Ontiyali kAatessalonika

1 Ngame Paulus, pamwe naSilvanus* naTimoteus, otandi nyolele egongalo lyomuTessalonika, ndyoka li li muukumwe naKalunga, Tate yetu, nosho wo nOmuwa Jesus Kristus:

2 Uuwanawahenda nombili, ndjoka hayi zi kuKalunga, Tate, nosho wo kOmuwa Jesus Kristus, nayi kale pamwe nane.

3 Ohatu pandula aluhe Kalunga omolweni, aamwatate. Shoka osha opala, molwaashoka eitaalo lyeni otali ende tali kolo, nohole yakehe gumwe gwomune yokukala mu holathane otayi ende tayi koko. 4 Shoka oshe tu ningitha tu kale tu mú uvitile uuntsa mokati komagongalo gaKalunga omolweidhidhimiko lyeni neitaalo, ndyoka tamu ulike, sho tamu hepekwa, naasho mwa taalela omaudhigu. 5 Shika otashi ulike kutya Kalunga oha pangula pauyuuki, nokwa mona kutya omwa gwana okuya mUukwaniilwa we, mboka tamu hepekelwa.

6 Pataloko lyaKalunga, oshi li pauyuuki a geele mboka taye mú hepeke. 7 Ihe ne, mboka tamu hepekwa, otamu ka mona epepelelo pamwe natse, sho Omuwa Jesus ta ka holoka okuza megulu pamwe naayengeli ye aanankondo, 8 e na omulilo gwa hwama, sho ta ka geela mboka inaaya tseya Kalunga nosho wo mboka ihaaya vulika konkundana ombwanawa yi na ko nasha nOmuwa gwetu, Jesus. 9 Mbaka otaya ka geelwa nehanagulo lyaaluhe, opo kaaya mone we Omuwa nosho wo oonkondo dhe oonene, 10 pethimbo, ndyoka ta ka tumbalekwa pamwe naayapuki ye, naayehe, mboka ya ulika kutya oye na eitaalo muye, otaye ke mu kuminwa. Molwaashoka omwa itaala uumbangi, mboka twa gandja, nane otamu ka kala yamwe yomuyo.

11 Onkee ano ohatu mú galikanene aluhe, nokwiindila Kalunga ketu, e mú tale ko mwa gwana oku ka mona omwenyo, ngoka e mú ithanena, a gwanithe po thiluthilu noonkondo dhe uuwanawa we awuhe, mboka a hala oku mú ningila, noku manithe iilonga, mbyoka tamu longo omolweitaalo. 12 Kungawo, edhina lyOmuwa gwetu, Jesus, otali ka tumbalekwa omolweni, nane otamu ka tumbalekwa, sho mu li muukumwe naye omolwuuwanawahenda waKalunga ketu nowOmuwa Jesus Kristus.