Yotango kAakorinto
4 Aantu oye tu tala ko tu li aayakuli* yaKristus, naapiya yiiholekwa yaKalunga iiyapuki. 2 Ngele osho shi li ngawo, aapiya oya tegelelwa ya adhike aadhiginini. 3 Ngame polwandje, kandi wete sha simana okupangulwa kune, nenge kompangu. Odhoshili kutya nangame mwene itandi vulu nokuli okwiipangula. 4 Oshoka eiyuvo lyandje olya yela. Ihe shika itashi ti kutya ngame omuyuuki; Jehova oye owala ta vulu okupangula ndje. 5 Onkee ano inamu pangula nando omuntu, manga ethimbo inaali thika, sigo Omuwa te ya. Ota ka holola puuyelele iiholekwa yomomilema, nota ka holola shoka shi li momitima dhaantu, opo nduno Kalunga ota ka pandula kehe gumwe omolwiilonga ye.
6 Onkee ano, aamwatate, iinima mbika otwe yi tula miilonga tse naApollos omolwuuwanawa weni, opo okupitila mutse mu vule okwiilonga ompango, ndjoka tayi ti: “Inamu konda shoka sha nyolwa,” opo mwaa kwatwe kuuntsa, ne inamu kala mwa simaneka yamwe e tamu dhini yalwe. 7 Oshoka olye e ku ningitha wu kale wa yooloka ko kuyalwe? Oshike nokuli wu na inoo shi pewa? Ihe nokuli ngele owe shi pewa, omolwashike to shi itangele wa fa inoo shi pewa?
8 Mbela omu na nale ashihe shoka mwa pumbwa? Mbela ne aayamba nale? Omwa tameka nale okupangela mu li aakwaniilwa, nonando katu po? Onda li nda halelela andola mu kale tamu pangele nale mu li aakwaniilwa, opo natse wo tu vule okupangela pamwe nane tu li aakwaniilwa. 9 Kungame, osha fa shi li ngeyi kutya tu li aayapostoli, otwa fa twa tulwa hugunina mokapale komaudhano, ongamboka ya tokolelwa eso, opo tu talike kuuyuni awuhe, kaayengeli nokaantu. 10 Otwa talika ko omagoya molwaKristus, ihe ne otamu dhiladhila kutya one aanandunge muKristus. Tse aankundi, ihe ne otamu monika mwa fa mwa kola. Ne omwa simanekwa, ihe tse otwa dhinika. 11 Sigo ongashingeyi, otatu tsikile okusa ondjala nenota, tu na onkayi,* notatu dhengwa, nokatu na omalukalwa, 12 nokulonga nuudhiginini niikaha yetu yene. Uuna gumwe e tu tuku, ohatu mu laleke nuuyamba. Uuna tatu hepekwa, ohatu idhidhimike. 13 Uuna tatu lundilwa, ohatu yamukula nombili; uuyuni owe tu tala ko twa fa iiyagaya, ondoya yiinima ayihe, sigo okunena.
14 Otandi mú nyolele iinima mbika, haku mú sitha ohoni, ihe oku mú kumagidha mu li aamwandje aaholike. 15 Oshoka nonando omu kale mu na aatekuli* 10 000 muKristus, kamu na nando ooho oyendji, oshoka onda ningi ho yeni omolwaKristus, okupitila monkundana ombwanawa. 16 Onkee ano otandi mú ladhipike mu holele ndje. 17 Omolwetompelo ndyoka, otandi mú tumine Timoteus, molwaashoka oku li omumwandje omuholike nomudhiginini mOmuwa. Ote ke mú dhimbulukitha wo omikalo,* ndhoka nda longitha, opo ndi longe shoka Jesus Kristus a hala, ngaashi naanaa nda kala tandi longo apuhe, megongalo kehe.
18 Yamwe yomune omwa kwatwa kuuntsa, nda fa andola itaandi ya ko kune. 19 Ihe otandi ke ya kune nziya, Jehova ngele okwe shi hala, haku uva andola oohapu dhaamboka ya inenepeka, ihe okutseya ngele otaya wilikwa koonkondo dhaKalunga. 20 Oshoka Uukwaniilwa waKalunga kawu na sha noohapu, ihe onoonkondo dhaKalunga. 21 Mbela oshinipo mwa hala? Omwa hala ndi ye kune nolunwa, nenge onohole nosho wo nombepo yombili?*