Timoteus omutiyali
1 Ngame, Paulus, omuyapostoli gwaKristus Jesus pahalo lyaKalunga, metsokumwe neuvaneko li na ko nasha nomwenyo, ngoka gwa uvanekwa okupitila muKristus Jesus, 2 otandi nyolele Timoteus, omumwandje omuholike:
Uuwanawahenda, ohenda nosho wo ombili, ndjoka hayi zi kuKalunga, Tate, nokOmuwa gwetu, Kristus Jesus, nayi kale pamwe nangoye.
3 Otandi pandula Kalunga, ngoka handi longele iilonga iiyapuki, ngaashi ootatekulululwa ya li haya ningi, ndi na eiyuvo lya yela, noihandi dhimbwa oku ku kwatela momaindilo gandje omutenya nuusiku. 4 Uuna tandi dhimbulukwa omahodhi goye, ohashi ningitha ndje ndi kale nda halelela oku ku mona, opo ndi kale nda nyanyukwa noonkondo. 5 Oshoka ohandi dhimbulukwa eitaalo lyoye, kaali na uufudhime, ndyoka nyokokulu Loide nosho wo nyoko Eunike ya kala ye na okuza petameko, nondi inekela kutya nangoye owu li na.
6 Omolwetompelo ndyoka, otandi ku dhimbulukitha wu kale wa hwama ngaashi omulilo, sho to longitha omagano, ngoka wa pewa kuKalunga, sho nde ku tenteke iikaha yandje. 7 Oshoka Kalunga ine tu pa ombepo yuumbanda,* ihe oyoonkondo, yohole noyokudhiladhila pandunge.* 8 Onkee ano ino sa ohoni okugandja uumbangi kombinga yOmuwa gwetu, nenge kombinga yandje, sho ndi li mondholongo omolwe, ihe idhidhimikila omaudhigu omolwonkundana ombwanawa mokwiinekela moonkondo dhaKalunga. 9 Okwe tu hupitha, nokwe tu ithana tu kale aayapuki, hamolwiilonga yetu, ihe omolwelalakano lye nomolwuuwanawahenda we mwene. Okwe wu tu ulukila nalenale okupitila muKristus Jesus, 10 ihe ngashingeyi owi iwetikile nawa okupitila mokuhololwa kwOmuhupithi gwetu, Kristus Jesus, ngoka a hulitha po eso,* nokwe tu hololela nkene tatu vulu okukala nomwenyo nosho wo nomalutu ihaaga yonuka okupitila monkundana ombwanawa. 11 Omolwokutaandelitha onkundana ombwanawa, onda langekwa po ndi li omuuvithi, omuyapostoli nomulongi gwaantu;
12 nomolwaashono, tandi hepekelwa iinima mbika, ihe inandi sa ohoni. Oshoka ngoka ndi itaala ondi mu shi, nondi na einekelo kutya ota vulu okutonatela shoka nde mu inekelela, sigo esiku lyepangulo lya thiki. 13 Dhiginina oohapu dhoshili,* ndhoka wa uva kungame, nokuulika ohole neitaalo, ndyoka wu na, sho wu li muukumwe naKristus Jesus. 14 Tonatela eliko, ndyoka wa inekelelwa okupitila mombepo ondjapuki, ndjoka yi li mutse.
15 Owu shi shi kutya aantu ayehe yomoshitopolwalongo shaAsia oya thiga ndje po, mwa kwatelwa Figelus naHermogenes. 16 Omuwa na sile ohenda aanegumbo yaOnesiforus, oshoka okwa kala nokutalaleka ndje olundji, noina kala a sa ndje ohoni, sho ndi li mondholongo. 17 Ihe sho a li muRoma, okwa kongo ndje a mana mo, sigo oosho a mono ndje. 18 Omuwa ne mu kwathele a mone esilohenda okuza kuJehova mesiku lyepangulo. Owu shi wo nawa iilonga ayihe, mbyoka a longela ndje muEfeso.