesus okwa igidha mokule ta ti: “Eli, Eli, lama sabakitani?” sha hala okutya: “Kalunga kandje, Kalunga kandje, omolwashike wa ekelahi ndje?” 35 Opo ihe sho yamwe, mboka ya li ya thikama popepi, ye shi uvu, oya tameke taya ti: “Tala! Ota ithana Elia.” 36 Opo nduno gumwe okwa matuka e ta kutha oshiyayo, nokwe shi yaya momaviinu omalulu e te shi tula koshihenguti shombungu, te shi mu pe a nwe, ta ti: “Mu etha a kale ngaaka! Natu tale ngele Elia ote ya e mu kuthe ko.” 37 Ihe Jesus okwa igidha mokule nokwa si.* 38 Opo ihe etopolitholapi lyotempeli olya tuuka pokati, okuza pombanda sigo opevi. 39 Sho omukuluntu gwetangakwiita, ngoka a li a thikama popepi naye a mono kutya Jesus okwa sa, naasho a mono iiningwanima ayihe, mbyoka ya ningwa po, okwa ti: “Nguka okwa li shili Omuna gwaKalunga.”
40 Opwa li wo aakiintu, mboka taya tala ya thikama ye li kokule, nayamwe yomuyo oya li Maria Magdalena, Salome nosho wo Maria, yina yaJakob* naJoses, 41 mboka ya li haya ende pamwe naJesus noku mu yakula, sho a li muGalilea. Opwa li wo aakiintu yalwe oyendji, mboka ya yile naye kuJerusalem.
42 Molwaashoka osha li komatango, nosha li esiku lyElongekidho, sha hala okutya, esiku ndyoka hali tetekele Esabati, 43 Josef gwokuArimatia, oshilyo sha simana shOmpangu yoPombanda yAajuda, ngoka wo a li a tegelela Uukwaniilwa waKalunga, okwa i tsu omukumo e ta yi kuPilatus, nokwa pula a pewe omudhimba gwaJesus. 44 Ihe molwaashoka Pilatus okwa li a limbililwa ngele Jesus okwa sa shili, okwa ithana omukuluntu gwetangakwiita, nokwe mu pula ngele Jesus okwa sa nale. 45 Onkee ano konima sho a shilipaleke nomukuluntu gwetangakwiita, okwa gandja omudhimba gwaJesus kuJosef. 46 Konima sho Josef a landa oshiyata sholiina, okwa kutha ko omudhimba gwaJesus komuti gwomahepeko* e te gu dhingile moshiyata sholiina, nokwe gu langeke mombila* ya hokwa memanya. Opo nduno posheelo shombila okwa undulile po emanya. 47 Ihe Maria Magdalena naMaria, yina yaJoses, oya kala ya tala mpoka pwa langekwa omudhimba gwaJesus.